Qazaqstanda kóktemgi sý tasqyny kezinde 276 eldi mekendi sý basýy múmkin. Bul týraly tótenshe jaǵdaılar mınıstri Iýrıı Ilın málimdedi, dep habarlaıdy "Adyrna" ulttyq portaly.
Mınıstrlik ákimdiktermen birlesip 2017 jyly el boıynsha kóktemde sý basýǵa neǵurlym beıim 905 eldi mekendi anyqtady. Al sý tasqyny qaýpiniń aldyn alý jáne joıý jónindegi jol kartasyn iske asyrý aıasynda úsh jyl ishinde 315 eldi mekenniń sý astynda qalýyna jol berilmedi jáne taǵy da 314 aýylda qaýip-qater barynsha azaıtyldy.
"Qazir sý basý qaýpi bar aımaqta respýblıka boıynsha 276 eldi meken qalyp otyr, bul 270 myńnan astam adam. Olardy sý tasqynynan qorǵaý úshin 2023 jylǵa deıingi jańa jol kartasy bekitildi. Ony iske asyrýǵa respýblıkalyq jáne jergilikti bıýdjetterden 160 mıllıard teńgeden astam qarjy bólý josparlanyp otyr", – dedi Ilın úkimet otyrysynda.
Mınıstr óńirlerde aldaǵy sý tasqynyna qarsy daıyndyq qalaı júrgizilip jatqanyna toqtaldy.
Aıtýynsha, janar-jaǵarmaı (3,2 myń tonna), ınertti materıaldar (224,3 myń tonna) men qum salynǵan qaptardyń (886 myń dana) qory qalyptastyryldy.
Shuǵyl shyǵyndarǵa da tótenshe rezerv kózdelip, shamamen 38 mıllıard teńge aldyn ala salynǵan.
Sany 38 myń adamnan asatyn azamattyq qorǵaý quralymdary, 13 myń birlik tehnıka, 500-den asa júzý jáne 2 500-den asa sý sorý quraly aıqyndaldy.
