قوستاناي قالاسىنىڭ تۇرعىنى رايحان راحاليەۆا ناۋرىز مەرەكەسىنە ارناپ ەرەكشە كورپە تىكتى. ۇزىندىعى 21 مەتر بولاتىن كورپەنى قوستاناي وبلىستىق تاريحي-ولكەتانۋ مۇراجايىنىڭ قورىنا تاپسىردى.
«21 مەتردى تاڭداعانىمنىڭ وزىندىك نىشانى بار. جەتىنى ۇشكە كوبەيتسەڭىز – 21, ال قازاقت جەتى اتا، جەتى قازىنا، جەتى عالام، جەتى قات جەر، جەتى امال، جەتى كۇننىڭ قادىر-قاسيەتىن باعالاعان. حالىق ۇعىمدارىنداعى كيەلى 7 سانىنىڭ ورنى ەرەكشە ەكەنى راس. ءتىپتى بۇگىن ءار داستارحاننان تابىلاتىن ناۋرىز كوجە دە 7 دامنەن تۇرادى. مۋزەي قورىنا تارتۋ ەتكەن كورپەم قوشقار ءمۇيىز ويۋىمەن كەستەلەنىپ، قىزىل-جاسىل ءتۇستى ماساتى ماتامەن تىستالعان»، - دەيدى شەبەر.
35 جىل بويى ىسمەرلىكتى سەرىك ەتكەن رايحان راحاليەۆا تىككەن ءساندى ۇلتتىق كيىم ۇلگىلەرى كوپتىڭ سۇرانىسىنا يە. شەبەر قولىنان شىققان بۇيىمدار رەسەي، اقش، تۇركيا، يتاليا مەملەكەتتەرىندەگى كورمەلەرگە قاتىسقان.
«كەز كەلگەن شىعارماشىلىق ادامى ىزدەنەدى. ءبىر جاساعان نارسەڭ كوڭىلىڭە تولماۋى مۇمكىن نەمەسە ودان دا اسىرا تۇسكىڭ كەلەدى. قولونەر دە سول سياقتى. الداعى ۋاقىتتا گيننەستىڭ رەكوردتار كىتابىنا ەنەتىن ەڭ ۇزىن كورپە قۇراستىرىپ شىعارۋدى كوزدەپ وتىرمىن. بۇعان اسقان تياناقتىلىق، جاۋاپكەرشىلىك كەرەك»، - دەپ ءتۇيدى رايحان راحاليەۆا.
