Qala basshylyǵy úı kezeginde turǵan azamattardyń sanyn jyl sanap azaıtyp keledi
Shymkent qalasynyń ákimi Murtan Áıtenovtiń tóraǵalyǵymen ótken keńeste turǵyn úı basqarmasynyń basshysy Ǵalymjan Tólepov 2020 jyldyń on aıyndaǵy jumysty qorytyndylady.
Shymkentte taǵy 1596 otbasy baspanaly boldy
Basqarma basshysy habarlaǵandaı, qalada 1600-ge jýyq otbasy qonys toıyn toılap jatyr. Bul adamdar ákimdiktiń kezeginde turǵan jáne «Nurly jer» baǵdarlamasynyń aıasynda arendalyq úıge ıe bolyp otyr.
1596 adamnyń ishinde 2 soǵys ardageri, 48 jetim nemese ata-anasynyń qamqorlyǵynsyz qalǵan bala, 450 kóp balaly otbasy, áleýmettik az qamtylǵan toptaǵy 192 adam jáne jumys isteıtin 904 jas maman bar.
Jalpy, «Nurly jer» memlekettik turǵyn úı baǵdarlamasynyń bir baǵyty bolyp otyrǵan arendalyq baspana osy Shymkent qalasynan basqa, Almaty jáne Nur-Sultanda iske asady. Baǵdarlama boıynsha ákimdiktiń kezeginde turǵan turǵyn úıge eń muqtaj azamattar aı saıynǵy páteraqysy óte tómen baspanaǵa ıe bola alady. Arendalyq baspananyń eki baǵyty, ıaǵnı, satyp alý quqyǵynsyz jáne satyp alý quqyǵymen beriletin páterler bar.
Qalada 40 myńnan astam azamat úı kezeginde tur
Basqarma basshysynyń málimetine súıensek, qazir qala boıynsha 40 752 azamat úı kezeginde tur. Bıyldyń ózinde úı kezegine 11 280 adam qujat tapsyrsa, ákimdik olardyń jartysyna jýyǵyn, ıaǵnı, 4530 adamdy úı kezegine tirkep qoıǵan.
«Onyń ishinde, jetim jáne ata-anasynyń qamqorlyǵynsyz qalǵan balalar – 1663, kópbalaly otbasylar – 6129, halyqtyń áleýmettik jaǵynan álsiz toby – 13576, memlekettik qyzmetshiler, bıýdjettik uıym jáne áskerı qyzmetshiler – 19357, jalǵyz turǵyn úıi apatty jaǵdaıda dep tanylǵan azamattar sanaty – 27», - dep habarlaıdy qala ákiminiń baspasóz qyzmeti.
Turǵyn úı kezegine únemi túzetý enedi
Jalpy, ákimdik úı kezegi tez jyljý úshin jasalatyn basty sharalardyń biri – tizimge únemi túzetý engizip turý deıdi. Óıtkeni, úı kezeginde turǵanmen, azamattar basqa jaqqa kóship ketip jataly nemese áýel basta kezekke turatyn sanatyn joǵaltqan.
«2020 jyly turǵyn úı tizimine túzetý jasaldy, otbasy múshelerin qosa alǵanda 118 678 azamatqa qatysty málimet taǵy bir ret tekserilgen. Osylaısha, ıeliginde turǵyn úı tirkelgen, basqa eldi-mekenge qonys aýdarǵan, sanatyn joǵaltqan, qaıtys bolý sebepterine baılanysty 4456 azamat turǵyn úı alý tiziminen shyqty», - dep habarlaıdy derekkóz.
Jalpy, bıyl qalada 154 nysannyń qurylysy josparlansa, qala basshylyǵy kópqabatty turǵyn úıler qurylysyna basymdyq berip otyr. Máselen, osy «Nurly jer» memlekettik baǵdarlamasy boıynsha bıýdjet esebinen 92 úı salynyp jatyr. Jyl basynan beri, toǵyz aı ishinde 528 páterlik 8 turǵyn úı, «Shymkent sıtı» shaǵynaýdanynda 888 páterli 12 turǵyn úı, barlyǵy 20 turǵyn úı paıdalanýǵa berildi.
«Jeltoqsanda «Turan» shaǵyn aýdanyndaǵy 1708 páterli 27 turǵyn úı paıdalanýǵa beriledi. Osylaısha, jyl sońyna deıin taǵy 3284 otbasy óz baspanasyn satyp alý múmkindigine ıe bolady», - dep habarlaıdy ákimdiktiń baspasóz qyzmeti.
Qurylys basqarmasy mamandarynyń aıtýynsha, 9 aıda 357,2 myń sharshy metr turǵyn úı paıdalanýǵa tapsyrylyp, ótken jyldyń sáıkes kezeńimen salystyrǵanda saladaǵy ósim 118% quraǵan.
Jyl sońyna deıin Shymkent ákimdigi jalpy aýmaǵy 254,8 myń sharshy metr turǵyn úıdi paıdalanýǵa tapsyrmaq.
Erke Jomart
«Adyrna» ulttyq portaly
