م.اۋەزوۆ اتىنداعى قازاق مەملەكەتتىك اكادەميالىق دراما تەاترى 91-ءشى ماۋسىمىن اشتى. كەزەكتى دەمالىسىنان كەيىن قالىڭ كورەرمەندەرىمەن قاۋىشۋعا اسىققان تەاتر ۇجىمىنىڭ جاڭالىقتارى جەتەرلىك.
تەاتر باسشىلىعى جىل سايىنعى داستۇرگە ساي وتكەن ماۋسىمىن قورتىندىلاپ، الداعى جوسپارلارىمەن ءبولىسۋ ءۇشىن باق وكىلدەرىمەن جۇزدەستى. ءباسپاسوز ءماسليحاتىنا تەاتر ديرەكتورى، قازاقستاننىڭ ەڭبەك سىڭىرگەن قايراتكەرى ەرلان ءبىلال، تەاتردىڭ كوركەمدىك جەتەكشىسى، كسرو حالىق ءارتىسى ءاسانالى ءاشىموۆ، ديرەكتوردىڭ كەڭەسشىسى، قازاقستاننىڭ حالىق ءارتىسى ەسمۇحان وباەۆ، رەجيسسەر، قازاقستاننىڭ ەڭبەك سىڭىرگەن قايراتكەرى اۋباكىر راحيموۆ، تەاتردىڭ ادەبيەت ءبولىمىنىڭ مەڭگەرۋشىسى، قازاقستاننىڭ ەڭبەك سىڭىرگەن قايراتكەرى ءاليا بوپەجانوۆا، اكتريسا، قازاقستاننىڭ ەڭبەك سىڭىرگەن قايراتكەرى داناگۇل تەمىرسۇلتانوۆا قاتىستى.
«بيىل ەل تاۋەلسىزدىگىنىڭ 25 جىلدىعى مەن قازاق ونەرىنىڭ قاراشاڭىراعى سانالاتىن م.اۋەزوۆ تەاترىنىڭ 90 جىلدىعى قاتار كەلىپ، ءبىر ۋاقىتتا تويلانىپ جاتىر. تەاتر ءوزىنىڭ 90 جىلدىق مارتەبەسىن اتاق-دارەجەسىنە ساي كەڭ اۋقىمدا اتاپ ءوتتى. بۇگىن 91-ماۋسىمنىڭ شىمىلدىعىن تەاترىمىزدىڭ داستۇرىنە ساي م.اۋەزوۆتىڭ «اباي» تراگەدياسىمەن اشپاقپىز»، – دەدى تەاتر ديرەكتورى ەرلان ءبىلال.
ءباسپاسوز ءماسليحاتىنان كەيىن اكتەرلەر شەرۋىنە ۇلاسقان ءىس-شارادا تەاتردىڭ كوركەمدىك جەتەكشىسى ءاسانالى ءاشىموۆ: «ءبىزدىڭ بارلىق ونەرىمىز – حالىق ءۇشىن. ەل تاۋەلسىزدىگىنىڭ 25 جىلدىعى مەن تەاتردىڭ 90 جىلدىق مەرەيتويى اياسىندا تەاتردا كوپتەگەن ءىس-شارالار ۇيىمداستىرىلدى. سونىڭ ءبىرى ەلىمىزدىڭ وبلىس ورتالىقتارىنا گاسترولدىك ساپارمەن بارىپ، 90 جىلدا جەتكەن جەتىستىكتەرىمىزدى سارالاپ، حالىققا ەسەپ بەرۋ بولدى. اعا، ورتا، جاس بۋىن وكىلدەرىنەن تۇراتىن تەاتردىڭ شىعارماشىلىق قۇرامى كۇن وتكەن سايىن تالانتتى جاستارمەن تولىعۋدا. بۇگىندە تەاترىمىز اكادەميالىق تەاتر بولعانىمەن، «ۇلتتىق تەاتر» دەگەن اتقا قىزمەت ەتۋدەمىز»، – دەدى.
ال تەاتر ديرەكتورىنىڭ كەڭەسشىسى، قازاقستاننىڭ حالىق ءارتىسى ەسمۇحان وباەۆ ءوز كەزەگىندە: «م.اۋەزوۆ تەاترى – قازاق دراماتۋرگياسىن، قازاقتىڭ اكتەرلىك مەكتەبىن الەمگە تانىتقان، بەرەكە-بىرلىگى جاراسقان، ءار ءىستى جاۋاپكەرشىلىكپەن، ابىرويمەن اتقاراتىن قازاق ونەرىنىڭ قاراشاڭىراعى، اتا تەاترى. تەاتر اركەز حالقىنىڭ مۇڭىمەن، قۋانىشىمەن بىرگە جۇرەدى. تەاتر حالىق ءۇشىن جۇمىس ىستەيدى. بۇل تەاتر – زاماناۋي تەاتر. قازىردە كيەلى ساحنادا وينايتىن اكتەرلەر نەگىزىنەن جاستار، سوعان ساي كورەرمەندەردىڭ دەنى جاس بۋىن وكىلدەرى. ءبىزدىڭ مىندەتىمىز – ىزىمىزدەن ەرگەن وسى جاستارعا جول كورسەتۋ، تىلەكشى بولۋ. سىزدەردىڭ دە بۇگىنگى تىلەۋلەرىڭىز قابىل بولسىن! ماۋسىم شىمىلدىعىن اشايىق، ءبىز ويلاماعان، ءبىز ايتپاعان ويدى ۇلى ابايدان ەستىڭىزدەر!»، – دەدى.
شىمىلدىق اشىلدى. ساحنادا – «اباي». باس كەيىپكەر رولىندە – تەاتر ديرەكتورى ەرلان ءبىلال. ءابدىراحمان ءرولىن تەاتردىڭ اكتەرلىك قۇرامىنا جۋىردا قوسىلعان قازاقستاننىڭ ەڭبەك سىڭىرگەن قايراتكەرى قۋاندىق قىستىقباەۆ ويناسا، ايدار ءرولى جاس اكتەر ايان وتەپبەرگەنگە سەنىپ تاپسىرىلعان ەكەن. تەاترعا جاڭادان قابىلدانعان جاس اكتەر، كورەرمەن كوڭىلىنەن شىعا ءبىلدى.
جاسۇلان ءناۋرىزالى،
«ادىرنا».
