باتىس قازاقستان وبلىسىنىڭ ورتالىعى ورال قالاسىنىڭ اكىمى مەيىرجان ساتقانوۆقا سۋ تاسقىنىنا بايلانىستى قاتاڭ سوگىس جاريالاندى. مۇنداي شەشىمدى وبلىس باسشىسى ناريمان تورەعاليەۆ قابىلدادى، - دەپ حابارلايدى "ادىرنا" ۇلتتىق پورتالى.
سۋ تاسقىنىنا قارسى ءىس-شارالار جونىندەگى وبلىستىق جەدەل شتاب وتىرىسىندا تورەعاليەۆ قالا بيلىگىنىڭ تابيعي اپاتقا دايىن ەمەستىگىن باسا ايتتى.
«ءسىز سۋ تاسقىنىنا دايىن بولمادىڭىز. ءتىپتى، قالا اكىمدىگىنىڭ عيماراتى دا سۋعا استىندا قالدى. مۇنىڭ ءبارى جاۋاپسىزدىقتى كورسەتەدى. كەشە-بۇگىن قالانى ارالاپ ءجۇرمىن، كەيبىر شاعىن اۋدانداردا مەن كەلگەندە جۇمىس ەندى عانا باستالىپ جاتىر. (...) قالا مەن اۋداندار كۇشەيتىلگەن رەجيمدە جۇمىس ىستەۋى كەرەك. جاعدايدى تاۋلىك بويى باقىلاۋدا ۇستاڭىزدار»، - دەدى وبلىس اكىمى.
26 ناۋرىزدا ورالدا قاتتى جاڭبىر باستالدى، سينوپتيكتەردىڭ بولجاۋىنشا، ول بىرنەشە كۇنگە سوزىلادى. ەرىگەن قار سۋى جانە جاڭبىر سۋى تەك شەت ايماقتاردى عانا ەمەس، ورتالىقتى، اتاپ ايتقاندا، اكىمدىك عيماراتىن باسىپ قالدى.
كارىز قۇبىرلارىن ەرىگەن قار سۋى باسىپ قالعاندىقتان، قالا تۇرعىندارىنا اۋىز سۋ بەرۋگە شەكتەۋ قويىلاتىنى تۋرالى دا ەسكەرتىلدى.
ورال اپتالىعى جازعانداي، باتىس قازاقستان وبلىسىندا قازىر تەك اكىمشىلىك ورتالىقتى عانا ەمەس، شاعىن ەلدى مەكەندەر دە سۋعا باتىپ جاتىر. ونىڭ ۇستىنە ونداعى جاعداي «ساعات سايىن كۇردەلەنە تۇسۋدە». تەرەكتى، قاراتوبە، كازتالوۆ اۋداندارىنداعى اۋىلدارعا ەرىگەن قار سۋى كەلۋدە. توتەنشە جاعدايلار قىزمەتكەرلەرى سول جەردەن تۇرعىندار مەن مالداردى ەۆاكۋاتسيالاۋدا.
