اۋىلدار ادامسىز قالۋى مۇمكىن

1797

ەڭبەك رەسۋرستارىن دامىتۋ ورتالىعى 2030 جىلعا قاراي قازاقستاندىقتاردىڭ سانى 11% ءوسىپ، شامامەن 20 ميلليون 600 مىڭنان اسادى دەپ بولجام جاساپ وتىر دەپ حابارلايدى «ادىرنا» ۇلتتىق پورتالى «حابار 24» - كە سىلتەمە جاساپ.

ورتالىقتىڭ بولجامىنا سەنسەك, 10 جىلدان كەيىن الماتى جانە تۇركىستان وبلىستارىنداعى ادام سانى 2 ميلليونعا جەتەدى. ال قاراعاندى جانە شىعىس قازاقستان وبلىستارىندا 1 ميلليوننان استام تۇرعىن بولادى. ساراپشىلاردىڭ بولجامى وسىنداي. 2030 جىلعا قاراي مەگاپوليستەر سانى ارتادى. ال اۋىلدارداعى جاعداي قالاي بولماق؟ بولجامدارعا سايكەس، ون جىلدان كەيىن قالادا 13 ميلليونعا جۋىق ادام تۇرسا، 8 ميلليون قازاقستاندىق ازامات اۋىلدى جەردە ءومىر سۇرەدى. ال جالپى حالىق سانىنىڭ ۇشتەن ءبىر بولىگى ءىرى قالالاردا شوعىرلانادى.

اۋىل حالقىنىڭ دەموگرافيالىق جاعدايىنا جاسالعان بولجامعا قارسى پىكىر ايتۋ ارتىق، ارينە. ويتكەنى، بۇل شىندىق. قازىردىڭ وزىندە قازاقستاندا قاڭىراپ بوس قالىپ جاتقان اۋىل سانى كۇن ساناپ ارتۋدا. الداعى ون جىلدا اۋىلدا تەك مالى بار وتباسىلار عانا قالۋى بەك مۇمكىن. قالا، اۋدان ورتالىعىنا جاقىن اۋىلداردىڭ الەۋمەتتىك احۋالى كوڭىل كونشىتپەيدى. ال پالەن شاقىرىمداعى اۋىلدار وركەنيەتتەن تىس قالعالى قاشان. جول، اۋىزسۋ، جىلۋ، جارىق، ينتەرنەت، بايلانىس سياقتى دۇنيەلەر مۇلدە جوق اۋىلدار قازاقستاندا وتە كوپ.

ماسەلەنى ەكىنشى تاراپتان قاراستىرساق، ءبىر توبەدە شوقيىپ ءتورت ءتۇتىن وتباسىنىڭ وتىرعانىنان گورى، ادام سانى از اۋىلداردىڭ حالقىن قالاعا كوشىرىپ، جاعداي جاساعان دا دۇرىس سياقتى. مامانداردىڭ ايتۋىنشا، الداعى ۋاقىتتا الماتى جانە تۇركىستان وبلىستارىندا 2 ميلليون ادامنان تۇرۋى مۇمكىن. ال قاراعاندى، شىعىس قازاقستان جانە جامبىل وبلىستارىندا 1 ميلليوننان استام تۇرعىن بولادى. ساراپتاماعا سايكەس، ەلىمىزدە جاستار كوبەيەدى. مىسالى، تۇركىستان وبلىسى 2030 جىلى جاس تۇرعىندار بويىنشا كوشباسشى بولادى. وڭىردەگى جاستاردىڭ سانى جارتى ميلليون ادامدى قۇرايدى. ساراپشىلار ۇشتىككە الماتى وبلىسى جانە الماتى قالاسىن كىرگىزگەن. سونىمەن بىرگە ماماندار ءححى عاسىردىڭ ورتاسىنا قاراي قازاقستان جاستارىنىڭ ۇشتەن ەكىسى قالالاردا تۇرادى جانە ۇلدار قىزدارداردان كوپ بولادى دەپ سانايدى.

بۇل بولجامنىڭ شىندىققا اينالۋى ۋاقىتتىڭ ەنشىسىندە. دەسەك تە، بولجامنىڭ قانداي نەگىزگە سۇيەنىپ جاسالعانى دا، اشىق ايتىلمايدى. ماسەلەن، قازاقستاندا تۋ كورسەتكىشى ارتتى ما؟ ءدال وسى جىلى تۋعاننان گورى، قايتقاندار سانى ارتتى ەمەس پە؟ بۇل قارقىنمەن كەتە بەرسە، قازىرگى 18 ملن ادامنىڭ ءوزى ازايىپ كەتپەسىن دەپ تىلەيىك.

راۋانا ديماشقىزى،

«ادىرنا» ۇلتتىق پورتالى.

فوتو اشىق دەرەككوزدەن الىندى.

پىكىرلەر
ۇقساس جاڭالىقتار