مەملەكەت باسشىسى قاسىم-جومارت توقاەۆتىڭ توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيانىڭ قورىتىندى وتىرىسىندا سويلەگەن ءسوزىن akorda.kz جاريالادى.
قۇرمەتتى كەڭەسكە قاتىسۋشىلار!
سوڭعى ەكى اي ەلىمىز ءۇشىن وڭاي بولعان جوق. داعدارىس ءالى تولىق ەڭسەرىلمەي تۇر.
دەگەنمەن، ىندەتتىڭ شارىقتاۋ شەگىنەن وتتىك.
توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيا اۋقىمدى جۇمىس اتقاردى.
حالىقتىڭ دەنساۋلىعىن قورعاۋ، ولاردىڭ تابىسىن ارتتىرۋ جانە بيزنەسىن قولداۋ ءۇشىن 500-گە جۋىق شەشىم قابىلدانىپ، جۇزەگە اسىرىلدى.
ەندى توتەنشە جاعداي رەجيمىن قامتاماسىز ەتۋ جونىندەگى كوميسسيا ەكونوميكالىق ءوسىمدى قالپىنا كەلتىرۋ جونىندەگى مەملەكەتتىك كوميسسيا بولىپ قايتا قۇرىلادى.
بۇگىن بۇكىل ەلىمىزدەگى توتەنشە جاعداي رەجيمى اياقتالدى.
الايدا، كەيبىر ايماقتاردا دەرتتىڭ تارالۋى باسەڭدەمەي وتىر.
ىندەت تولىعىمەن جويىلىپ كەتكەن جوق. پاندەميا حالىقتىڭ دەنساۋلىعىنا ءالى دە قاۋىپتى.
سوندىقتان كارانتيندىك شەكتەۋلەر ءار وڭىردەگى جاعدايدىڭ جاقسارۋىنا قاراي بىرتىندەپ الىنادى.
سوعان قاراماستان كوپتەگەن سالانىڭ قىزمەتى قالپىنا كەلە باستادى.
قازىردىڭ وزىندە 1 ميلليون 100 مىڭنان استام ازامات جۇمىسقا شىقتى.
بۇگىننەن باستاپ ەلىمىز بويىنشا دۇكەندەردىڭ ءبىرازى اشىلادى، ءسان سالوندارىنىڭ، ءبىلىم ورتالىقتارىنىڭ، تاعى باسقا نىسانداردىڭ قىزمەتى قايتا جاندانادى.
ساياباقتار اشىلادى.
جولاۋشىلارعا ارنالعان اۋە تاسىمالىنىڭ جۇمىسى قالپىنا كەلەدى.
بۇعان دەيىن 6 قالانىڭ اۋەجايى اشىلعان بولاتىن. ەندى وعان تاعى 7 قالا قوسىلادى.
كوپتەگەن شەكتەۋلەر الىنىپ تاستالدى.
الايدا، كۇندەلىكتى ومىردە ساقتىق شارالارىن قاتاڭ ۇستانعان ءجون.
ۇكىمەت جاڭا سانيتارلىق ەرەجەلەردى دايىنداپ، ەنگىزۋى قاجەت. شاعىن، ورتا، ءىرى كومپانيالار جاڭا ەرەجەلەرگە سايكەس جۇمىس ىستەۋى كەرەك.
الەۋمەتتىك اراقاشىقتىقتى ساقتاۋ، كوپشىلىك جينالعان جەردە بەتپەردە تاعىپ ءجۇرۋ قالىپتى جاعدايعا اينالۋعا ءتيىس.
وبلىستار اراسىنداعى كولىك قاتىناسىنا قاتىستى شەكتەۋلەر قالا بەرەدى.
قوعامدىق كولىكتەر جارتىلاي جۇكتەمەمەن جۇمىس ىستەيدى.
جولاۋشىلاردان بەتپەردە تاعۋ تالاپ ەتىلەدى.
كوشەدە توپتاسىپ جۇرەتىندەر 3 ادامنان اسپاۋى كەرەك.
مەملەكەتتىك قىزمەتشىلەردىڭ 50 پايىزى قاشىقتان جۇمىس ىستەي بەرەدى.
جەكە كاسىپورىن باسشىلارى قانشا قىزمەتكەردى جۇمىسقا شىعاراتىنىن وزدەرى انىقتاۋعا ءتيىس.
جۇرتتىڭ كوبى ءالى دە ۇيدە وتىرا تۇرعانى دۇرىس بولار ەدى. بۇل – ەڭ الدىمەن، ادامداردىڭ قاۋىپسىزدىگىنە بايلانىستى ماسەلە.
جۇمىس ورنىندا الەۋمەتتىك اراقاشىقتىق جانە قاتاڭ سانيتارلىق رەجيم ساقتالۋى قاجەت.
ىندەتتىڭ ەكىنشى كەزەڭى باستالىپ كەتۋى مۇمكىن.
سوندىقتان، ءوزىمىزدىڭ امان-ساۋلىعىمىزعا، ەڭ الدىمەن، ءوزىمىز جاۋاپتى بولۋىمىز كەرەك.
ىندەت قايتا ورشىگەن جاعدايدا ۇكىمەت ناقتى شۇعىل ءىس-قيمىل جوسپارىن دايىندايدى.
وزدەرىڭىزگە ءمالىم، مەنىڭ تاپسىرمام بويىنشا ەلىمىزدە داعدارىسقا قارسى شارالاردىڭ ەكى توپتاماسى جۇزەگە اسىرىلۋدا.
4,5 ميلليوننان استام ادامعا 42500 تەڭگە كولەمىندە قارجىلاي كومەك كورسەتىلۋدە.
