سوپى قۇربانالى جاپپاي جيھادقا شىعۋعا شاقىردى. ونىڭ بۇل ۆيدەو-ۇندەۋى الەۋمەتتىك جەلىلەردە شارلاپ كەتتى.
"باتىسقا ءتان ءومىر-سالتىن بىزگە تىقپالاۋدىڭ قاجەتى جوق. ءبىز بۇل زاڭنىڭ استارىندا نە جاتقانىن جاقسى بىلەمىز. ول - ۇلتسىزدانۋ; ول - تاجالدىڭ جەتەگىندە كەتۋ. تاجال قازىر كەمەرىنە كەلدى. الەمدىك جاhاندانۋ - تاجالعا ءتان جالعىز كوز. ەركەكتىك تەكەلى بەينە مەن ايەلدىك ەمشەك - تاجالدىڭ بولمىسى. سوندىقتان دا مەن تاجالعا قارسى جيhاد جاريالايمىن. ەگەر كىم دە بولسىن تاجالعا كومەك قولىن سوزسا، ونىڭ جەتى اتاسىنا دەيىن يمانى كۇيىپ، ءوزى توزاققا تۇسەدى. تاجالدىڭ ءبىر قولىندا ءجاننات، ەكىنشى قولىندا توزاق بولادى. ونىڭ ءجانناتىنا الدانعاندار توزاقتىق بولسا، توزاعىنا تۇسكەندەر جانناتتىق بولادى. سوندىقتان دا ءبىز تاجالعا قارسى كۇرەستەن باس تارتپايمىز.
قازىر الەمدىك دەڭگەيدە تاجالدىڭ بيلىگى سالتانات قۇرۋدا. سوندىقتان قازاق بيلىگىنىڭ تىزگىنىن ۇستاعان ەر-ازاماتتار، تاجالدىڭ جەتەگىندە كەتپەي، حالىققا قاراي بۇرىلىڭىزدار!
-دەپ، سوپى قۇربانالى احمەتوۆ جيھاد جاريالادى.
ەگەر قازاق بيلىگى شىنىمەن زايىرلى-قۇقىقتىق مەملەكەت بولسا، قۇربانالى احمەتوۆ سياقتى دىنشىلگە ەكىجۇزدى ستاندارت ساياساتىن قولدانباي، زاڭ بويىنشا ءتيىستى باعاسىن بەرۋى ءتيىس.
مىسالى، ءداستۇرلى يسلام تۇسىنىگىندە (قۇراندا جوق) تاجال-ءداججال دەگەن ۇلكەن بيلىكتىڭ يەسى بولاتىن ياھۋدي ەر ادام. زاماننىڭ اقىرىندا شىعىپ، جەر بەتىندەگى ەڭ ۇلكەن سىناق (فيتنا) بولادى. ول ءوزىن العاشقىدا پايعامبارمىن دەپ، سودان كەيىن قۇداي ەكەنىن ايتادى. وعان ناداندار مەن قاراپايىم حالىق ارتىنان ەرىپ، وعان اللا تۋرا جولعا سالعان ساليحالار مەن تاقۋالار قارسى تۇرادى. ول بىردە-ءبىر قالانى قالدىرماي بارلىق جەردى شارلاپ شىعادى، تەك مەككە مەن مەدينە قالاسىنا جولامايدى، ياعني ءداججال ءماريام ۇلى يسانىڭ قولىنان قازا تابادى دەلىنگەن.
مەنىڭشە، "وتباسىلىق-تۇرمىستىق زورلىق-زومبىلىققا قارسى ءىس-قيمىل" تۋرالى زاڭداعى كەيبىر ولقىلىقتارعا بايلانىستى بيلىك ءدىني توپتارعا "مەدۆەجيا ۋسلۋگا" جاساماي تەز ارادا تۇزەتۋ ەنگىزسە دۇرىس بولار ەدى. وكىنىشكە وراي زاڭنىڭ سولقىلداق تۇستارىن دىنشىلدەر، اسىرەسە ءدىني باعىتتاعى شۇكىر-تاۋبەشىل انشىلەر مەن اقىندار ءوز پايداسىنا وتە جاقسى پايدالانىپ وتىر.
قورىتا ايتقاندا، قوعامدا ايقاي-شۋ تۋعىزعان "وتباسىلىق-تۇرمىستىق زورلىق-زومبىلىققا قارسى ءىس-قيمىل" تۋرالى زاڭعا شۇيلىگىپ جاتىرعان ءدۇيىم حالىقتىڭ كوبى ءدىني ساناداعى توپتار ەكەنى بەلگىلى بولدى.
تۇراربەك قۇسايىنوۆ،
"دەموس" قب توراعاسى
(اۆتوردىڭ كوزقاراسى رەداكتسيا كوزقاراسىن بىلدىرمەيدى. "ادىرنا" ۇلتتىق پورتالى اشىق اقپارات الاڭى بولعان سەبەپتى، قارسى تاراپتىڭ دا ماتەريالىن شىعارۋعا ءازىر)
