Búgin Erdoǵan Ilon Maskpen telefon arqyly sóılesti. Tehnokrat pen prezıdent arasynda tehnologııa salasyndaǵy áriptestikti damytý týraly áńgime bolǵan. Ári búgin Erdoǵannyń týǵan kúni. Bul da bir sebep. Birneshe jyl buryn Ilon Mask Túrkııaǵa da kelip ketken. Prezıdentpen jolyqqan. Artynsha Erdoǵan 2023 jyly elektr kóligin shyǵaramyz, ǵaryshqa tuńǵysh ret túrik ǵaryshkerin ushyramyz dedi. Erdoǵan bıligi ǵaryshty ıgerý boıynsha memlekettik baǵdarlamany daıyndap bekitti.
Qarap otyrmaı Ilon Masktyń suhbattaryn da kórip shyqtym. Oılary ótkir.
"Qazir ǵaryshqa ushatyn zymyrandar jasaý ońaı. Bul taqyrypta jazylǵan myńdaǵan kitaptar bar. Ǵylymnyń kúshi áldeqashan ǵaryshqa ushar zymyrandardy jasap shyǵarýǵa jetti. Álgi kitaptardy oqy da, tehnokrattardy jınap, ınfrastrýktýrany jasap, raketa qurastyra ber. Búgingi adamzattyń máselesi zymyrannyń kelesi býynyn jasaý. Planetalarǵa usha alatyn jańa tehnologııa oılap tabý. Keńestiń de zymyrany jaman emes. Tek bul zymyrandar 1950 jyldary jasalǵan. Áli ushyp júr. Demek 70 jyl biz bul salada bir orynda turǵanbyz. Eger Korolev muny estise kórinde aýnap túser edi.
Reseıge 2000 jyldary zymyran satyp alý úshin 3 ret bardym. Qymbat baǵany aıtty. Ózimniń jasaǵanym arzan bolatynyn túsindim. Kóp uzamaı kompanııa quryp iske kiristim. Men úshin 2008 jyldar óte qıyn ótti. Jumys ornynda uıyqtadym. Sońǵy mıllıondarym qaldy. 2-3 aptada nátıje shyǵarmasaq, mamandarǵa tóleıtin jalaqy da qalmaıtyn edi. Sońǵy sátke deıin úmit úzbeı kúrestim.
"Biz ǵaryshqa ushýdy adamzat balasyna arzan ári qaýipsiz etýimiz kerek. Adamzat balasy kúndelikti iship-jeý, jumysqa barýdan da bıik dúnıelerge umtylýy tıis. Bul bizdiń mıssııamyz. Erteń aqyret keledi. Bári qurıdy dep qarap otyrmaı adamzatty saqtap qalar jańa joldardy izdeýimiz kerek"- dedi.
P.S. Keıde oılaımyn. Ilon Mask qarý-jaraq shyǵarýǵa shyndap kirisse bul salada tóńkeris jasaıtyn sekildi. Reseıdi 10-15 jylda eń artta qalǵan eldiń deńgeıine túsiredi-aý. Ázirge tek ǵarysh, elektr kóligi, Mars, tegin ınternet degen jobalarmen júr. Al, AQSh bul genııdiń basyn qorǵanys salasyna bursa she?.. ODKB kómekpeıdi-aý ol kezde.
Jalpy osy tektes dúnıelerge qyzyqqan, talqylaǵan, qoǵam bolyp umtylǵan durys. Bul bizdi el retinde ósiredi. Eń qyzyǵy Ilon Maskti bir-eki jobasymen Ózbekstan ózine tarta bastasa, bul biz úshin ólimnen beter uıat bolady. Úkimetimizdi jep qoıamyz ol kezde. Baıqońyry bola tura bizden attap ózekeńe ketse, bul bizdiń úkimettiń kemshiligi degen sóz. Bir adam bir memlekettiń bedeline, damýyna áser ete alar kúshte. Myqty tulǵa!
Qazaq úkimeti qorytyndy shyǵarar. Álemdik deńgeıdegi birneshe tehnokrattyq kompanııanyń ıesi atanǵan talantty tulǵany Erdoǵan sekildi bir salamyzǵa tarta bilgen durys. Ózimizdiń qoldan kelmedi ǵoı endi. Ol túsinikti.
Baýyrjan SERIKBAEV,
"Adyrna" ulttyq portaly
