تۇركيا الەمدە العاش بولىپ عارىشتا گيبريدتى قوزعالتقىشتى ىسكە قوسقان ەل اتاندى. بۇل تۋرالى Baykar توبىنا قاراستى Fergani Uzay كومپانياسى مالىمدەدى، دەپ حابارلايدى "ادىرنا".
كومپانيا مالىمەتىنشە، ءوز قاراجاتى ەسەبىنەن جاسالعان FGN-TUG-S01 وربيتالىق بۋكسيرى 6 جەلتوقساندا نەگىزگى گيبريدتى قوزعالتقىشتى قوسۋ ارقىلى ماڭىزدى مانەۆردى ورىنداعان. قوزعالتقىشتىڭ جۇمىس ىستەۋ ۋاقىتى 35 سەكۋندقا سوزىلىپ، وپەراتسيا تولىقتاي جوسپارعا ساي جۇزەگە اسقان.
Fergani Uzay وكىلدەرى بۇل جەتىستىك تەك تۇركيانىڭ عانا ەمەس، بۇكىل الەمدىك عارىش يندۋسترياسىنىڭ دامۋىنا سەرپىن بەرەتىن وقيعا ەكەنىن اتاپ ءوتتى. ويتكەنى گيبريدتى قوزعالتقىشتىڭ عارىشتا ىسكە قوسىلۋى – جوعارى تەحنولوگيالىق مۇمكىندىكتى دالەلدەيتىن اسا كۇردەلى سىناق.
ءساتتى مانەۆردەن كەيىن وربيتالىق بۋكسير ميسسيانىڭ كەلەسى كەزەڭىنە ءوتىپ، CubeSat شاعىن سپۋتنيگىن اجىراتۋ مىندەتىن ورىندادى. بۇل پروتسەسس تە ەشقانداي اۋىتقۋسىز، ءمىنسىز جۇرگىزىلگەن.
كومپانيانىڭ ايتۋىنشا، ميسسيا ناتيجەلەرى بولاشاقتا ىسكە اسىرىلۋى جوسپارلانعان "ۋلۋگبەك" عالامدىق پوزيتسيالاۋ جۇيەسىنە قاجەتتى تەحنولوگيالىق بازانى قالىپتاستىرادى. بۇل ينفراقۇرىلىم تۇركياعا بولاشاقتا ءارتۇرلى وربيتالارعا سپۋتنيكتەر توپتاماسىن ءوز كۇشىمەن شىعارۋ مۇمكىندىگىن بەرەدى.
Fergani Uzay بۇل جەتىستىك ەلدىڭ عارىش سالاسىنداعى امبيتسياسىن كۇشەيتىپ، حالىقارالىق ارەناداعى عىلىمي-تەحنيكالىق بەدەلىن ارتتىرعانىن اتاپ ءوتتى.
