بۇل تۋرالى بۇگىن اقپاراتتىق-كوممۋنيكاتسيالىق ورتالىعىندا وتكەن ءباسپاسوز ماجىلىسىندە شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان مالىمدەدى.
– بيىل شىمكەنت قالاسىنىڭ اكىمى مۇرات ايتەنوۆتىڭ يدەياسىمەن ءۇشىنشى مەگاپوليس ناۋرىز مەيرامىن «ناۋرىز – شىمكەنتتەن باستالادى» اتتى مەگاجوبامەن باستادى. بۇل جوبانىڭ يدەياسى جۇزەگە اسىپ، بۇكىل قازاقستان حالقى وسى ايدا شىمكەنتكە بەتتەيتىندەي تويلاۋ ءۇشىن بىرنەشە جىل كەرەك. وعان قوسا، نەگىزگى ماقساتى – پارسى جانە تۇركى حالىقتارى ۇلىستىڭ ۇلى كۇنىن حالىقارالىق دەڭگەيدە تويلايتىن مەرەكەگە اينالدىرۋ. ياعني، بۇكىل الەم حالقى جاپونياعا ساكۋرانىڭ گۇلدەۋىنە، گوللاندياعا راۋشان گۇلىن ىزدەپ باراتىنداي دەڭگەيگە جەتكىزۋ. بۇل مەرەكەنىڭ ميسسياسى مەن فيلوسوفياسى – وسى، – دەدى ش.مۇقان.
بريفينگ بارىسىندا شىڭعىس جۇمابەكۇلى حالىق جاپپاي مەرەكەلىك سەرۋەنگە شىعاتىن كۇندەرگە توقتالدى.
– شىمكەنت قالاسى بىلتىردان بەرى «جاسىل ايماقتا» تۇر. وتكەن تاۋلىكتە كوروناۆيرۋس ينفەكتسياسىن جۇقتىرۋدىڭ 36 جاعدايى تىركەلدى. ارينە، جالپى العاندا اسا كوپ ەمەس. بىراق ەپيدەميولوگيالىق احۋال قالىپتى بولىپ تۇرعان جوق. سول سەبەپتى شىمكەنت قالاسىنىڭ تۇرعىندارى حالىق جاپپاي مەرەكەلىك سەرۋەنگە شىعاتىن 21, 22, 23 ناۋرىز كۇندەرى ۇلىستىڭ ۇلى كۇنىن جىلداعىداي ءداستۇرلى تۇردە تويلاي المايدى. ال ءبىز ءتىزىمىن بەكىتكەن 10 كۇندىك مەرەكەلىك ءىس-شارالار تەلەۆيزيالىق فورماتقا كوشىرىلەدى، – دەدى قالا اكىمىنىڭ ءبىرىنشى ورىنباسارى.
وسى ورايدا شىمكەنت قالالىق مادەنيەت، تىلدەردى دامىتۋ جانە ارحيۆتەر باسقارماسىنىڭ باسشىسى حانزادا ەسەنوۆا مەرەكەلىك ءىس-شارالار توڭىرەگىندە ءسوز قوزعادى.
– «ناۋرىز – شىمكەنتتەن باستالادى» مەگاجوباسى اياسىندا بۇگىنگە دەيىن 50-دەن اسا ءىس-شارا ءوتتى. ونىڭ ىشىندە اشىق الاڭداعى باعدارلامالار اۋا-رايىنىڭ قولايسىزدىعىنا بايلانىستى كونتسەرتتىك زالدارعا اۋىستىرىلدى. بۇل رەتتە مەرەكەلىك كەشتەر بارلىق سانيتارلىق تالاپتىڭ ساقتالۋىمەن ءارى كەلۋشىلەردىڭ سانى شەكتەلۋمەن ۇيىمداستىرىلدى. ال بۇگىننەن باستاپ بۇكىل مەرەكەلىك ءىس-شارانى تەلەۆيزيالىق فورماتقا كوشىرىپ، قورىمىزدى كەرەمەتتەي ساتتەرمەن تولتىرۋدى جوسپارلاپ وتىرمىز، – دەدى حانزادا ازىمحانقىزى.
ايتا كەتەيىك، «ناۋرىز – شىمكەنتتەن باستالادى» اتتى جوباسى اياسىندا قالادا 14 ناۋرىز – «كورىسۋ» كۇنى، 15 ناۋرىز – «جەر-كوك» تابيعات كۇنى، 16 ناۋرىز – «شەجىرە» كۇنى، 17 ناۋرىز – «تاريحقا تاعزىم» كۇنى، 18 ناۋرىز – «يگى ىستەر» كۇنى، 19 ناۋرىز – «شىمىرلىق پەن شەبەرلىك» كۇنى، 20 ناۋرىز – «زياتكەرلىك» كۇنى، 21 ناۋرىز – «ۇلتتىق تاعامدار» كۇنى، 22 ناۋرىز – «ۇلىستىڭ ۇلى» كۇنى جانە 23 ناۋرىز – «جورالعى» كۇنى بولىپ بەلگىلەنگەن.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
فوتو – سەرىك قوساي
