رەسەي فەدەراتسياسى كەڭەسى پرەزيدەنتتىڭ ەل قارۋلى كۇشتەرىن شەتەلدە پايدالانۋ وكىلەتىن كەڭەيتەتىن زاڭدى ماقۇلدادى. زاڭ 20 مامىر كۇنى وتكەن وتىرىستا قابىلداندى، دەپ حابارلايدى "ادىرنا" پورتالى DW سايتىنا سىلتەپ.
بۇعان دەيىن قۇجاتتى رەسەي مەملەكەتتىك دۋماسى ءبىراۋىزدان قولداعان بولاتىن. جاڭا زاڭعا سايكەس، رەسەي پرەزيدەنتى ەل ازاماتتارىن شەتەلدە قورعاۋ ماقساتىندا قارۋلى كۇشتەردى قولدانا الادى. اتاپ ايتقاندا، قۇجاتتا رەسەيلىكتەردىڭ شەتەلدە قاماۋعا الىنۋى، ۇستالىپ تۇرۋى نەمەسە قىلمىستىق جانە وزگە دە قۋدالاۋعا ۇشىراۋى جاعدايلارى كورسەتىلگەن.
زاڭ جوباسى «ازاماتتىق تۋرالى» جانە «قورعانىس تۋرالى» فەدەرالدىق زاڭدارعا تۇزەتۋلەر ەنگىزەدى. تۇسىندىرمە جازبادا بۇل وزگەرىستەر رەسەي مويىندامايتىن حالىقارالىق سوتتار مەن رەسەيدىڭ قاتىسۋىنسىز ارەكەت ەتەتىن حالىقارالىق سوت ورگاندارىنىڭ شەشىمدەرىنە بايلانىستى قابىلدانىپ وتىرعانى ايتىلعان.
فەدەراتسيا كەڭەسىنىڭ قورعانىس جانە قاۋىپسىزدىك كوميتەتى جاڭا زاڭ پرەزيدەنتكە رەسەي ازاماتتارىن قورعاۋ ءۇشىن قارۋلى كۇشتەردى قارۋ-جاراقپەن بىرگە قولدانۋ قۇقىعىن بەرەتىنىن مالىمدەدى. سونىمەن قاتار شەتەلدەگى رەسەيلىكتەردى قورعاۋ بويىنشا «قاجەتتى شارالاردى» مەملەكەتتىك ورگاندار دا ءوز قۇزىرەتى اياسىندا جۇزەگە اسىرا الادى.
ساراپشىلار بۇل شەشىمدى سوڭعى ۋاقىتتا ناتو ەلدەرى تاراپىنان ايتىلعان مالىمدەمەلەرمەن بايلانىستىرادى. بىرقاتار باتىس ەلدەرى كرەملدىڭ ەۋروپاداعى ىقتيمال اسكەري قاقتىعىسقا دايىندالىپ جاتقانى تۋرالى الاڭداۋشىلىق بىلدىرگەن.
2026 جىلدىڭ ناۋرىز ايىندا اقش بارلاۋ قىزمەتى رەسەي ۋكرايناداعى سوعىستى سانالى تۇردە ۋشىقتىرىپ، ناتو-مەن تىكەلەي قاقتىعىسقا دەيىن بارۋى مۇمكىن ەكەنىن ەسكەرتكەن بولاتىن.
ال نيدەرلاند بارلاۋ قىزمەتىنىڭ باعالاۋىنشا، رەسەيگە ناتو قاتىسۋى مۇمكىن ايماقتىق قاقتىعىسقا دايىندالۋ ءۇشىن شامامەن ءبىر جىل قاجەت. بارلاۋ مالىمەتتەرىندە كرەملدىڭ نەگىزگى ماقساتى اسكەري جەڭىس ەمەس، اليانس ىشىندە ساياسي جىك تۋعىزۋ بولۋى ىقتيمال ەكەنى ايتىلعان. سونداي-اق رەسەي يادرولىق قىسىم كورسەتۋ ءتاسىلىن قولدانۋى مۇمكىن دەگەن بولجام دا جوققا شىعارىلمايدى.
ايتا كەتسەك، بۇل زاڭدى مەملەكەتتىك دۋما ءۇشىنشى وقىلىمدا قابىلداعان بولاتىن.
زاڭنامالىق باستامانى 381 دەپۋتات (84,7%) قولدادى. قالىس قالعاندار دا، قارسى داۋىس بەرگەندەر دە بولماعان.
