"بارسەلونانىڭ" ارگەنتينالىق شابۋىلشىسى ليونەل مەسسي برازيليا قۇراماسىندا الەمنىڭ ءۇش دۇركىن چەمپيونى بولعان پەلەنىڭ ءبىر كلۋب ءۇشىن سوققان گولدارىنىڭ سانى بويىنشا جەتىستىگىن جاڭارتتى، - دەپ حابارلايدى "ادىرنا" ۇلتتىق پورتالى ريا نوۆوستي-گە سىلتەمە جاساپ.
مەسسي يسپانيا چەمپيوناتىنىڭ 15-تۋرىندا "ۆاليادوليداعا" قارسى ويىننىڭ 65-مينۋتىندا ەسەپتى 3:0-گە جەتكىزدى. بۇل وسى ويىنداعى سوڭعى گول بولدى. ەندى 33 جاستاعى ارگەنتينالىق فۋتبولشىنىڭ "بارسەلونا" ءۇشىن سوققان گولى 644-كە جەتتى. بۇل - جاڭا رەكورد.
مەسسي 2004 جىلدان بەرى "بارسەلونا" ساپىندا.
پەلە "سانتوس" كلۋبىندا 1956-1974 جىلدار ارالىعىندا ويناپ، 643 گول سوققان بولاتىن.
وسىعان بايلانىستى پەلە الەۋمەتتىك جەلى ارقىلى مەسسيدى قۇتتىقتاپ، ءبىر كوماندا ساپىندا ۇزاق جىل ويناپ، رەكورد جاسايتىندار قاتارى سيرەي بەرەتىنىن اتاپ ءوتتى.
