ۇلتارالىق ارازدىقتى قوزدىردى دەپ ايىپتالعان ەرمەك نارىمباەۆتىڭ جازاسى جەڭىلدەتىلدى، - دەپ حابارلايدى "ادىرنا" ءتىلشىسى قوناەۆ سوتىنىڭ ءباسپاسوز قىزمەتىنە سىلتەمە جاساپ.
سوت قىلمىستىق كودەكستىڭ 174-بابىنىڭ 1-بولىگى («ۇلتارالىق ارازدىقتى قوزدىرۋ») بويىنشا كولونيادا جازاسىن وتەپ جاتقان سوتتالۋشى نارىمباەۆتىڭ جازانىڭ وتەلمەگەن بولىگىن جازانىڭ نەعۇرلىم جەڭىل تۇرىمەن اۋىستىرۋ تۋرالى ءوتىنىشىن قارادى.
ايتۋلارىنشا، پروكۋرور سوتتالۋشىنىڭ ءوتىنىشىن قاناعاتتاندىرۋدى سۇراعان.
"مەرزىمىنەن بۇرىن بوساپ، 11 ايعا جۋىق پروباتسيالىق باقىلاۋدا بولاتىن بولدى. ءبىز ايىپپۇل تولەپ شىعارۋدى سۇرادىق. بىراق پروكۋرور پروباتسيالىق باقىلاۋ قاجەت ەكەنىن ايتتى. سۋديا پروكۋرورمەن كەلىسىپ، قاتاڭ شەكتەۋمەن شىعارۋعا كەلىستى. ءباسپاسوز ماسليحاتى، ميتينگ پەن شەرۋ سياقتى قوعامدىق ىستەرگە قاتىسۋعا تىيىم سالدى" - دەدى ادۆوكات جانار بالعاباەۆا.
ادۆوكاتتىڭ سوزىنشە، پروكۋراتۋرا قارسىلىق بىلدىرمەسە، 15 تاۋلىكتەن كەيىن ەرمەك نارىمباەۆ تۇرمەدەن شىعۋعا ءتيىس.
سوت ۇكىمىمەن ەرمەك نارىمباەۆقا ماتەريالدىق زالال جوق ەكەنى، ول وندىرىلگەن 6 729 تەڭگە كولەمىندەگى پروتسەسسۋالدىق شىعىنداردى ەرىكتى تۇردە وتەگەنى اتاپ ءوتىلدى.
«سوتتالعان ن.-عا قاتىستى سوت شەشىمىمەن باس بوستاندىعىنان ايىرۋ جازاسىنىڭ شەشىم زاڭدى كۇشىنە ەنگەننەن كەيىن 11 اي 8 كۇن وتكەن سوڭ وتەلمەگەن بولىگى باس بوستاندىعىن شەكتەۋ تۇرىندەگى جازانىڭ نەعۇرلىم جەڭىل تۇرىمەن اۋىستىرىلدى. قاۋلى زاڭدى كۇشىنە ەنگەن جوق»، - دەپ حابارلادى ەرمەك نارمىباەۆتىڭ ءوتىنىشحاتى قارالعان قوناەۆ سوتىنىڭ ءباسپاسوز قىزمەتىنەن.
ەسكە سالايىق، 2022 جىلدىڭ اقپانىندا ۇلتارالىق ارازدىق تۋدىرعانى ءۇشىن سوتتالعان ەرمەك نارىمباەۆ الماتى اۋەجايىندا ۇستالعان بولاتىن. ونى كيەۆتەن كەلگەن سوڭ الماتى حالىقارالىق اۋەجايىندا جول پوليتسياسى قاماۋعا الدى. بۇعان دەيىن ول ىزدەۋدە بولعان.
نارىمباەۆ سوت ۇكىمى بويىنشا قازاقستان رەسپۋبليكاسى قىلمىستىق كودەكسىنىڭ 174-بابى «الەۋمەتتىك، ۇلتتىق، رۋلىق، ناسىلدىك، تاپتىق نەمەسە ءدىني ارازدىقتى قوزدىرۋ» بويىنشا باس بوستاندىعىنان ايىرۋ جازاسىن قولدانۋمەن ايىپتالعان بولاتىن.
"ادىرنا" ۇلتتىق پورتالى
ۇقساس جاڭالىقتار
