قوستاناي وبلىسىنداعى امانگەلدى اۋىلى سۋ استىندا قالدى، دەپ حابارلايدى "ادىرنا" پورتالى توبىل ينفوعا سىلتەپ.
«قوستاناي وبلىسىنا ۇلكەن سۋ ەكپىنى كەلدى. 25 ناۋرىزدا ارقالىقتىڭ ەلدى مەكەندەرىندە العاشقى سۋ تاسقىنى تىركەلدى. 26 ناۋرىزدا امانگەلدى اۋىلىندا كۇردەلى جاعداي تۋىندادى»، - دەلىنگەن حابارلامادا.
ولاردىڭ ايتۋىنشا، وقيعا ورنىندا 18-گە جۋىق قۇتقارۋشى جۇمىس ىستەپ جاتىر، بىراق ولاردىڭ كۇشى جەتپەۋدە. تۇرعىنداردىڭ ايتۋىنشا، جەرگىلىكتى بيلىك سۋ تاسقىنىنا دايىن بولماعان.
جەرگىلىكتى تۇرعىنداردىڭ ايتۋىنشا، ۇيلەرگە سۋ كىرىپ، مالعا قاۋىپ ءتونىپ تۇر. سۋ تاسقىنىنىڭ العاشقى قۇرباندارى – ۇساق قوزىلار. ال ادامدار مۇلىكتەرى ءۇشىن الاڭداۋلى.
«ادامدار دۇربەلەڭ سالۋدا! بيلىك سۋ تاسقىنىنا توتەپ بەرە المايدى! ورتالىقتا سەيفۋلين كوشەسىنىڭ ءبارىن سۋ باستى، ول جاقتا ەكى مەكتەپ بار»، - دەيدى جەرگىلىكتى تۇرعىندار.
