Aýyldar adamsyz qalýy múmkin

4973
Adyrna.kz Telegram

Eńbek resýrstaryn damytý ortalyǵy 2030 jylǵa qaraı qazaqstandyqtardyń sany 11% ósip, shamamen 20 mıllıon 600 myńnan asady dep boljam jasap otyr dep habarlaıdy «Adyrna» ulttyq portaly «Habar 24» - ke silteme jasap.

Ortalyqtyń boljamyna sensek, 10 jyldan keıin Almaty jáne Túrkistan oblystaryndaǵy adam sany 2 mıllıonǵa jetedi. Al Qaraǵandy jáne Shyǵys Qazaqstan oblystarynda 1 mıllıonnan astam turǵyn bolady. Sarapshylardyń boljamy osyndaı. 2030 jylǵa qaraı megapolıster sany artady. Al aýyldardaǵy jaǵdaı qalaı bolmaq? Boljamdarǵa sáıkes, on jyldan keıin qalada 13 mıllıonǵa jýyq adam tursa, 8 mıllıon qazaqstandyq azamat aýyldy jerde ómir súredi. Al jalpy halyq sanynyń úshten bir bóligi iri qalalarda shoǵyrlanady.

Aýyl halqynyń demografııalyq jaǵdaıyna jasalǵan boljamǵa qarsy pikir aıtý artyq, árıne. Óıtkeni, bul shyndyq. Qazirdiń ózinde Qazaqstanda qańyrap bos qalyp jatqan aýyl sany kún sanap artýda. Aldaǵy on jylda aýylda tek maly bar otbasylar ǵana qalýy bek múmkin. Qala, aýdan ortalyǵyna jaqyn aýyldardyń áleýmettik ahýaly kóńil kónshitpeıdi. Al pálen shaqyrymdaǵy aýyldar órkenıetten tys qalǵaly qashan. Jol, aýyzsý, jylý, jaryq, ınternet, baılanys sııaqty dúnıeler múlde joq aýyldar Qazaqstanda óte kóp.

Máseleni ekinshi taraptan qarastyrsaq, bir tóbede shoqıyp tórt tútin otbasynyń otyrǵanynan góri, adam sany az aýyldardyń halqyn qalaǵa kóshirip, jaǵdaı jasaǵan da durys sııaqty. Mamandardyń aıtýynsha, aldaǵy ýaqytta Almaty jáne Túrkistan oblystarynda 2 mıllıon adamnan turýy múmkin. Al Qaraǵandy, Shyǵys Qazaqstan jáne Jambyl oblystarynda 1 mıllıonnan astam turǵyn bolady. Saraptamaǵa sáıkes, elimizde jastar kóbeıedi. Mysaly, Túrkistan oblysy 2030 jyly jas turǵyndar boıynsha kóshbasshy bolady. Óńirdegi jastardyń sany jarty mıllıon adamdy quraıdy. Sarapshylar úshtikke Almaty oblysy jáne Almaty qalasyn kirgizgen. Sonymen birge mamandar HHI ǵasyrdyń ortasyna qaraı Qazaqstan jastarynyń úshten ekisi qalalarda turady jáne uldar qyzdardardan kóp bolady dep sanaıdy.

Bul boljamnyń shyndyqqa aınalýy ýaqyttyń enshisinde. Desek te, boljamnyń qandaı negizge súıenip jasalǵany da, ashyq aıtylmaıdy. Máselen, Qazaqstanda týý kórsetkishi artty ma? Dál osy jyly týǵannan góri, qaıtqandar sany artty emes pe? Bul qarqynmen kete berse, qazirgi 18 mln adamnyń ózi azaıyp ketpesin dep tileıik.

Raýana DIMAShQYZY,

«Adyrna» ulttyq portaly.

Foto ashyq derekkózden alyndy.

Pikirler