ورالدىق زەينەتكەر ءمانسيا جاقىپوۆا ءوزىنىڭ ءتىرى ەكەنىن دالەلدەدى. ءالىپتىڭ ارتىن باقساق، قاريا 10 جىل بويى ولگەندەردىڭ تىزىمىندە جۇرگەن. بىراق زەينەتاقىسىن ۋاقىتىندا الىپ كەلگەن. جۋىردا عانا الاشاعى تۇسپەگەن سوڭ، بانككە بارىپ ءمان-جايعا قانىعىپتى. بيىل جەتپىس بىرگە تولعان قاريا ءدىن امان، ءتىپتى تالايدى باۋداي تۇسىرگەن كوروناۆيرۋس دەرتىمەن دە اۋىرىپ ۇلگىرگەن. تىرىلەردىڭ تىزىمىنە قايتا قوسىلۋعا تىرمىسقان ورالدىق تۇرعىن تۋرالى كەلەسى بەينەماتەريالدا. بۇل تۋرالى "ادىرنا" ۇلتتىق پورتالى استانا ارناسىنا سىلتەمە جاساپ حابارلايدى.
ورال قالاسىنىڭ تۇرعىنى ءمانسيا جاقىپوۆا زەينەتاقىسى بىرنەشە كۇنگە كەشىككەن سوڭ، ءمان-جايدى ءبىلۋ ءۇشىن بانككە بارعان. ونداعىلار ماردىمدى جاۋاپ ايتا الماي، ءبىراز اۋرە-سارساڭعا تۇسەدى. كەيىن ءوزىنىڭ دۇنيە سالعانى تۋرالى قارالى حاباردى ەستىپتى.
ءمانسيا جاقىپوۆا، زەينەتكەر:
كۋالىگىمدى قىزدار قارادى دا، 2-ءشى قاباتقا كوتەرىلىپ كەتتى. سوسىن ماعان ۆىپيسكا اكەلدى دە: اپا، ۆى سپيسكە ۋمەرشيح»، – دەدى. مەن ايتتىم: «قالاي ۋمەرشي؟ يا جە پەرەد ۆامي ستويۋ! سپراۆكا و سمەرتي كىم بەردى سەندەرگە؟» دەدىم. كۋالىگىم وزىمدە، ادەتتە قايتقان كىسىلەردىڭ كۋالىگىن الىپ قويادى عوي.
71 جاستاعى زەينەتكەر قاعاز جۇزىندە، 2011 جىلى دۇنيە سالىپتى. بىراق نەدەن قايتىس بولعانى بەلگىسىز. جەكە تۇلعالاردىڭ دەرەكتەرى جيناقتالعان بازاداعى مالىمەت وسىنداي. دەيتۇرعانمەن سودان بەرى قاريانىڭ زەينەتاقىنى قالاي الىپ كەلگەنى دە بەلگىسىز. مۇنى جاۋاپتىلار دا تۇسىندىرە الار ەمەس. دەگەنمەن كوشى-قون ماماندارى «بۇعان ءبىز كىنالى ەمەسپىز» دەيدى.
قانات مۇقانوۆ، ورال ق. پب كوشى-قون قىزمەتى ءبولىمىنىڭ باستىعى:
2005-2011 جىلدارى ازاماتتاردى تىركەۋ ىسىمەن ورال قالالىق ادىلەت دەپارتامەنتى اينالىستى. ءمانسيا جاقىپوۆا سول 2011 جىلى قايتىس بولعان. سودان بەرى ول ولگەندەردىڭ تىزىمىندە. بىراق ءىس جۇزىندە ءوزى ءتىرى، ورال قالاسىندا تۇرادى، ەش كەدەرگىسىز زەينەتاقىسىن دا الىپ كەلگەن. بۇعان ءبىزدىڭ قاتىسىمىز جوق.
اسقار قوجۋموۆ، «ازاماتتارعا ارنالعان ۇكىمەت» مەملەكەتتىك كورپوراتسياسى كوممەرتسيالىق ەمەس اق بقو فيليالى ديرەكتورىنىڭ ورىنباسارى:
ءبىزدىڭ مامانداردىڭ ءتىپتى قاتىسى جوق. پەنسياسىن توقتاتتى، كەلەسى كۇنى كەلدى. قىزدار ءتۇسىندىرىپ ايتتى. ميگراتسيا بىزگە ءتىرى دەپ حات جازىپ بەردى. «دوكۋمەنتتەرى دۇرىس، فاكتى سمەرتي نە يمەەتسيا» دەپ. سول حات بويىنشا بۇل كىسىنىڭ شوتىنا بۇكىل پەنسياسى بازالىق زەينەتاقىسى، بۇكىل الاتىن اقشاسى تۇگەل ءتۇستى.
جاۋاپتى ورگانداردىڭ تابالدىرىعىن توزدىرعان زەينەتكەر ءتىرى ەكەنىن اقىرى دالەلدەپتى. ەندى ونى ەكى كۇننەن كەيىن تىرىلەردىڭ قاعازداعى قاتارىنا قوسپاق. ال ءتىرى ادامدى ءولدى دەپ قاتەلەسكەندەردىڭ ۇستىنەن، ەندى قىزمەتتىك تەكسەرۋ جۇرگىزىلمەك. ال، قاريا دەنساۋلىعى دا جوق ەكەنىن ايتىپ، ارىزدانۋدان باس تارتىپ وتىر.
ەركىن كارين، ءتىلشى:
كوشى-قون ماماندار مۇنداي جاعدايدىڭ قازىر تاڭسىق ەمەس ەكەنىن ايتادى. مىسالى، 2010 جىلى دا ورال تۇرعىنى قاعاز جۇزىندە كوز جۇمىپتى. كەيىن قۇجاتتارى قايتا راسىمدەلىپ، تىرىلەردىڭ تىزىمىنە قوسىلعان. دەمەك، قۇجاتتاعى قاتەدەن الدە بازاداعى اقاۋدىڭ كەسىرىنەن ءالى قانشا ءتىرى جاننىڭ ولگەندەر ساناتىندا جۇرگەنى بەلگىسىز.
