Qostanaı qalasynyń turǵyny Raıhan Rahalıeva Naýryz merekesine arnap erekshe kórpe tikti. Uzyndyǵy 21 metr bolatyn kórpeni Qostanaı oblystyq tarıhı-ólketaný murajaıynyń qoryna tapsyrdy.
«21 metrdi tańdaǵanymnyń ózindik nyshany bar. Jetini úshke kóbeıtseńiz – 21, Al qazaqt jeti ata, jeti qazyna, jeti ǵalam, jeti qat jer, jeti amal, jeti kúnniń qadir-qasıetin baǵalaǵan. Halyq uǵymdaryndaǵy kıeli 7 sanynyń orny erekshe ekeni ras. Tipti búgin ár dastarhannan tabylatyn Naýryz kóje de 7 dámnen turady. Mýzeı qoryna tartý etken kórpem qoshqar múıiz oıýymen kestelenip, qyzyl-jasyl tústi masaty matamen tystalǵan», - deıdi sheber.
35 jyl boıy ismerlikti serik etken Raıhan Rahalıeva tikken sándi ulttyq kıim úlgileri kóptiń suranysyna ıe. Sheber qolynan shyqqan buıymdar Reseı, AQSh, Túrkııa, Italııa memleketterindegi kórmelerge qatysqan.
«Kez kelgen shyǵarmashylyq adamy izdenedi. Bir jasaǵan nárseń kóńilińe tolmaýy múmkin nemese odan da asyra túskiń keledi. Qolóner de sol sııaqty. Aldaǵy ýaqytta Gınnestiń rekordtar kitabyna enetin eń uzyn kórpe qurastyryp shyǵarýdy kózdep otyrmyn. Buǵan asqan tııanaqtylyq, jaýapkershilik kerek», - dep túıdi Raıhan Rahalıeva.
