وزبەكستان 6U فورماتىنداعى «مىرزا ۇلىقبەك» جاساندى عىلىمي سپۋتنيگىن قۇرۋ ءۇشىن ينجەنەرلىك كادرلاردى دايىنداۋدى باستادى، دەپ حابارلايدى "ادىرنا" ۇلتتىق پورتالى فەرعاناعا سىلتەپ.
سپۋتنيكتى 2028 جىلى ۇشىرۋ جوسپارلانىپ وتىر. سونىمەن قاتار رەسپۋبليكا العاشقى وتاندىق عارىشكەردى دايارلاۋدى قولعا الدى. بۇل تاپسىرمانى ەل پرەزيدەنتى شاۆكات ميرزيوەۆ ستراتەگيالىق ماڭىزدى جوبا رەتىندە اتاپ ءوتتى.
جيىندا ەل باسشىسى قازىرگى الەمدە ەكونوميكالىق كۇش تابيعي رەسۋرستارمەن ەمەس، ينتەللەكتۋالدى الەۋەت پەن تەحنولوگيالارمەن ولشەنەتىنىن اتاپ ءوتتى. عارىشتىق زەرتتەۋلەر ستراتەگيالىق ماڭىزدى باعىتتاردىڭ ءبىرى سانالادى.
قىسقا ۋاقىت ىشىندە وزبەكستان عارىشتىق دەرەكتەردى قولدانۋدا ايتارلىقتاي جەتىستىكتەرگە جەتتى. ەلدە مەملەكەتتىك عارىشتىق مونيتورينگ جۇيەسى ەنگىزىلگەن. مامانداردىڭ ايتۋىنشا، قاشىقتىقتان زوندتاۋ دەرەكتەرىنە سۇرانىس ءۇش ەسە ارتقان، قازىر جۇيەمەن 10-نان استام مەملەكەتتىك مەكەمە جانە بارلىق وبلىستىق اكىمدىكتەر جۇمىس ىستەيدى.
جوبانىڭ ماڭىزدى بولىگى – ۇلتتىق جۇيەنى تۇراقتى دامىتۋ. بۇل سپۋتنيكتەردى باسقارۋ، دەرەكتەردى وڭدەۋ جانە پراكتيكالىق قولدانۋ ينفراقۇرىلىمىن قالىپتاستىرۋعا باعىتتالعان. سپۋتنيك جوباسىن جۇزەگە اسىرۋ ءۇشىن شەتەلدىك تاجىريبە زەرتتەلىپ، تەحنيكالىق تالاپتار انىقتالعان.
