حالىقارالىق جاستار كۇنىنە وراي، 7-8 تامىز كۇندەرى اۋدانىمىزدا «اۋىل LIFE» وبلىستىق جوباسى اياسىندا بىرقاتار ءىس-شارالار وزدىرىلدى. جوبانىڭ العاشقى كۇنىندە وبلىس اكىمىنىڭ ورىنباسارى قايىرجان مەڭدىعاليەۆ وبلىس جانە اۋداننىڭ بەلسەندى جاستارىمەن كەزدەستى. كەزدەسۋگە اۋدان اكىمىنىڭ ورىنباسارى سەرىك قايىرليەۆ، وبلىستىق قوعامدىق دامۋ باسقارماسىنىڭ ءبولىم باسشىسى ميرفات بيسەكەنوۆ، وبلىستىق جاستارمەن جۇمىس جونىندەگى رەسۋرستىق ورتالىعىنىڭ ديرەكتورى اڭسار يبراەۆ، «اۋىل LIFE» جوباسىنىڭ قاتىسۋشىلارى مەن اۋدانىمىزدىڭ بەلسەندى جاستارى قاتىستى.
كەزدەسۋ بارىسىندا وبلىس اكىمىنىڭ ورىنباسارى جاستارمەن اشىق پىكىر الماسىپ، ولاردىڭ وي-پىكىرلەرى مەن ۇسىنىستارىن تىڭداپ، جاس بۋىن اۋىل جاستارىنىڭ الەۋمەتتىك بەلسەندىلىگى، جۇمىسقا ورنالاسۋ، بوس ۋاقىتتى ءتيىمدى پايدالانۋ تۋرالى وي قوزعادى.
كەزدەسۋدە كوتەرىلگەن ويلار مەن ۇسىنىستار اۋىل جاستارىنىڭ قوعام ومىرىنە بەلسەندى ارالاسۋعا دايىن ەكەنىن كورسەتەدى. ءبىز سىزدەردىڭ جۇمىسقا ورنالاسۋ، ءبىلىم الۋ جانە بوس ۋاقىتتى ءتيىمدى پايدالانۋ باعىتىنداعى باستامالارىڭىزدى قولداۋعا مۇددەلىمىز. ارقايسىڭىزدىڭ يدەياڭىز – اۋىلدىڭ، ءوڭىردىڭ دامۋىنا قوسىلعان ۇلەس. ەڭ باستىسى – العا قويعان ماقساتتارىڭىزدان تايماي، جاڭا مۇمكىندىكتەردى پايدالانا ءبىلۋ. سىزدەرگە ءاردايىم سەنىم ارتامىز جانە بىرگە جۇمىس ىستەۋگە دايىنبىز، - دەگەن قايىرجان ەرمەكۇلى جاستاردىڭ بەلسەندىلىگىنە وڭ باعاسىن بەردى.
جاستاردى جىگەرلەندىرگەن كەزدەسۋدە باتىس قازاقستان وبلىسى اكىمىنىڭ ورىنباسارى قايىرجان مەڭدىعاليەۆ جاستار اراسىنداعى بەلسەندى ازاماتتاردى اتاپ ءوتىپ، ءوز اتىنان العىس حاتتارمەن ماراپاتتادى. قۇرمەتكە يە بولعانداردىڭ قاتارىندا قايىرىمدىلىق شارالارىنا بەلسەنە قاتىسىپ جۇرگەن ەرىكتى، جاس كاسىپكەر دانا ەرمۇحانوۆا، جيھاز تسەحىن دامىتىپ وتىرعان كاسىپكەر، مەتسەنات ەربول اياپوۆ، قۇس شارۋاشىلىعىن جولعا قويىپ، مەملەكەتتىك گرانت يەگەرى اتانعان ماناس اسىلحانۇلى جانە ءتارتىپ ساقشىسى، پوليتسيا قىزمەتكەرى ورازعالي ورازىمبەتوۆ بار.
وبلىس اكىمىنىڭ ورىنباسارى جاستارمەن بەرگى اۋدان ورتالىعىنداعى «دوستىق» ساياباعىندا ۇيىمداستىرىلعان مەرەكەلىك كونتسەرتكە قاتىستى.
