بۇگىن ەردوعان يلون ماسكپەن تەلەفون ارقىلى سويلەستى. تەحنوكرات پەن پرەزيدەنت اراسىندا تەحنولوگيا سالاسىنداعى ارىپتەستىكتى دامىتۋ تۋرالى اڭگىمە بولعان. ءارى بۇگىن ەردوعاننىڭ تۋعان كۇنى. بۇل دا ءبىر سەبەپ. بىرنەشە جىل بۇرىن يلون ماسك تۇركياعا دا كەلىپ كەتكەن. پرەزيدەنتپەن جولىققان. ارتىنشا ەردوعان 2023 جىلى ەلەكتر كولىگىن شىعارامىز، عارىشقا تۇڭعىش رەت تۇرىك عارىشكەرىن ۇشىرامىز دەدى. ەردوعان بيلىگى عارىشتى يگەرۋ بويىنشا مەملەكەتتىك باعدارلامانى دايىنداپ بەكىتتى.
قاراپ وتىرماي يلون ماسكتىڭ سۇحباتتارىن دا كورىپ شىقتىم. ويلارى وتكىر.
"قازىر عارىشقا ۇشاتىن زىمىراندار جاساۋ وڭاي. بۇل تاقىرىپتا جازىلعان مىڭداعان كىتاپتار بار. عىلىمنىڭ كۇشى الدەقاشان عارىشقا ۇشار زىمىرانداردى جاساپ شىعارۋعا جەتتى. الگى كىتاپتاردى وقى دا، تەحنوكراتتاردى جيناپ، ينفراسترۋكتۋرانى جاساپ، راكەتا قۇراستىرا بەر. بۇگىنگى ادامزاتتىڭ ماسەلەسى زىمىراننىڭ كەلەسى بۋىنىن جاساۋ. پلانەتالارعا ۇشا الاتىن جاڭا تەحنولوگيا ويلاپ تابۋ. كەڭەستىڭ دە زىمىرانى جامان ەمەس. تەك بۇل زىمىراندار 1950 جىلدارى جاسالعان. ءالى ۇشىپ ءجۇر. دەمەك 70 جىل ءبىز بۇل سالادا ءبىر ورىندا تۇرعانبىز. ەگەر كورولەۆ مۇنى ەستىسە كورىندە اۋناپ تۇسەر ەدى.
رەسەيگە 2000 جىلدارى زىمىران ساتىپ الۋ ءۇشىن 3 رەت باردىم. قىمبات باعانى ايتتى. ءوزىمنىڭ جاساعانىم ارزان بولاتىنىن ءتۇسىندىم. كوپ ۇزاماي كومپانيا قۇرىپ ىسكە كىرىستىم. مەن ءۇشىن 2008 جىلدار وتە قيىن ءوتتى. جۇمىس ورنىندا ۇيىقتادىم. سوڭعى ميلليوندارىم قالدى. 2-3 اپتادا ناتيجە شىعارماساق، ماماندارعا تولەيتىن جالاقى دا قالمايتىن ەدى. سوڭعى ساتكە دەيىن ءۇمىت ۇزبەي كۇرەستىم.
ء"بىز عارىشقا ۇشۋدى ادامزات بالاسىنا ارزان ءارى قاۋىپسىز ەتۋىمىز كەرەك. ادامزات بالاسى كۇندەلىكتى ءىشىپ-جەۋ، جۇمىسقا بارۋدان دا بيىك دۇنيەلەرگە ۇمتىلۋى ءتيىس. بۇل ءبىزدىڭ ميسسيامىز. ەرتەڭ اقىرەت كەلەدى. ءبارى قۇريدى دەپ قاراپ وتىرماي ادامزاتتى ساقتاپ قالار جاڭا جولداردى ىزدەۋىمىز كەرەك"- دەدى.
P.S. كەيدە ويلايمىن. يلون ماسك قارۋ-جاراق شىعارۋعا شىنداپ كىرىسسە بۇل سالادا توڭكەرىس جاسايتىن سەكىلدى. رەسەيدى 10-15 جىلدا ەڭ ارتتا قالعان ەلدىڭ دەڭگەيىنە تۇسىرەدى-اۋ. ازىرگە تەك عارىش، ەلەكتر كولىگى، مارس، تەگىن ينتەرنەت دەگەن جوبالارمەن ءجۇر. ال، اقش بۇل گەنيدىڭ باسىن قورعانىس سالاسىنا بۇرسا شە؟.. ودكب كومەكپەيدى-اۋ ول كەزدە.
جالپى وسى تەكتەس دۇنيەلەرگە قىزىققان، تالقىلاعان، قوعام بولىپ ۇمتىلعان دۇرىس. بۇل ءبىزدى ەل رەتىندە وسىرەدى. ەڭ قىزىعى يلون ماسكتى ءبىر-ەكى جوباسىمەن وزبەكستان وزىنە تارتا باستاسا، بۇل ءبىز ءۇشىن ولىمنەن بەتەر ۇيات بولادى. ۇكىمەتىمىزدى جەپ قويامىز ول كەزدە. بايقوڭىرى بولا تۇرا بىزدەن اتتاپ وزەكەڭە كەتسە، بۇل ءبىزدىڭ ۇكىمەتتىڭ كەمشىلىگى دەگەن ءسوز. ءبىر ادام ءبىر مەملەكەتتىڭ بەدەلىنە، دامۋىنا اسەر ەتە الار كۇشتە. مىقتى تۇلعا!
قازاق ۇكىمەتى قورىتىندى شىعارار. الەمدىك دەڭگەيدەگى بىرنەشە تەحنوكراتتىق كومپانيانىڭ يەسى اتانعان تالانتتى تۇلعانى ەردوعان سەكىلدى ءبىر سالامىزعا تارتا بىلگەن دۇرىس. ءوزىمىزدىڭ قولدان كەلمەدى عوي ەندى. ول تۇسىنىكتى.
باۋىرجان سەرىكباەۆ،
"ادىرنا" ۇلتتىق پورتالى
