بۇگىن شىمكەنت قالاسىنداعى زابادام شاعىن اۋدانىندا «ناۋرىز» مەرەكەسىنە وراي قازاقستانداعى العاشقى «وتباسىلىق كىتاپحانا» ەل يگىلىگىنە بەرىلدى. بۇل وتباسىمەن بىرگە ءتيىمدى ۋاقىت وتكىزۋگە جانە بالالار دەمالىسى ءۇشىن قولايلى جاعداي جاسالعان «ءۇي ۇلگىسىندەگى» جاڭا فورماتتاعى كىتاپحانا.
كىتاپحانانىڭ ەرەكشەلىگى - ادەتتەگى وقۋ ورىندارى شەڭبەرىنەن شىعىپ، ۇيىرمە جۇمىستارىن جۇرگىزۋ، ءىس-شارالار وتكىزۋ، كوۆوركينگ، قاۋىمداستىقتار مەن كلۋبتاردى دامىتۋ مۇمكىندىگى بار كوميۋنيتي ورتالىقتار بولىپ تابىلادى، بىراق بۇرىنعىشا وقۋ مەن جۇمىس ىستەۋ ءۇشىن ىڭعايلى ورىن بولىپ قالا بەرەدى.
جاڭارتىلعان كىتاپحانانىڭ اشىلۋ سالتاناتىنا قاتىسقان قالا اكىمى مۇرات ايتەنوۆ بۇل مەكەمە وتباسىلىق قۇندىلىقتار مەن وتباسىلىق دەمالىستى ىلگەرىلەتۋ مەن دارىپتەۋگە زور مۇمكىندىك بولىپ تابىلاتىنىن اتاپ ءوتتى. قالا باسشىسى تۇراقتى كەلۋشىلەرگە ارنالعان بونۋستىق جۇيەمەن، سونداي-اق كىتاپحانا قىزمەتكەرلەرىنىڭ بىلىكتىلىگىن ارتتىرۋ باعدارلاماسىمەن جانە الداعى ءىس-شارالار كۇنتىزبەسىمەن تانىستى. سونىمەن قاتار، كىتاپحانا جانىنان اشىلعان «شاحمات» ۇيىندە ارالاپ كوردى.
كىتاپحانا جۇمىسىمەن تانىسۋ بارىسىندا اتالعان مەكەمە ۇجىمى قالا اكىمىنە وتباسىلىق ابونەمەنتىن تارتۋ ەتتى. ال، شاھار باسشىسى ىزگى نيەتكە العىس رەتىندە كىتاپحاناعا ءوز اتىنان بىرنەشە كىتاپ سىيعا تارتتى.
ايتا كەتەيىك، كەلۋشىلەرگە وتباسىلىق پسيحولوگيا جانە بيزنەستى جۇرگىزۋ بويىنشا تاقىرىپتىق سەكتسيالار ۇيىمداستىرىلادى. سونداي-اق، تۇراقتى وقىرماندارعا شىمكەنت قالاسىنىڭ مادەنيەت باسقارماسى وتكىزەتىن ويىن-ساۋىق ءىس-شارالارىنا، سپەكتاكلدەرگە تەگىن بيلەتتەر ۇسىنىلاتىن بولادى.
جوبا اۆتورلارى، الماتىلىق «كرەاتيۆتى بيۋرو» كومانداسى ءار ءتۇرلى جاس توپتاعى كەلۋشىلەردىڭ قاجەتتىلىكتەرىن ەسكەرە وتىرىپ، جاڭعىرتىلعان كىتاپحانانىڭ ديزاينى مەن ينتەرەرىنە ۇلكەن ءمان بەرگەن.
شىمكەنت قالاسى اكىمدىگىنىڭ ءباسپاسوز قىزمەتى
