بۇگىن ماجىلىستەگى ۇكىمەت ساعاتىندا دەپۋتات ەدىل جاڭبىرشين مينيستر باعدات مۋسينگە وتكىر سۇراقتار قويىپ، ساستىردى. بۇل تۋرالى "ادىرنا" ۇلتتىق پورتالى جازادى.
"قۇرمەتتى، باعدات باتىربەكۇلى! ءسىز اسىقپاي-اپتىقپاي قىسقا جانە نۇسقا جاۋاپ بەرىڭىز. ءبىزدىڭ ۋاقىتىمىزدى الماڭىز. بۇل جەردە ەشكىم ويناپ وتىرعان جوق. سوندىقتان سىزدەرگە ناقتى سۇراق بەرەدى، ناقتى جاۋاپ بەرەڭىزدەر. نە زات مىناۋ؟ باسىڭ باستايسىز، اياعى جوق. كەلدىڭىزدەر مە پارلامەنتكە، دۇرىستاپ جاۋاپ بەرىڭىزدەر. ادامنىڭ باسىن اينالدىرماڭدار", - دەدى دەپۋتات.
دەپۋتاتتىڭ ايتۋىنشا، تۋريستىك نىسانداردا موبيلدىك بايلانىس جوقتىڭ قاسى.
"بىزدە بايلانىستى قاجەت ەتەتىن نىساندار بار. مىسالى تۋريستىك ينفروقۇرىلىمدار. قازىر ءوزىڭىز بىلەسىز. ءبىزدىڭ ەلىمىزدە تۋريستىك پوتوك كوپ. ونداي مارشرۋتتاردا ۆيزيت-ورتالىقتار سالىنىپ جاتىر. ءارتۇرلى قورىقتار مەن ۇلتتىق پاركتەر بار. ول جەرگە كوپتەگەن ادامدار بارادى. ال ەندى سول جەردەگى ماسەلە ۋشىعىپ تۇر. نەگە مەن مۇنى ايتىپ وتىرمىن؟ بۇل كوممەرتسيالىق جاعىنان ەمەس. جالپى ادامنىڭ قاۋىپسىزدىك ماسەلەسىنە بايلانىستى. ماشينا بۇزىلىپ قالۋى مۇمكىن. ادام اۋىرىپ قالۋى مۇمكىن. ءار ءتۇرلى جاعدايلار بولىپ قالۋى مۇمكىن. ول جەرلەردە بىزدە بايلانىس جوق. قازاقستان تۋريستىك ينفروقۇرىلىمىنا بايلانىستى قانداي جوسپارلارىڭىز بار؟ بايلانىسپەن قالاي قامتاماسىز ەتەيىن دەپ وتىرسىز؟ قانداي قاراجات ەسەبىنە جانە قانداي تەحنولوگيالار قولدانىلادى؟ جاقىندا ءسىز پرەمەر-مينيسترگە بايانداعان ۇلتتىق جوبادا وسى ايتىلعان ماسەلەلەر قامتىلعان با؟ ماعان ناقتى ايتىڭىز", - دەپ سۇرادى ەدىل جاڭبىرشين مينيستردەن.
مينيستر دەپۋتاتتىڭ سۇراقتارىنا تولىق جاۋاپ بەرە الماي، ابدەن ساستى.
"قامتىلعان. تۋريستىك نىساندار 2027 جىلعا دەيىن تولىعىمەن ينتەرنەتپەن قامتىلاتىن بولادى. ۇلتتىق جوبا تالقىلانىپ، بەكىتىلسە، قاراجات بولىنسە، تۋريستىك نىسانداردىڭ بارلىعى دا ينتەرنەتپەن قامتاماسىز ەتىلەتىن بولادى. ءاربىر جەردە ءارتۇرلى تەحنولوگيالار قولدانىلاتىن بولادى. كوبىنەسە 4G تەحنولوگياسى. ەگەر وعان دەيىن وپتيكا جەلىلەرى بارا المايتىن بولسا، سپۋتنيكتىك تەحنولوگيالار قوساتىن بولامىز. بۇنىڭ كوممەرتسيالىق كوزى بولماعاندىقتان بۇل شىعىنداردىڭ بارلىعى بيۋدجەت ەسەبەنىنەن قارجىلاندىرىلۋى ءتيىس", - دەپ قوبالجىدى مينيستر.
