بايدەن اقش-تاعى ەڭ تومەنگى جالاقىنى ساعاتىنا 15 دوللارعا دەيىن كوتەرۋگە ۋادە بەردى دەپ حابارلايدى «ادىرنا» ۇلتتىق پورتالى Twitter جەلىسىندەگى دجو بايدەننىڭ جازباسىنا سىلتەمە جاساپ.
امەريكالىق باق پرەزيدەنتتىك سايلاۋدا جەڭىسكە جەتتى دەپ حابارلاعان دجو بايدان حالقىنا ەڭ الدىمەن بايلىق سىيلاماق. سىيلاعاندا، قالتاسىنان ءبولىسىپ بەرمەيدى. ءاربىر جۇمىس ساعاتىنىڭ قۇنىن ارتتىرۋ ارقىلى امەريكالىقتاردىڭ قالتاسىن قالىڭداتپاق. قازاقتىڭ تەڭگەسىنە شاققاندا، ءاربىر جۇمىس ساعاتى شامامەن 6 500 تەڭگەدەي بولادى. ەندى مۇنى قازاقى ميىمىزدا ەسەپتەپ كەپ جىبەرسەك، كۇنىنە كەم دەگەندە بەس ساعات جۇمىس ىستەسە، 32 500 تەڭگە. ون كۇندە جالاقىڭىز 325 000 تەڭگە. ال ەندى وتىز كۇندە...
بايدەن مۇنداي شەشىمگە پاندەميادان تۋىنداعان داعدارىس سالدارىنان كەلگەنىن ايتادى.
ونىڭ ايتۋىنشا، پاندەميادان تۋىنداعان داعدارىستان كەيىن ەل قالپىنا كەلە باستاعاندا، ساعاتتىق جالاقى وسەدى.
ء"بىز مۇنى جوعارى جالاقىمەن، سونىڭ ىشىندە 15 دوللارلىق ەڭ تومەنگى جالاقىمەن، جاقسى جەڭىلدىكتەرمەن جانە وتباسىڭىزبەن قامتاماسىز ەتۋگە مۇمكىندىك بەرەتىن كۇشتى ۇجىمدىق شارتتارمەن جاسايمىز", — دەپ جازدى بايدەن. وسىلايشا، 8 ساعاتتىق جۇمىس كۇنىنىڭ ەڭ تومەنگى تولەم مولشەرى 120 دوللاردى نەمەسە شامامەن 51 430 تەڭگەنى قۇرايدى.
اقش ەڭبەك مينيسترلىگى بەلگىلەگەن ەڭ تومەنگى جالاقى قازىر ساعاتىنا $7,25 قۇرايدى – 3 100 تەڭگەدەن ءسال ارتىق.
بايقاساڭىزدار، قازىردىڭ وزىندە دە امەريكالىقتاردىڭ ساعاتتىق جالاقىسى از ەمەس. ال ەندى وسى قاتارعا بىزدەگى جالاقىنىڭ ساعاتتىق مولشەرىن قويىپ، سالىستىرىپ جىبەرسەك. ارينە، كۇلكىلى ءارى وتە ۇيات جاعدايعا تاپ بولارىمىز انىق. دەسەك تە، كورەيىكشى. بىزدەگى ورتاشا ايلىق جالاقى شامامەن 150 مىڭ تەڭگەنى قۇرايدى. ساعات ەمەس، كۇندىك جالاقىمىزدىڭ ءوزى 5 مىڭنان ارەڭ اسادى ەكەن. ال ساعاتقا شاقساق... ءار ساعاتىمىزعا 1000 تەڭگەدەن كەلەدى. ونىڭ وزىندە كۇنىنە بەس ساعاتتان جۇمىس ىستەسەك. ال ۇمىتپاساق، قازاقستاندا كەمى سەگىز ساعاتتىق، ال شىندىعىندا ون ساعاتتان جۇمىس ىستەيتىندەر كوپ. دەمەك، ءار ساعاتىمىز 500 تەڭگەدەن ەكەن. ءبىر اقش دوللارىنان ءسال عانا اسادى. ال قازىرگى پاندەميا كەزىندە بار جۇمىسىنان ايىرىلىپ، ۇكىمەتكە القان جايقان حالقىنا بيلىك قانشا تەڭگە بەرگەنى اركىمنىڭ ەسىندە ماڭگى ساقتالاتىن شىعار. سول كارانتين كەزىندە تارىعىپ قينالعان ساتتەردى ەسكە العاندا، ءا دەگەننەن حالقىنىڭ قالتاسىنىڭ قامىن ويلاعان پرەزيدەنتتەن اينالىپ كەتەدى ەكەنسىڭ. قازاقستاندا تەك ۇرانداتقان باستامالار بار. جۇزەگە اسىپ، حالىقتىڭ الەۋمەتتىك جاعدايىنا ۇلكەن ىقپال ەتىپ جاتقان باستامالار مەن ۇراندار ساۋساقپەن سانارلىق قانا شىعار، ءسىرا. سوعان قاراماي، دامىعان ەلدەردى بەتكە الىپ، سول كوشكە قوسىلۋعا اسىعىپ كەتىپ بارادى ەلىمىز. كۇلەيىك پە، جىلايىق پا؟
راۋانا ديماشقىزى،
"ادىرنا" ۇلتتىق پورتالى.
فوتو اشىق دەرەككوزدەن الىندى.