«اۋىل LIFE» جوباسى اياسىندا بەلگىلى شاشتاراز بەرىك قايىرشا «قايشىداعى كرەاتيۆ»، SMM مامان، بلوگەر ادەمى جاراسوۆا ء«بىزدىڭ الەم»، بلوگەر، قولونەر شەبەرى داراجات حاپاروۆا «بالالارىمىزدى بۇگىننەن دامىتايىق» تاقىرىبىندا شەبەرلىك ساعاتتارىن وتكىزدى. سونىمەن قاتار جوبا قاتىسۋشىلارى اۋداندىق تاريحي-ولكەتانۋ مۋزەيىمەن جانە اۋداندىق ورتالىقتاندىرىلعان كىتاپحانامەن تانىستى. ال 8 تامىز كۇنى جوبا قاتىسۋشىلارى ءوزارا باقتارىن سىناپ، ۇلتتىق قۇندىلىقتارىمىز بەن اۋىل تىرشىلىگىن دارىپتەدى.
جوبا قاتىسۋشىلارى كەلەسى باعىتتار بويىنشا ءوز شەبەرلىكتەرىن سىنادى:
«ساۋىپ ىشكەننىڭ ءدامى بولەك» بولىمىندە نازىك جاندى قىزدار سيىر ساۋ شەبەرلىكتەرىن كورسەتىپ، اۋىل تۇرمىسىنىڭ ماڭىزدى داعدىلارىن پاش ەتسە، «قاستەرلى كاسىپ» بولىمىندە جىگىتتەر قوي سويۋدىڭ ءداستۇرلى ادىستەرىن كورسەتىپ، ەتتى مۇشەلەۋ مەن وڭدەۋدىڭ قىر-سىرىن تانىستىردى. كەلەسى بولىمدە ارۋلار ۇلتتىق تاعامداردى دايىنداپ، ءدامى ءتىل ۇيىرەر اس ءمازىرىن ۇسىندى. ال «بىرلىك كۇش بەرەدى» بولىمىندە ارقان تارتىسىپ، كوماندالىق ويىن ارقىلى قاتىسۋشىلار بىرلىك پەن كۇشتىڭ ماڭىزىن كورسەتتى.
«ات – ەر قاناتى» دەمەكشى جىگىتتەر اتقا قۇرىق سالۋ شەبەرلىكتەرىن كورسەتىپ، اتقا ءمىنۋدىڭ ادىستەرىن تانىستىرسا، قىزدار «اۋىلدىڭ اق ءدامى» دەپ قۇرت دايىنداۋدىڭ ءداستۇرلى تاسىلدەرىن كورسەتىپ، تاعامنىڭ ماڭىزدىلىعىن ءتۇسىندىردى. جىگىتتەر قوي كوتەرۋ ارقىلى كۇش پەن توزىمدىلىكتەرىن سىناسا، قىز-كەلىنشەكتەر ۇرشىق ءيىرۋ ارقىلى قولونەردىڭ نازىك تۇستارىن كورسەتە ءبىلدىردى. لاڭگى تەبۋ ارقىلى جىگىتتەر ەپتىلىك پەن شاپشاڭدىقتارى بويىنشا سىنعا ءتۇستى.
تارتىستى وتكەن جارىستا ءى ورىندى «قوسوزەن» كومانداسى يەلەنسە، ءىى ورىندى «جارقىرا» كومانداسى، ءىىى ورىندى «رۋح» كومانداسى قانجىعاعا بايلادى.
جوبانىڭ جابىلۋ سالتاناتىنا قاتىسقان اۋدان اكىمىنىڭ ورىنباسارى سەرىك قايىرليەۆ جوبا ۇيىمداستىرۋشىلارى مەن قاتىسۋشىلارعا ريزاشىلىعىن ءبىلدىردى.
- سىزدەردىڭ ەڭبەكتەرىڭىز اۋىل ومىرىنە سەرپىن بەرىپ، جاڭا يدەيالاردىڭ جۇزەگە اسۋىنا جول اشتى. وسىنداي جوبالار ارقىلى اۋىلىمىزدىڭ الەۋەتى ارتىپ، جاستارىمىزدىڭ بولاشاعى جارقىن بولارىنا سەنىمدىمىن. بىرلەسىپ ەڭبەك ەتىپ، جاڭا جەتىستىكتەرگە جەتە بەرەيىك!، - دەگەن اۋدان اكىمىنىڭ ورىنباسارى الەمدىك ارەنالاردا قازاقستاننىڭ تۋىن بيىكتە جەلبىرەتىپ جۇرگەن، سامبو جانە دزيۋدو سپورت تۇرلەرىنەن حالىقارالىق دەڭگەيدەگى سپورت شەبەرى، الەم جانە ازيا چەمپيونى، قازاقستاننىڭ بىرنەشە دۇركىن جەڭىمپازى نۇربول سەرىكوۆكە جەرلەستەرى اتىنان تۇلپار مىنگىزدى.
