ساۋد ارابياسىنىڭ تاق مۇراگەرى مۇحاممەد يبن سالمان «بارسەلونا» فۋتبول كلۋبىن ساتىپ العىسى كەلەدى. بۇل تۋرالى El Chiringuito ءجۋرناليسى فرانسۋا گالياردو X الەۋمەتتىك جەلىسىندەگى پاراقشاسىندا جازدى، دەپ حابارلايدى «ادىرنا» ءتىلشىسى.
«مۇحاممەد يبن سالمان جاقىن ۋاقىتتا كلۋبتى ساتىپ الۋ جونىندە ۇسىنىس جاساۋعا دايىندالىپ جاتىر. مامىلەنىڭ قۇنى 10 ميلليارد ەۋروعا دەيىن جەتۋى مۇمكىن»،-دەلىنگەن حابارلامادا.
گالياردونىڭ ايتۋىنشا، كلۋبتىڭ ساتىلۋىنا پرەزيدەنتتى سايلاۋعا قاتىساتىن جانە كلۋبتى باسقارۋ ماسەلەلەرىندە داۋىس بەرۋ قۇقىعىنا يە سوسولار — كلۋب مۇشەلەرى كەدەرگى كەلتىرۋى مۇمكىن.
Goal مالىمەتىنشە، «بارسەلونانى» ساتىپ الۋدى ساۋد ارابياسىنىڭ مەملەكەتتىك ينۆەستيتسيالىق قورى قارجىلاندىرۋى ىقتيمال. قازىرگى تاڭدا كلۋبتىڭ قارىزى 2,5 ميلليارد ەۋرونى قۇرايدى.
مۇحاممەد يبن سالمان ساۋد ارابياسىنىڭ مەملەكەتتىك ينۆەستيتسيالىق قورىن باسقارادى. 2021 جىلى بۇل قور انگليانىڭ «نيۋكاسل» كلۋبىن ساتىپ العان. كلۋبتىڭ نومينالدى يەسى رەتىندە تاق مۇراگەرى تىركەلگەن.
«بارسەلونا» – 1899 جىلى قۇرىلعان يسپانياداعى ەڭ كوپ تيتۋلعا يە فۋتبول كلۋب.
