Búgin Shymkent qalasyndaǵy Zabadam shaǵyn aýdanynda «Naýryz» merekesine oraı Qazaqstandaǵy alǵashqy «Otbasylyq kitaphana» el ıgiligine berildi. Bul otbasymen birge tıimdi ýaqyt ótkizýge jáne balalar demalysy úshin qolaıly jaǵdaı jasalǵan «úı úlgisindegi» jańa formattaǵy kitaphana.
Kitaphananyń ereksheligi - ádettegi oqý oryndary sheńberinen shyǵyp, úıirme jumystaryn júrgizý, is-sharalar ótkizý, kovorkıng, qaýymdastyqtar men klýbtardy damytý múmkindigi bar komıýnıtı ortalyqtar bolyp tabylady, biraq burynǵysha oqý men jumys isteý úshin yńǵaıly oryn bolyp qala beredi.
Jańartylǵan kitaphananyń ashylý saltanatyna qatysqan qala ákimi Murat Áıtenov bul mekeme otbasylyq qundylyqtar men otbasylyq demalysty ilgeriletý men dáripteýge zor múmkindik bolyp tabylatynyn atap ótti. Qala basshysy turaqty kelýshilerge arnalǵan bonýstyq júıemen, sondaı-aq kitaphana qyzmetkerleriniń biliktiligin arttyrý baǵdarlamasymen jáne aldaǵy is-sharalar kúntizbesimen tanysty. Sonymen qatar, kitaphana janynan ashylǵan «Shahmat» úıinde aralap kórdi.
Kitaphana jumysymen tanysý barysynda atalǵan mekeme ujymy qala ákimine otbasylyq abonementin tartý etti. Al, shahar basshysy izgi nıetke alǵys retinde kitaphanaǵa óz atynan birneshe kitap syıǵa tartty.
Aıta keteıik, kelýshilerge otbasylyq psıhologııa jáne bıznesti júrgizý boıynsha taqyryptyq sekııalar uıymdastyrylady. Sondaı-aq, turaqty oqyrmandarǵa Shymkent qalasynyń mádenıet basqarmasy ótkizetin oıyn-saýyq is-sharalaryna, spektaklderge tegin bıletter usynylatyn bolady.
Joba avtorlary, almatylyq «Kreatıvti bıýro» komandasy ár túrli jas toptaǵy kelýshilerdiń qajettilikterin eskere otyryp, jańǵyrtylǵan kitaphananyń dızaıny men ıntererine úlken mán bergen.
Shymkent qalasy ákimdiginiń baspasóz qyzmeti