ايتا كەتەيىك، جوبا باتىس قازاقستان وبلىسى اكىمدىگىنىڭ قوعامدىق دامۋ باسقارماسىنىڭ، كازتالوۆ اۋدانى اكىمدىگىنىڭ قولداۋىمەن، «Zaman» جاستار قوعامدىق بىرلەستىگى جانە اۋداندىق جاستارمەن جۇمىس جونىندەگى رەسۋرستىق ورتالىعىنىڭ ۇيىمداستىرۋىمەن جۇزەگە استى.
- بيىلعى كەزەڭگە الەۋمەتتىك جەلىلەر ارقىلى ىرىكتەلگەن، وبلىستاعى بەلسەندى 15 جاس (9 ەر بالا، 6 قىز) قاتىستى. ولاردىڭ ىشىندە اۋىلدا تۋىپ، كەيىن قالاعا قونىس اۋدارعان جاستار دا بار. تۋعان جەرىن ۇمىتپاي، اۋىلدىڭ قادىرىن ءتۇسىنسىن دەگەن نيەتپەن جوباعا تارتتىق. قاتىسۋشىلار ۇلتتىق سالت-داستۇرلەرگە نەگىزدەلگەن سايىستاردا باق سىناپ، اۋىل ءومىرىنىڭ قىزىعى مەن شىجىعىن بىرگە سەزىندى. بۇل جوبا الداعى ۋاقىتتا دا جالعاسىپ، جاستار مەن اۋىل اراسىنداعى بايلانىستى كۇشەيتۋدى ماقسات ەتەدى، – دەدى جوبا اۆتورى، بقو جاستارمەن جۇمىس جونىندەگى رەسۋرستىق ورتالىعىنىڭ باسشىسى اڭسار يحسانۇلى.
«اۋىل LIFE» جوباسى جوعارى دەڭگەيدە ۇيىمداستىرىلعان. قالانىڭ كۇيبەڭ تىرشىلىگىنە ءسىڭىسىپ كەتكەننەن كەيىن، اۋىلدىڭ تىنىش، تازا اۋاسى ميىمىزدى تىنىقتىردى. ءمانى بار جوبانى اۋدان ۇيىمداستىرۋشىلارىنا جانە وبلىستىق جاستار رەسۋرستىق ورتالىعىنا العىسىمدى بىلدىرەمىن. مۇنداي جوبالار جاستاردى ۇلتتىق قۇندىلىقتارمەن بايلانىستىرىپ، اۋىل ءومىرىنىڭ شىنايى كەلبەتىن تانىپ-بىلۋگە جول اشادى. الداعى ۋاقىتتا وسىنداي يگى جوبالار جالعاسىن تابادى دەگەن ويدامىن، – دەپ ءبولىستى جوبا قاتىسۋشىسى، ايتىسكەر-اقىن ءارى ءانشى رايىمبەك وتەپوۆ.
– وسى جوبانىڭ ارقاسىندا العاش رەت كيىز ۇيگە كەلىپ، تۇنەدىك. شاڭىراققا قاراپ، جەردەن ەرەكشە ءبىر ەنەرگيا العانداي بولدىق. بۇل ءسات مەن ءۇشىن وتە اسەرلى بولدى. تاڭعى سالقىنمەن ويانىپ، كۇننىڭ شىعۋىن تاماشالادىق. تابيعاتتىڭ تىلسىم تىنىسى جانىمىزعا تىنىشتىق سىيلادى. جوبا اياسىنداعى ەكىنشى كۇن دە ەرەكشە باستالدى. جىگىتتەر قوي سويىپ، قىزدار ەت اسىپ، نان يلەپ، اۋىل ءومىرىنىڭ قىزىقتى ساتتەرىن باستان وتكەردى. ءجۇن ءتۇتىپ، ۇرشىق ءيىرۋ سەكىلدى ۇمىتىلىپ بارا جاتقان ءداستۇرلى ىستەرگە ارالاسىپ، سوناۋ بالالىق شاقتاعى اجە-انالاردىڭ مەيىرىمى مەن جىلۋىن ەسكە العان قاتىسۋشىلار كوزدەرىنە جاس الدى. كيەلى كازتالوۆ اۋدانىندا ءوتىپ جاتقان «اۋىل LIFE» جوباسى ۇلتتىق رۋحىمىزدى وياتتى. بۇل جوبادان العان اسەرىمىز – ۇلتتىڭ بولمىسىن سەزىنۋ. ۇيىمداستىرۋشىلارعا العىس ايتامىز، – دەپ جوبا قاتىسۋشىسى ءبيبىنۇر حاميت ءوز اسەرىمەن ءبولىستى.
