كەشەلى بەرى قازاق سپورت جانە تۋريزم اكادەمياسىنىڭ پرەزيدەنتى قايرات زاكيريانوۆتىڭ كابينەتىندەگى اڭ-قۇستاردىڭ تەرىسى مەن تۇلىبى تۋرالى الىپ-قاشپا اڭگىمە ءورشىپ تۇر.بۇل ايقاي-شۋدىڭ ارتىندا دەسترۋكتيۆتى ءدىني اعىمداردىڭ تۇرعانىنا ەش كۇمانىم جوق.
بەلگىلى ونەرتانۋشى ەرلان تولەۋتاي اعامىزدىڭ "وزبەكتىڭ بوكسىندا ءدىن جوق، رۋح بار. قازاقتىڭ سپورتىندا ءدىن بار، رۋح جوق. سپورت سالاسىن سالافيزم يدەولوگياسىنان تازالاماي، كوسەگەمىز كوگەرمەيدى" دەگەن سوزىمەن كەلىسەمىن.
اسىرەسە، كۇرەس، بوكس، ۇلتتىق ويىندار تاعى باسقا سپورت تۇرلەرى ۋاھابيتتەردىڭ قولىندا. ولار قازاق سپورتىن رۋحىنان ايىرۋدا.
تۇبەگەيلى شارالار قولدانباسا، قازاق سپورتىنىڭ بولاشاعى بۇلىڭعىر دەگەن ەرلان اعامىزدىڭ جانايقايىنا تولىقتاي قوسىلامىن. تۋريزم جانە سپورت اكادەمياسىنىڭ پرەزيدەنتى، فيزيكا-ماتەماتيكا عىلىمدارىنىڭ كانديداتى، پەداگوگيكا عىلىمىنىڭ دوكتورى قايرات زاكيريانوۆقا قارسى سالافيلەردىڭ تاراپىنان اقپاراتتىق شابۋىل نەگە ءدال قازىر باستالىپ وتىر؟
قازاق دالاسىنداعى اڭشىلىق داستۇرلەر ەرتە زامانداردا قالىپتاسىپ، كوشپەندىلەر تۇرمىسىندا بەكەم ورنىققان. تۇلپاردى تىزگىندەپ، تازىسىن ەرتكەن، بۇركىتتى قولىنا قوندىرعان كەشەگى اڭشى-ساياتشى كوشپەندىلەر دە، زاماناۋي قارۋ اسىنعان، كۇردەلى تاۋ اڭشىلىعىنا شىققان بۇگىنگىنىڭ مەرگەندەرى دە، قازاقستاندىقتار ءۇشىن - ناعىز ەرلىك پەن توزىمدىلىكتىڭ ۇلگىسى سانالادى. اتا-بابامىزدان قالعان سول اڭشىلىق ءداستۇردى جاڭعىرتىپ جۇرگەن قايرات اعامىزدىڭ "20 جىلدا كوپتەگەن ادام كابينەتىمدە وسى اڭداردىڭ تەرىسىمەن سۋرەتكە ءتۇستى. ۇزاق جىلدان بەرى تۇرعان تەرىلەردىڭ نەگە بۇگىن قوعام نازارىن اۋدارعانىنا تاڭىم بار؟" دەگەن ورىندى سۇراعىنا نە دەپ جاۋاپ بەرۋگە بولادى؟
بىرىنشىدەن، قايرات قايرۋللينۇلى تەگى تۇركى بابامىز شىڭعىسحان تۋرالى تالاي عىلىمي باعىتتا تاريحي ەڭبەكتەر (مونوگرافيا، كىتاپتار) جازعان ادام. ال دىنشىلدەر بولسا، شىڭعىسحان بابامىزدى "مۇسىلمانداردى"جاپپاي جويىپ-قىرعان ادام رەتىندە جەك كورەدى.
ەكىنشىدەن، پروفەسسور اعامىز سپورت سالاسىنداعى دەسترۋكتيۆتى ءدىني يدەولوگياعا ۋلانعان سپورتشىلارعا بايلانىستى ءارتۇرلى دوڭگەلەك ۇستەلدەر مەن مىنبەرلەردە ءدىني ءفاناتيزمنىڭ زاردابى تۋرالى اشىق ايتىپ جۇرگەن، بىردەن ءبىر جوعارى وقۋ ورنىنىڭ باسشىسى.
قوعامدا كەزدەيسوق ەشنارسە بولمايتىنى تۇسىنىكتى، سول ءۇشىن قايرات اعامىزعا سالافيلەردىڭ وسىنداي وسپادار ارەكەتىنە قايمىقپاي، جاستاردىڭ تەرىس اعىمداردىڭ جەتەگىندە كەتپەۋىنە اتسالىسىپ، قازاق ەلىنە قىزمەت جاساي بەرۋىنە تىلەكتەسپىن.
تۇراربەك قۇسايىنوۆ،
"دەموس" قب توراعاسى
