ماسك جوبالارىنىڭ ىشىندەگى ەڭ مىقتىلارىنىڭ ءبىرى - Starlink. جالپى سانى 12 مىڭعا جۋىق، ءاربىرى 227كگ تارتاتىن سپۋتنيكتى عارىشقا شىعارادى. عارىشتىڭ 3 دەڭگەيىندە ورنالاستىرىپ، جەردەگى "SpaceX" كومپانياسىنىڭ روۋتەرلەرىنە سەكۋندىنا 1 گب جىلدامدىقتاعى ينتەرنەت بەرىلەدى. قازىرگى قولدانىستاعى ينتەرنەتكە قاراعاندا بۇل وتە جىلدام بولماق.
ەڭ قىزىعى، جوبا ىسكە اسسا الەمدە ينتەرنەت ۇستامايتىن جەر قالمايدى. تاۋ، ساي، مۇحيت، ارال مەن اۋىل دەمەي، يلون ماسكتىڭ ينتەرنەتىن قولدانا الاسىز. ءبىزدىڭ اۋىلدارعا جەتپەي جاتقان قازاق ۇلتىنىڭ ينتەرنەت ماسەلەسىن يلون ماسك شەشىپ بەرەمىن دەيدى.
ينتەرنەت نارىعىنان كەلىپ تۇسكەن قارجى ميللياردتاعان تابىس اكەلەدى. دۇرىس. ەڭبەگىنىڭ جەمىسى. ماسەلەنىڭ ەكىنشى جاعى دا بار. الگى قارجىنى يلون ماسك مارسقا ادام جىبەرۋ ءۇشىن تەحنولوگيا جاساۋدا پايدالانادى. ەگەر Starlink ءساتتى ىسكە اسسا، بۇل سپۋتنيكتەر مارسقا دا ينتەرنەت تاراتۋ ماقساتىندا، ەكى پلانەتا اراسىندا بايلانىس ورناتۋدا قولدانىلادى.
باۋىرجان سەرىكباەۆ،
"ادىرنا" ۇلتتىق پورتالى
