بۇگىن شىمكەنت قالاسى ج.شانين اتىنداعى قالالىق اكادەميالىق قازاق دراما تەاترىندا «ناۋرىز كونە شىمقالادا» اتتى تاڭعاجايىپ حيكاياتىنىڭ پرەمەراسى ءوتتى. دراماتۋرگ سايا قاسىمبەكتىڭ بۇل قويىلىمى شىمكەنت قالاسىنىڭ 2200 جىلدىعى مەن ۇلىستىڭ ۇلى كۇنى ناۋرىز مەيرامىنا ارنالعان.
كونە قالا تاريحىنان وي تەربەپ، ۇلىستىڭ ۇلى كۇنى ناۋرىزدى كەڭىنەن ناسيحاتتاعان قويىلىمعا مارتەبەلى قوناقتار، ساحنا ساڭلاقتارى جانە بۇلدىرشىندەر قاتىستى.
ءار قالانىڭ تەرەڭنەن تارتاتىن تاريحى بولۋى – زاڭدى قۇبىلىس. وڭتۇستىكتىڭ ءىنجۋ-مارجانىنا اينالعان شىمكەنتتىڭ قيلى تاريحى عاسىرلار قويناۋىنان ءسۇزىلىپ، بۇگىنگى بىزگە قالاي جەتكەنىن جاس ۇرپاققا ساحنالاعان تۋىندى كورەرمەندەرىن ءتانتى ەتتى. «كونە قالا ماڭگىلىك بولۋى ءۇشىن ورتاسىنان وزەن اعادى» دەگەن ۇستانىمنىڭ شىندىققا اينالعانىنا كۋاگەر – «شىمكەنتتىڭ سۇلۋ القاسىنا» اينالعان قوشقار اتا وزەنىنىڭ شىعۋ تاريحىنا جاڭاشا كوزقاراسپەن شولۋ جاسالىندى. ياعني، تىرشىلىك باستاۋى بىرلىكتەن تۇراتىنىن، ىرىس پەن قۇتتىڭ بەرەكەلى ىنتىماققا جەتەلەيتىنىن، ءاز ناۋرىزدىڭ ءمان ماعىناسىن ايشىقتاپ بەردى.
تاريحىمىزدى تارقاتقان تۋىندى بۇلدىرشىندەردى تاڭعاجايىپ ەرتەگىلەر الەمىنە اپارىپ، شات-شادىمان كۇي سىيلادى. وسى ورايدا وقيعا جەلىسىنە ويىسساق، جاقسى وقۋشىنىڭ ءرولىن سومداعان بەكنار: «تاريحىن بىلمەگەن، بولاشاعىن دا بولجاي المايدى» دەپ اتاسىنىڭ ناقىلىن ايتىپ، دوسىن ءبىلىم الۋعا ۇگىتتەسە، جاڭا زامان ۇردىسىمەن ۇيالى تەلەفونعا تەلمىرگەن قالجان بۇل سوزگە كۇلە قارايدى. مۇنى كىتاپتان ەمەس، ينتەرنەت جەلىسىنەن-اق وقىپ الاتىنىن العا تارتادى. بىراق كۇزەتشى تىيىم سالعان قوشقار ءمۇيىزىن بۇراپ، كونە عاسىرعا تاپ بولعان ساتتە تەلەفونىنىڭ قۋاتى ءبىتىپ، ونىڭ تۇككە ىسكە اسپاي قالعانىن كورىپ، كىتاپ وقۋ كەرەكتىگىن تۇسىنەدى. بۇل رەتتە قالجان كونە قالا تۇرعىندارى ءوز جەرىن جاۋلاردان قالاي قورعاعانىنا كۋا بولادى. قويىلىمنىڭ سوڭىنا قاراي قاقپا سىرتىنداعى شاپقىنشىلار كەرى شەگىنىپ، ۇلى جىبەك جولىمەن جەتكەن كەرۋەن باق-بەرەكە مەن بەيبىتشىلىك تۋىن الا كىرەدى. ءدال وسى كۇننەن باستاپ قاعاننىڭ وكىمىمەن ۇلىستىڭ ۇلى كۇنى ناۋرىز مەرەكەسىن تويلاۋ بەكىتىلەدى. سونداي-اق، قويىلىم بارىسىندا قوشقار اتا مەن ۇماي انا قولونەر، مادەنيەت، ياعني، وركەنيەتتىڭ باستاۋى بولعان كونە قالانى بۇگىنگى جاسىل قالانىڭ تۇرعىندارى قاستەرلەۋ قاجەتتىگىن ايتىپ، ءوز اماناتتارىن جەتكىزەدى.
قورىتا جەتكىزسەك، كونە عاسىر مەن جاڭا ءومىردى بايلانىستىرعان بۇل تۋىندى كورەرمەندەرگە تاريحي تاعىلىم بەرۋمەن قاتار، وتانسۇيگىشتىك قاسيەتىن ارتتىرا تۇسەتىنى انىق.
ايتا كەتەيىك، قويىلىم بارلىق سانيتارلىق تالاپتى ساقتاي وتىرىپ وتكىزىلدى.
ەسكە سالساق، بۇل تۋىندى ج.شانين اتىنداعى شىمكەنت قالالىق اكادەميالىق قازاق دراما تەاترىندا 22 ناۋرىزعا دەيىن جالعاسادى.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
فوتو – سامات مىرزاليەۆ
