Búgin Shymkent qalasy J.Shanın atyndaǵy qalalyq akademııalyq qazaq drama teatrynda «Naýryz kóne Shymqalada» atty tańǵajaıyp hıkaıatynyń premerasy ótti. Dramatýrg Saıa Qasymbektiń bul qoıylymy Shymkent qalasynyń 2200 jyldyǵy men Ulystyń Uly kúni Naýryz meıramyna arnalǵan.
Kóne qala tarıhynan oı terbep, Ulystyń Uly kúni Naýryzdy keńinen nasıhattaǵan qoıylymǵa mártebeli qonaqtar, sahna sańlaqtary jáne búldirshinder qatysty.
Ár qalanyń tereńnen tartatyn tarıhy bolýy – zańdy qubylys. Ońtústiktiń injý-marjanyna aınalǵan Shymkenttiń qıly tarıhy ǵasyrlar qoınaýynan súzilip, búgingi bizge qalaı jetkenin jas urpaqqa sahnalaǵan týyndy kórermenderin tánti etti. «Kóne qala máńgilik bolýy úshin ortasynan ózen aǵady» degen ustanymnyń shyndyqqa aınalǵanyna kýáger – «Shymkenttiń sulý alqasyna» aınalǵan Qoshqar Ata ózeniniń shyǵý tarıhyna jańasha kózqaraspen sholý jasalyndy. Iaǵnı, tirshilik bastaýy birlikten turatynyn, yrys pen quttyń berekeli yntymaqqa jeteleıtinin, áz Naýryzdyń mán maǵynasyn aıshyqtap berdi.
Tarıhymyzdy tarqatqan týyndy búldirshinderdi tańǵajaıyp ertegiler álemine aparyp, shat-shadyman kúı syılady. Osy oraıda oqıǵa jelisine oıyssaq, jaqsy oqýshynyń rólin somdaǵan Beknar: «Tarıhyn bilmegen, bolashaǵyn da boljaı almaıdy» dep atasynyń naqylyn aıtyp, dosyn bilim alýǵa úgittese, jańa zaman úrdisimen uıaly telefonǵa telmirgen Qaljan bul sózge kúle qaraıdy. Muny kitaptan emes, ınternet jelisinen-aq oqyp alatynyn alǵa tartady. Biraq kúzetshi tyıym salǵan qoshqar múıizin burap, kóne ǵasyrǵa tap bolǵan sátte telefonynyń qýaty bitip, onyń túkke iske aspaı qalǵanyn kórip, kitap oqý kerektigin túsinedi. Bul rette Qaljan kóne qala turǵyndary óz jerin jaýlardan qalaı qorǵaǵanyna kýá bolady. Qoıylymnyń sońyna qaraı qaqpa syrtyndaǵy shapqynshylar keri sheginip, Uly Jibek jolymen jetken kerýen baq-bereke men beıbitshilik Týyn ala kiredi. Dál osy kúnnen bastap qaǵannyń ókimimen Ulystyń Uly kúni Naýryz merekesin toılaý bekitiledi. Sondaı-aq, qoıylym barysynda Qoshqar ata men Umaı ana qolóner, mádenıet, ıaǵnı, órkenıettiń bastaýy bolǵan kóne qalany búgingi jasyl qalanyń turǵyndary qasterleý qajettigin aıtyp, óz amanattaryn jetkizedi.
Qoryta jetkizsek, kóne ǵasyr men jańa ómirdi baılanystyrǵan bul týyndy kórermenderge tarıhı taǵylym berýmen qatar, otansúıgishtik qasıetin arttyra túsetini anyq.
Aıta keteıik, qoıylym barlyq sanıtarlyq talapty saqtaı otyryp ótkizildi.
Eske salsaq, bul týyndy J.Shanın atyndaǵy Shymkent qalalyq akademııalyq qazaq drama teatrynda 22 naýryzǵa deıin jalǵasady.
Shymkent qalasynyń Aqparattyq-kommýnıkaııalyq ortalyǵy
Foto – Samat Myrzalıev
