جىلىنا ءبىر-اق رەت كەلەتىن ناۋرىزدى شىمكەنتتە تويلاۋ كەرەك، دەپ جازدى ءوز facebook پاراقشاسىندا رۋستەم اشەتاەۆ.
بيىلعا دەيىن جەلتوقساننىڭ 31-نە جاڭا جىلدى قىرۋار قارجىمەن دۇركىرەتىپ تويلاپ، ناۋرىزعا كەلگەندە "جەتىم قىزدىڭ تويىن" جاساپ كەلگەنبىز.
بيىل شىمكەنت سول ولقىلىقتىڭ ورنىن جويۋعا باستاما جاساۋدا. جاڭاشا قارقىنمەن، ۇلتتىق بولمىسىمىزدى ناسيحاتتاۋ مەن ءاز-ناۋرىزدى ۇشتاستىرا وتىرىپ ون كۇن تويلاۋ دەگەنىمىز - بولاشاقتا بەرەرى مول باستامالاردىڭ ءبىرى. ءارى، شىمكەنت قالاسى مەگاپوليس دارەجەسىن العاندىقتان، قازاققا، قازاقستانعا ءوزىنىڭ بەرەرى دە، قوسارى دا بولۋى كەرەك ەمەس پە؟!
قازاقستاندى الدىعا تارتۋشى ورتالىقتاردىڭ بىرىنە اينالۋ - مەگاپوليستىڭ باستى قاعيداسى.
بيىل شىمكەنت مەگاپوليسى ۇلىستىڭ ۇلى كۇنى ءاز-ناۋرىزدى تويلاۋدىڭ جاڭاشا ۇلگىسىن كورسەتۋدە. بۇل ۇلگى بولارلىق باستاما دەپ ويلايمىن!
ارينە، باستاپقىدا كوبىرەك شىعىندالۋعا تۋرا كەلەدى (بۇل بارلىق جاڭاشىل باستامالارعا قاتىستى قاعيدا).
ءاربىر اعاش جەمىس بەرۋى ءۇشىن سۋعا ءزارۋ. قۇيىلعان سۋدىڭ اسەرىنەن، ۋاقىتى كەلگەندە ءوز جەمىسىن بەرەدى. جاڭا جوبالارعا قۇيىلاتىن قارجىلار دا وسى سۋ سەكىلدى.
ياعني، قازىرگى شىعىنداردى بولاشاققا قۇيىلىپ جاتقان ينۆەستيتسيا دەپ قاراساق، مۇنداي اۋقىمدى جوبالار دا جاقىن بولاشاقتا ءوز جەمىسىن بەرەرى ءسوزسىز.
تەك، ازداعان ۋاقىت كەرەك.
برازيليانىڭ كارناۆالى مەن قىتايدىڭ جاڭا جىلىن تويلاۋى دەگەن سياقتى، ءتىپتى سول تويلاۋلارىن تاماشالاۋعا ىشكى-سىرتقى تۋريستەردى تارتاتىن الەمدىك دەڭگەيدەگى مەرەكەلەرى بار. بۇل ءىس-شارالارى دا باستاپقىدا مەملەكەتتىك قولداۋمەن وتكىزىلىپ، ناسيحاتتالىپ، ءوز ۇلتىنىڭ بولمىسىندا جاتقان دۇنيەسىن تۇلەتىپ، حالقىنىڭ قولداپ كەتۋىنە جول سالىپ بەرىپ وتىرعان. قازىر بۇل مەرەكەلەرى ءوزىن-ءوزى قارجىلاندىراتىن كۇيگە جەتكەن.
قىسقا ويلاساڭ ورىنسىز شىعىن بولىپ كورىنگەنىمەن، الىسقا ويلاساڭ شىمكەتتىڭ تۇتاس قازاققا تۇگىلى، بۇتكىل الەمگە تانىتاتىن ءوز برەندىنە اينالدىرۋعا بولاتىن جوبانى كورۋگە بولادى. باستاپقىدا "كوش جۇرە تۇزەلەدى" دەگەندەي، ازداعان كەم-كەتىگى بولۋى مۇمكىن. ونى قالىپتى جاعداي دەپ باعالايمىن. وعان بولا بۇل جوبانى تۇتاستاي سىزىپ تاستاۋدى دۇرىس كورمەيمىن.
مىسالى "كوشپەندىلەر ويىنىن" قىرعىز اعايىندار ءوز برەندىنە اينالدىرا الدى. كولەمدى قارجى دا شىعىنداعانى داۋسىز. ەسەسىنە ودان زيان شەككەن جوق.
سول سەكىلدى "ناۋرىز شىمكەنتتەن باستالادى" جوباسىنىڭ ارتىندا سارقىلماس پوتەنتسيالى بارىن كورۋگە بولادى.
بىرەر جىلدا بۇتكىل قازاقستاننان قوناقتار ءاز-ناۋرىزدى شىمكەنتتە تويلاۋعا كەلىپ جاتسا، ءوزىن-ءوزى قارجىلاندىراتىن جوباعا اينالىپ شىعا كەلمەيدى مە!
ول ءۇشىن ساپالى دۇنيەلەردى ۇسىنۋىمىزعا تۋرا كەلەدى. ال، ساپالى دۇنيە ارزان بولماسى حاق!
سوندىقتان، بۇل جوباعا ءارتۇرلى راكۋستان، ءارتۇرلى بيىكتىكتەن قاراپ وي قورىتقان ءجون بولار دەگىم كەلەدى.
بيىلعى جىلى شىمكەنتتە كارانتيندىك شەكتەۋلەر بارىنىڭ وزىندە، ءاز-ناۋرىزدىڭ قالاي تويلانىپ جاتقانىن كورىپ وتىرسىزدار. بۇدان بىلايعى جىلدارى بۇل جوبا تەك ۇدەمەلى قارقىن الا تۇسەتىنىنە سەنىمدىمىن.
سوندىقتان، بارشا قازاقستاندىقتاردى كەلەسى جىلى "كوزدى جۇمىپ" ون كۇنگە شىمكەنتكە كەلىپ ءاز-ناۋرىزدى تويلاۋعا شاقىرامىن!
ۇلىستىڭ ۇلى كۇنى قۇتتى بولسىن اعايىندار!
