شىمكەنتتە ۇلىستىڭ ۇلى كۇنى مەن تاۋەلسىزدىكتىڭ 30 جىلدىعىنا وراي، قالا اكىمدىگىنىڭ ۇيىمداستىرۋىمەن وتكەن «ءجۇرسىننىڭ جۇيرىكتەرى، ءسابيتتىڭ سايگۇلىكتەرى»، «ناۋرىز، گۇل كوكتەم، جىل باسى» اتتى رەسپۋبليكالىق اقىندار ايتىسى ءوز مارەسىنە جەتتى. ەكى كۇنگە سوزىلعان ايتىسقا بۇكىل رەسپۋبليكادان 15 اقىن شاقىرىلعان بولاتىن. ايتىستىڭ ەكىنشى كۇنىنە بەس جۇپ اقىن ىرىكتەلىپ الىندى. ايتىستى بەلگىلى اقىن ءجۇرسىن ەرمان جۇرگىزسە، ءدۇبىرلى دودانى تاماشالاۋعا شىمكەنت قالاسىنىڭ اكىمى مۇرات ايتەنوۆ كەلدى.
ناۋرىزدى جىرعا قوسقان اقىندار، ەل بىرلىگى مەن ىنتىماقتى، ۇلتتىق قۇندىلىعىمىز بەن ءداستۇرىمىز جايىن ءسوز ەتتى. حالىق ءارتىسى ءاسانالى ءاشىموۆ باستاعان قازىلار القاسىنىڭ شەشىمىمەن باس جۇلدە نۇر-سۇلتان قالاسىنان كەلگەن ەركەبۇلان قاينازاروۆقا بەرىلدى.
توپتان وزا شاپقان اقىنعا قالا اكىمىنىڭ ءبىرىنشى ورىنباسارى شىڭعىس مۇقان 2 ميلليون تەڭگەنىڭ سەرتيفيكاتىن تابىس ەتتى. ال ءبىرىنشى ورىنعا لايىق دەپ تانىلعان باتىس قازاقستاندىق باۋىرجان شيرمەدينۇلىنا 1 ملن. تەڭگە بەرىلدى. ارقايسىسى 500 مىڭ تەڭگەنىڭ سەرتيفيكاتىنا يە بولعان بەكارىس شويبەكوۆ جانە ايبەك قاليەۆ ەكىنشى ورىنعا تابان تىرەدى. الماتى قالاسىنىڭ تۋماسى شۇعايىپ سەزىمحان، شىمكەنتتىك نۇرلان ەسەنقۇلوۆ پەن قاليجان ءبىلداش ءۇشىنشى ورىندى يەمدەنسە، ولارعا 300 مىڭ تەڭگەنىڭ سەرتيفيكاتتارى تابىس ەتىلدى. قالعان قاتىسۋشىلارعا ارنايى جۇلدە، مادەلىقوجا، مايلىقوجا، قۇلىنشاق، كوپپاي وماروۆ، ءتاۋشان ءابۋوۆا، ورىنباي تايمانوۆ جانە قانىبەك سارىباەۆ اتىنداعى جۇلدەلەر بەرىلدى.
«ناۋرىز ايتىس» رەسپۋبليكالىق اقىندار ايتىسى «تۇركىستان» سارايىندا قازىرگى جاعدايداعى بارلىق سانيتارلىق نورمالاردى ساقتاي وتىرىپ وتكىزىلدى.
شىمكەنت قالاسى اكىمدىگىنىڭ ءباسپاسوز قىزمەتى
