18.11.2020 جىلى نۇر-سۇلتان قالاسى پوليتسيا دەپارتامەنتى تەرگەۋ باسقارماسىنىڭ باستىعى عۇمار شىنىبەكوۆ جانبولات اعادىلدىڭ ولىمىنە قاتىستى قىلمىستىق ءىس بويىنشا تەرگەۋ بارىسىنىڭ ءمان-جايىمەن تانىستىردى.
عۇمار شىنىبەكوۆتىڭ ايتۋىنشا، ەلگە بەلگىلى ازاماتتىق بەلسەندى دۋلات اعادىلوۆتىڭ ۇلى جانبولات اعادىل مەن ونى ولتىرگەن قىلمىسكەر ءبىر-بىرىمەن تانىس ەمەس جانە قىلمىسكەرلەر وقيعا ورنىنان قاشپاق بولعان. سونداي-اق جانبولات اعادىلدىڭ ولىمىنە قاتىستى كۇدىكتى 20 جىلعا دەيىن باس بوستاندىعىنان ايرىلۋى مۇمكىن.
تەرگەۋ باسقارماسىنىڭ باستىعى: «اعادىلوۆتىڭ ولىمىنە جانە بۇزاقىلىققا قاتىستى قىلمىستىق ءىس بويىنشا تەرگەۋ جۇمىستارى جۇرگىزىلىپ جاتىر. تەرگەۋ بارىسىندا 2020 جىلدىڭ 7 قاراشاسىندا ساعات 23.00 شاماسىندا، الدىمەن نۇر-سۇلتان قالاسىنداعى كوكتال شاعىن اۋدانى، بولاشاق كوشەسى 28-دە، سودان كەيىن اقمولا وبلىسى تالاپكەر اۋدانىنداعى Sinooil جقس-ىندا بويجەتكەن ءۇشىن جانجال بولعان. 2020 جىلدىڭ 10 قاراشاسىندا بۇل جانجال ءوز جالعاسىن تاپتى. ساعات 23.00 شاماسىندا اعادىلوۆ دوستارىمەن بىرگە اقمولا وبلىسى تالاپكەر كەنتىنەن بىرنەشە اۆتوكولىكپەن كەلىسىپ، نۇر-سۇلتان قالاسىنداعى كوكتال شاعىن اۋدانىنا كەلەدى. سول جەردە باسقا توپپەن كەزدەسەدى. توبەلەسكە 5 ادام قاتىسقان. جابىرلەنۋشىلەردىڭ ءبىرى جەڭىل دەنە جاراقاتىن العان. ال ازامات جانبولات اعادىلدىڭ جۇرەگىنە زاقىم كەلگەن. وقيعا ورنىنا جەدەل جاردەم بارعان. ال كۇدىكتىلەر ەكى كولىككە وتىرىپ قاشقان. بىرنەشە ساعات ىشىندە بۇل ادامداردىڭ ىزدەرى انىقتالىپ، سول قىلمىس بولعان شاعىن اۋداندا ۇستالدى،» - دەپ مالىمدەدى.
سونداي-اق عۇمار شىنىبەكوۆ كۇدىكتىلەرمەن جانبولات اعادىلدىڭ بۇرىن-سوڭدى تانىس بولماعانىن باسا ايتتى.
باسقارما باستىعى كۇدىكتىلەردىڭ قاشۋىنا بايلانىستى سۇراققا: «كۇدىكتىلەر قاشپاق بولعاندا، مەن ايتقانداي، قىلمىسكەرلەر كەتىپ قالعان. بىراق سول قىلمىس جاساعان كوكتال اۋىلىنىڭ ىشىنەن ءبىر اۆتوكولىك ۇستالدى. كەيىن ءبىر ساعات شاماسىندا ەكىنشى اۆتوكولىك ۇستالدى. بۇگىندە ءۇش ادام ۇستالىپ وتىر. پوليتسيا قىزمەتكەرلەرىنە ولار قارسىلىق بىلدىرمەدى»، - دەپ جاۋاپ بەردى.
«ادىرنا» ۇلتتىق پورتالى
