شىمكەنت قالاسىندا مۇسا پايعامباردىڭ سەرىگى سانالاتىن قىزىر پايعامباردىڭ 18-19 عاسىرلارعا ءتان تاريحي مۇناراسى بار. سايرام تۇرعىن الابىندا ورنالاسقان بۇل نىسان - تۋريستىك، مادەني، ەرەكشە نىسانداردىڭ قاتارىندا.
مۇنارا الەمگە ايگىلى پيزان مۇناراسى سەكىلدى 15’س-قا وڭعا قاراي قيسايعان. نىساننىڭ بيىكتىگى 10,5 م بولىپ، جەر سىلكىنىسىنىڭ ناتيجەسىندە قازىر 5,7 مەترگە جەتكەن.
كەيىنگى كەزدە مۇنارانىڭ، وزگە دە ەسكەرتكىشتەردىڭ سىرتقى كەلبەتى توزىپ، كۇتىپ-باپتاۋدى، قۇرىلىس جۇمىستارىن جۇرگىزۋدى قاجەت ەتەدى. وسىعان وراي قالانىڭ تۋريزم ورتالىعى مەتسەناتتاردىڭ كومەگىمەن جاڭا جوبانى قولعا الدى.
بۇل جونىندە قالا اكىمىنىڭ ورىنباسارى ماقسۇت يساحوۆ ءوزىنىڭ الەۋمەتتىك جەلىدەگى پاراقشاسىندا ءبولىستى.
«جوباعا العاش بولىپ قالامىزدىڭ تۇرعىنى، مەتسەنات مىرزاتاەۆ باۋىرجان مىرزا دەمەۋشىلىك كورسەتىپ، تاريحي مۇنارانىڭ اۋماعىن اباتتاندىرۋعا قولعابىس جاساپ، جوندەۋ جۇمىستارىن جۇرگىزۋدە. اياقتالعان سوڭ، تاعى بولىسە جاتارمىز. قالاعا دەگەن قامقورلىقپەن وسىلاي وزىمىزگە جانە تۋريستەرىمىزگە جايلى قالا جاسايتىنىمىز انىق» دەلىنگەن جازبادا.
شىمكەنت قالاسى اكىمدىگىنىڭ ءباسپاسوز قىزمەتى
