بۇل تۋرالى بۇگىن قالا اكىمى مۇرات ايتەنوۆ ەسەپتى كەزدەسۋىندە ايتىپ ءوتتى. 2020 جىل بۇكىل الەمدى جايلاعان ىندەتپەن كۇرەس جاعدايىندا وربىگەنىن ايتقان قالا باسشىسى ەلىمىزدە جاريالانعان توتەنشە جاعداي مەن كارانتين كەزىندە شىمكەنتتەگى 483 482 تۇرعىنعا مەملەكەت تاراپىنان كومەك كورسەتىلگەنىن ءمالىم ەتتى.
ماسەلەن، ەلباسى ن.نازارباەۆتىڭ باستاماسىمەن قۇرىلعان «ءبىز بىرگەمىز» قوعامدىق قورى ارقىلى 41 مىڭ از قامتىلعان وتباسى كومەك العان. ال، پرەزيدەنتتىڭ تاپسىرماسى بويىنشا توتەنشە جاعداي جانە كارانتين كەزىندە كىرىسىن ۋاقىتشا جوعالتقان 428 مىڭنان استام ازاماتقا قولداۋ كورسەتىلگەن. ياعني، ءبىرىنشى كەزەڭدە 285 مىڭنان استام ادامعا، ەكىنشى كەزەڭدە 143 مىڭنان استام ازاماتقا 42 500 تەڭگەدەن كومەك بەرىلدى. ودان بولەك، 28 مىڭنان استام ازاماتتىڭ كوممۋنالدىق شىعىنى مەملەكەتتىك بيۋدجەتتەن وتەلدى.
بۇدان بولەك، شىمكەنت قالاسى بويىنشا 26 مىڭنان استام كاسىپكەرلىك سۋبەكتىسى مۇلىك جانە تابىس سالىقتارىنان بوساتىلعان بولسا، 1482 كاسىپكەردىڭ 13 ملرد. تەڭگە نەسيە تولەمدەرى كەيىنگە شەگەرىلدى. ىندەتپەن كۇرەسكەن مەديتسينا قىزمەتكەرلەرىنە ءتۇرلى وتەم-تولەمدەر قاراستىرىلدى.
مۇرات ايتەنوۆ ءوز سوزىندە پاندەميا ادام بالاسىنا ۇلكەن قاۋىپ ءتوندىرىپ، ءومىر ءسۇرۋ داعدىسىن وزگەرتكەنىن جانە بۇل دەنساۋلىق ساقتاۋ سالاسىنا ۇلكەن سىناق بولعانىن ايتتى.
«ىندەت قازاقستاندى دا اينالىپ وتكەن جوق. وسىنداي قيىن ساتتە العى شەپتە جۇرگەن مەديتسينا، پوليتسيا، توتەنشە جاعدايلار قىزمەتكەرلەرىنە، اسكەريلەر مەن ەرىكتىلەرگە، تۇسىنىستىك تانىتىپ، جاقىنىنا جاناشىر بولعان ءاربىر ازاماتقا العىس ايتامىن! سىناق ساعىمىزدى سىندىرعان جوق، كەرىسىنشە بىرىكتىردى. كەمشىل تۇستارىمىزدى كوردىك، جاڭا باعدار الدىق، قاراپايىم قارىم-قاتىناستىڭ قۇندىلىعىن تۇسىندىك، توي-دۋمانداپ جۇرەتىن بەيبىت زاماننىڭ باعاسىن بىلدىك»، -دەدى قالا اكىمى.
ەستەرىڭىزگە سالساق، اكىم ەسەبى تىكەلەي ەفير ارقىلى «وڭتۇستىك»، «وتىرار»، «ايعاق» تەلەارنالارى مەن اكىمدىكتىڭ رەسمي الەۋمەتتىك جەلىلەرىندە كورسەتىلۋدە. تۇرعىندار سۇراقتارى مەن ۇسىنىستارىن 109 تەلەفونىنا حابارلاسىپ قويۋعا نەمەسە الەۋمەتتىك جەلى ارقىلى جازۋعا بولادى.
فوتو: بەرەكە سەيىتجاپپار
شىمكەنت قالاسى اكىمدىگىنىڭ ءباسپاسوز قىزمەتى
