قازاقستاندا كوكتەمگى سۋ تاسقىنى كەزىندە 276 ەلدى مەكەندى سۋ باسۋى مۇمكىن. بۇل تۋرالى توتەنشە جاعدايلار ءمينيسترى يۋري يلين مالىمدەدى، دەپ حابارلايدى "ادىرنا" ۇلتتىق پورتالى.
مينيسترلىك اكىمدىكتەرمەن بىرلەسىپ 2017 جىلى ەل بويىنشا كوكتەمدە سۋ باسۋعا نەعۇرلىم بەيىم 905 ەلدى مەكەندى انىقتادى. ال سۋ تاسقىنى قاۋپىنىڭ الدىن الۋ جانە جويۋ جونىندەگى جول كارتاسىن ىسكە اسىرۋ اياسىندا ءۇش جىل ىشىندە 315 ەلدى مەكەننىڭ سۋ استىندا قالۋىنا جول بەرىلمەدى جانە تاعى دا 314 اۋىلدا قاۋىپ-قاتەر بارىنشا ازايتىلدى.
"قازىر سۋ باسۋ قاۋپى بار ايماقتا رەسپۋبليكا بويىنشا 276 ەلدى مەكەن قالىپ وتىر، بۇل 270 مىڭنان استام ادام. ولاردى سۋ تاسقىنىنان قورعاۋ ءۇشىن 2023 جىلعا دەيىنگى جاڭا جول كارتاسى بەكىتىلدى. ونى ىسكە اسىرۋعا رەسپۋبليكالىق جانە جەرگىلىكتى بيۋدجەتتەردەن 160 ميلليارد تەڭگەدەن استام قارجى ءبولۋ جوسپارلانىپ وتىر", – دەدى يلين ۇكىمەت وتىرىسىندا.
مينيستر وڭىرلەردە الداعى سۋ تاسقىنىنا قارسى دايىندىق قالاي جۇرگىزىلىپ جاتقانىنا توقتالدى.
ايتۋىنشا، جانار-جاعارماي (3,2 مىڭ توننا), ينەرتتى ماتەريالدار (224,3 مىڭ توننا) مەن قۇم سالىنعان قاپتاردىڭ (886 مىڭ دانا) قورى قالىپتاستىرىلدى.
شۇعىل شىعىندارعا دا توتەنشە رەزەرۆ كوزدەلىپ، شامامەن 38 ميلليارد تەڭگە الدىن الا سالىنعان.
سانى 38 مىڭ ادامنان اساتىن ازاماتتىق قورعاۋ قۇرالىمدارى، 13 مىڭ بىرلىك تەحنيكا، 500-دەن اسا ءجۇزۋ جانە 2 500-دەن اسا سۋ سورۋ قۇرالى ايقىندالدى.
