Sopy Qurbanáli jappaı jıhadqa shyǵýǵa shaqyrdy. Onyń bul vıdeo-úndeýi áleýmettik jelilerde sharlap ketti.
"Batysqa tán ómir-saltyn bizge tyqpalaýdyń qajeti joq. Biz bul zańnyń astarynda ne jatqanyn jaqsy bilemiz. Ol - ultsyzdaný; Ol - Tajaldyń jeteginde ketý. Tajal qazir kemerine keldi. Álemdik jahandaný - Tajalǵa tán jalǵyz kóz. Erkektik tekeli beıne men áıeldik emshek - Tajaldyń bolmysy. Sondyqtan da men Tajalǵa qarsy jıhad jarııalaımyn. Eger kim de bolsyn Tajalǵa kómek qolyn sozsa, onyń jeti atasyna deıin ımany kúıip, ózi tozaqqa túsedi. Tajaldyń bir qolynda jánnat, ekinshi qolynda tozaq bolady. Onyń jánnatyna aldanǵandar tozaqtyq bolsa, tozaǵyna túskender jánnattyq bolady. Sondyqtan da biz Tajalǵa qarsy kúresten bas tartpaımyz.
Qazir álemdik deńgeıde Tajaldyń bıligi saltanat qurýda. Sondyqtan qazaq bıliginiń tizginin ustaǵan er-azamattar, Tajaldyń jeteginde ketpeı, halyqqa qaraı burylyńyzdar!
-dep, sopy Qurbanáli Ahmetov jıhad jarııalady.
Eger Qazaq bıligi shynymen zaıyrly-quqyqtyq memleket bolsa, Qurbanáli Ahmetov sııaqty dinshilge ekijúzdi standart saıasatyn qoldanbaı, zań boıynsha tıisti baǵasyn berýi tıis.
Mysaly, dástúrli Islam túsiniginde (Quranda joq) Tajal-Dájjál degen úlken bıliktiń ıesi bolatyn ıahýdı er adam. Zamannyń aqyrynda shyǵyp, jer betindegi eń úlken synaq (fıtna) bolady. Ol ózin alǵashqyda paıǵambarmyn dep, sodan keıin Qudaı ekenin aıtady. Oǵan nadandar men qarapaıym halyq artynan erip, oǵan Alla týra jolǵa salǵan salıhalar men taqýalar qarsy turady. Ol birde-bir qalany qaldyrmaı barlyq jerdi sharlap shyǵady, tek Mekke men Medıne qalasyna jolamaıdy, ıaǵnı dájjál Márııam uly Isanyń qolynan qaza tabady delingen.
Menińshe, "otbasylyq-turmystyq zorlyq-zombylyqqa qarsy is-qımyl" týraly zańdaǵy keıbir olqylyqtarǵa baılanysty bılik dinı toptarǵa "medvejıa ýslýga" jasamaı tez arada túzetý engizse durys bolar edi. Ókinishke oraı zańnyń solqyldaq tustaryn dinshilder, ásirese dinı baǵyttaǵy shúkir-táýbeshil ánshiler men aqyndar óz paıdasyna óte jaqsy paıdalanyp otyr.
Qoryta aıtqanda, qoǵamda aıqaı-shý týǵyzǵan "otbasylyq-turmystyq zorlyq-zombylyqqa qarsy is-qımyl" týraly zańǵa shúıligip jatyrǵan dúıim halyqtyń kóbi dinı sanadaǵy toptar ekeni belgili boldy.
Turarbek QUSAIYNOV,
"Demos" QB tóraǵasy
(Avtordyń kózqarasy redakııa kózqarasyn bildirmeıdi. "Adyrna" ulttyq portaly ashyq aqparat alańy bolǵan sebepti, qarsy taraptyń da materıalyn shyǵarýǵa ázir)
