قالا باسشىلىعى ءۇي كەزەگىندە تۇرعان ازاماتتاردىڭ سانىن جىل ساناپ ازايتىپ كەلەدى
شىمكەنت قالاسىنىڭ اكىمى مۇرتان ايتەنوۆتىڭ توراعالىعىمەن وتكەن كەڭەستە تۇرعىن ءۇي باسقارماسىنىڭ باسشىسى عالىمجان تولەپوۆ 2020 جىلدىڭ ون ايىنداعى جۇمىستى قورىتىندىلادى.
شىمكەنتتە تاعى 1596 وتباسى باسپانالى بولدى
باسقارما باسشىسى حابارلاعانداي، قالادا 1600-گە جۋىق وتباسى قونىس تويىن تويلاپ جاتىر. بۇل ادامدار اكىمدىكتىڭ كەزەگىندە تۇرعان جانە «نۇرلى جەر» باعدارلاماسىنىڭ اياسىندا ارەندالىق ۇيگە يە بولىپ وتىر.
1596 ادامنىڭ ىشىندە 2 سوعىس ارداگەرى، 48 جەتىم نەمەسە اتا-اناسىنىڭ قامقورلىعىنسىز قالعان بالا، 450 كوپ بالالى وتباسى، الەۋمەتتىك از قامتىلعان توپتاعى 192 ادام جانە جۇمىس ىستەيتىن 904 جاس مامان بار.
جالپى، «نۇرلى جەر» مەملەكەتتىك تۇرعىن ءۇي باعدارلاماسىنىڭ ءبىر باعىتى بولىپ وتىرعان ارەندالىق باسپانا وسى شىمكەنت قالاسىنان باسقا، الماتى جانە نۇر-سۇلتاندا ىسكە اسادى. باعدارلاما بويىنشا اكىمدىكتىڭ كەزەگىندە تۇرعان تۇرعىن ۇيگە ەڭ مۇقتاج ازاماتتار اي سايىنعى پاتەراقىسى وتە تومەن باسپاناعا يە بولا الادى. ارەندالىق باسپانانىڭ ەكى باعىتى، ياعني، ساتىپ الۋ قۇقىعىنسىز جانە ساتىپ الۋ قۇقىعىمەن بەرىلەتىن پاتەرلەر بار.
قالادا 40 مىڭنان استام ازامات ءۇي كەزەگىندە تۇر
باسقارما باسشىسىنىڭ مالىمەتىنە سۇيەنسەك، قازىر قالا بويىنشا 40 752 ازامات ءۇي كەزەگىندە تۇر. بيىلدىڭ وزىندە ءۇي كەزەگىنە 11 280 ادام قۇجات تاپسىرسا، اكىمدىك ولاردىڭ جارتىسىنا جۋىعىن، ياعني، 4530 ادامدى ءۇي كەزەگىنە تىركەپ قويعان.
«ونىڭ ىشىندە، جەتىم جانە اتا-اناسىنىڭ قامقورلىعىنسىز قالعان بالالار – 1663, كوپبالالى وتباسىلار – 6129, حالىقتىڭ الەۋمەتتىك جاعىنان ءالسىز توبى – 13576, مەملەكەتتىك قىزمەتشىلەر، بيۋدجەتتىك ۇيىم جانە اسكەري قىزمەتشىلەر – 19357, جالعىز تۇرعىن ءۇيى اپاتتى جاعدايدا دەپ تانىلعان ازاماتتار ساناتى – 27»، - دەپ حابارلايدى قالا اكىمىنىڭ ءباسپاسوز قىزمەتى.
تۇرعىن ءۇي كەزەگىنە ۇنەمى تۇزەتۋ ەنەدى
جالپى، اكىمدىك ءۇي كەزەگى تەز جىلجۋ ءۇشىن جاسالاتىن باستى شارالاردىڭ ءبىرى – تىزىمگە ۇنەمى تۇزەتۋ ەنگىزىپ تۇرۋ دەيدى. ويتكەنى، ءۇي كەزەگىندە تۇرعانمەن، ازاماتتار باسقا جاققا كوشىپ كەتىپ جاتالى نەمەسە اۋەل باستا كەزەككە تۇراتىن ساناتىن جوعالتقان.
«2020 جىلى تۇرعىن ءۇي تىزىمىنە تۇزەتۋ جاسالدى، وتباسى مۇشەلەرىن قوسا العاندا 118 678 ازاماتقا قاتىستى مالىمەت تاعى ءبىر رەت تەكسەرىلگەن. وسىلايشا، يەلىگىندە تۇرعىن ءۇي تىركەلگەن، باسقا ەلدى-مەكەنگە قونىس اۋدارعان، ساناتىن جوعالتقان، قايتىس بولۋ سەبەپتەرىنە بايلانىستى 4456 ازامات تۇرعىن ءۇي الۋ تىزىمىنەن شىقتى»، - دەپ حابارلايدى دەرەككوز.
جالپى، بيىل قالادا 154 نىساننىڭ قۇرىلىسى جوسپارلانسا، قالا باسشىلىعى كوپقاباتتى تۇرعىن ۇيلەر قۇرىلىسىنا باسىمدىق بەرىپ وتىر. ماسەلەن، وسى «نۇرلى جەر» مەملەكەتتىك باعدارلاماسى بويىنشا بيۋدجەت ەسەبىنەن 92 ءۇي سالىنىپ جاتىر. جىل باسىنان بەرى، توعىز اي ىشىندە 528 پاتەرلىك 8 تۇرعىن ءۇي، «شىمكەنت سيتي» شاعىناۋدانىندا 888 پاتەرلى 12 تۇرعىن ءۇي، بارلىعى 20 تۇرعىن ءۇي پايدالانۋعا بەرىلدى.
«جەلتوقساندا «تۇران» شاعىن اۋدانىنداعى 1708 پاتەرلى 27 تۇرعىن ءۇي پايدالانۋعا بەرىلەدى. وسىلايشا، جىل سوڭىنا دەيىن تاعى 3284 وتباسى ءوز باسپاناسىن ساتىپ الۋ مۇمكىندىگىنە يە بولادى»، - دەپ حابارلايدى اكىمدىكتىڭ ءباسپاسوز قىزمەتى.
قۇرىلىس باسقارماسى ماماندارىنىڭ ايتۋىنشا، 9 ايدا 357,2 مىڭ شارشى مەتر تۇرعىن ءۇي پايدالانۋعا تاپسىرىلىپ، وتكەن جىلدىڭ سايكەس كەزەڭىمەن سالىستىرعاندا سالاداعى ءوسىم 118% قۇراعان.
جىل سوڭىنا دەيىن شىمكەنت اكىمدىگى جالپى اۋماعى 254,8 مىڭ شارشى مەتر تۇرعىن ءۇيدى پايدالانۋعا تاپسىرماق.
ەركە جومارت
«ادىرنا» ۇلتتىق پورتالى
