فوتو: istockphoto
قازاقستاندا تۇرۋعا ىقتيارحاتى جوق شەتەل ازاماتتارىنا بانك شوتىن اشۋ جانە كارتا راسىمدەۋ ءتارتىبى جەڭىلدەتىلدى. قارجى نارىعىن رەتتەۋ جانە دامىتۋ اگەنتتىگى بانكتەردىڭ ىشكى باقىلاۋ قاعيدالارىنا ءتيىستى وزگەرىستەر ەنگىزدى, دەپ حابارلايدى "ادىرنا".
18 قىركۇيەكتە جاريالانعان قۇجاتقا سايكەس، قازاقستاندا تۇرۋعا ىقتيارحاتى نەمەسە تۇراقتى تۇرۋعا رۇقساتى جوق رەزيدەنت ەمەس تۇلعالار جوعارى تاۋەكەلدى كليەنتتەر ساناتىنان شىعارىلدى.
وسىعان بايلانىستى شەتەل ازاماتتارى شوت نەمەسە كارتا اشقان كەزدە بۇرىنعىداي قوسىمشا تەكسەرۋلەردەن وتۋگە مىندەتتى ەمەس. بانكتەر ەندى ولاردان قازاقستاندا بولۋ ماقساتى، شوت اشۋ سەبەبى، قاراجات كوزى، حالىقارالىق اۋدارىمدار جانە باسقا بانكتەردەگى شوتتارى تۋرالى كەڭەيتىلگەن ساۋالناما تالاپ ەتپەيدى.
سونىمەن قاتار تەلەفوننىڭ IMEI ءنومىرىن مىندەتتى تۇردە تەكسەرۋ تالابى دا الىنىپ تاستالدى. ەندى بانك كليەنتتىڭ جەكە باسىن كۋالاندىراتىن قۇجاتىن تەكسەرىپ، بيومەتريالىق سايكەستەندىرۋ جۇرگىزەدى.
ەگەر كليەنت جوعارى تاۋەكەل توبىنا جاتقىزىلسا نەمەسە الاياقتىق بەلگىلەرى بايقالسا، بانك قوسىمشا قۇجاتتار سۇراتىپ، كۇشەيتىلگەن تەكسەرۋ جۇرگىزە الادى.
رەزيدەنت ەمەس تۇلعالارعا بەرىلەتىن بانك كارتاسىنىڭ ەڭ ۇزاق قولدانىلۋ مەرزىمى وزگەرگەن جوق — 12 ايعا دەيىن.
بۇعان دەيىن، 2025 جىلدىڭ باسىندا، قازاقستاندا رەزيدەنت ەمەس تۇلعالارعا بانك كارتاسىن بەرۋ تالاپتارى قاتاڭداتىلىپ، ولاردىڭ قولدانىلۋ مەرزىمى ءبىر جىلمەن شەكتەلگەن بولاتىن. ەنگىزىلگەن جاڭا وزگەرىستەر شەتەل ازاماتتارىنىڭ قازاقستانداعى بانك قىزمەتتەرىن پايدالانۋ كەزىندەگى بىرقاتار بيۋروكراتيالىق تالاپتاردى جەڭىلدەتەدى.