1 ميلليوننان استام ازاماتقا ازىق-تۇلىك پەن تۇرمىستىق زاتتار ۇلەستىرىلۋدە.
كوممۋنالدىق تولەمدەردىڭ ءتاريفى تومەندەتىلدى.
ونى تولەۋ ءۇشىن اسا مۇقتاج جاندار قوسىمشا كومەك الادى.
2 ميلليونعا جۋىق ازاماتتىڭ نەسيە تولەۋ مەرزىمى كەيىنگە شەگەرىلدى.
قولجەتىمدى نەسيە بەرۋ، كوكتەمگى ەگىس ناۋقانىن جۇرگىزۋ، جۇمىس ورىندارىن اشۋ جانە ساقتاۋ ءۇشىن ايتارلىقتاي قاراجات ءبولىندى.
700 مىڭنان استام كومپانيا مەن كاسىپكەرلەر ءۇشىن سالىق جۇكتەمەسى ازايتىلدى.
سول ارقىلى ولار 1 تريلليون تەڭگەگە جۋىق قارجى ۇنەمدەۋگە مۇمكىندىك الدى.
جۇمىس بارىسىندا ولقىلىقتاردىڭ بولعانىن دا مويىنداۋىمىز كەرەك.
ىندەت كوپ تارالىپ، ەكونوميكالىق ماسەلەلەر قاتتى ۋشىعىپ كەتكەنى راس.
سوعان وراي، ءبىز دەر كەزىندە شۇعىل شارالار قابىلدادىق.
كوپتەگەن ماسەلە قوعام وكىلدەرىنىڭ بەلسەنە قاتىسۋى ارقىلى شەشىلدى.
بۇل «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋدىڭ ماڭىزدى كەزەڭىنە اينالدى.
كوروناۆيرۋس پاندەمياسى الەمدىك رەتسەسسيانىڭ باستالۋىنا سەبەپ بولدى.
ءتىپتى ۇزاققا سوزىلاتىن ەكونوميكالىق داعدارىسقا دا الىپ كەلۋى ابدەن مۇمكىن.
جەر-جەردە پروتەكتسيونيزمنىڭ كۇشەيۋى بەلەڭ الۋدا.
ەكونوميكانىڭ تۇتاس سالالارى توقىراۋعا ۇشىراپ جاتىر.
400 ميلليوننان استام كاسىپورىن بانكروت بولۋدىڭ الدىندا تۇر.
الەمدەگى ەڭبەككە جارامدى حالىقتىڭ جارتىسىنا جۋىعىنىڭ تابىسى ازايدى.
ساراپشىلار جاھان ەكونوميكاسى سوڭعى ءجۇز جىل ىشىندە بولماعان دەڭگەيگە تۇسەتىنىن بولجاپ وتىر.
وسىنداي جاعدايعا قاراماستان، ەلىمىز بىرقاتار باسىمدىققا يە بولىپ وتىرعانىن ايتقىم كەلەدى.
بىزدە قارجى رەزەرۆى جەتكىلىكتى جانە مەملەكەت قارىزىنىڭ كولەمى مۇمكىندىگىمىزگە ورايلاس.
ەڭ باستىسى، ءبىز جاڭا احۋال جاعدايىندا جۇمىسپەن قامتاماسىز ەتۋ جانە ەكونوميكالىق تيىمدىلىكتى ارتتىرۋ ءۇشىن رەسۋرستاردى قايدا جۇمساۋ كەرەكتىگىن بىلەمىز.
ەندى داعدارىس كەزىندەگى جانە ودان كەيىنگى دامۋدىڭ باسىمدىقتارىنا توقتالىپ وتەيىن.
ەڭ باستىسى، بارشا ازاماتتاردىڭ ءومىرى مەن دەنساۋلىعىن ساقتاۋ.
ازاماتتاردىڭ تابىسىن ارتتىرۋ.
بيزنەستى قولداۋ جانە ونى دامىتۋ. ءبىلىم جانە عىلىم جۇيەسىن جەتىلدىرۋ.
جۋىق ارادا ەڭ وزەكتى دەگەن مىناداي ماسەلەلەردى شەشۋىمىز كەرەك.
ەكىنشى. بىز «جۇمىسپەن قامتۋ جول كارتاسى» باعدارلاماسىن جۇزەگە اسىرۋعا 1 تريلليون تەڭگەگە جۋىق قارجى ءبولىپ وتىرمىز.
بۇل – قوماقتى قاراجات. ونى شاعىن بيزنەستى نەسيەلەۋگە دە پايدالانۋعا بولادى.
سونىڭ ءبارى قۇزىرلى ورىنداردىڭ باقىلاۋىندا بولىپ، تولىعىمەن ماقساتقا ساي جۇمسالۋعا ءتيىس.
وسى كۇردەلى كەزەڭدە قارجىلاندىرىلىپ جاتقان جوبالار ارقىلى ەڭ الدىمەن جاڭا جۇمىس ورىندارىن اشۋ قاجەت.
بۇعان جۇمىسشىلاردى بارىنشا كوپتەپ تارتۋ كەرەك.
ۇنەمى ەكونوميكالىق تابىس اكەلەتىن نەمەسە ادامي كاپيتالدى دامىتاتىن باستامالار قولعا الىنۋى قاجەت.
وسىعان وراي، مەكتەپ، اۋرۋحانا جانە باسقا دا نىساندار سالىنىپ، جاڭعىرتۋ جۇمىستارى جۇرگىزىلۋگە ءتيىس.
بىركەلكى نىسانداردىڭ ءار ايماقتاعى قۇنى وتە الشاق بولۋىنا جول بەرمەۋ اسا ماڭىزدى.
وكىنىشكە قاراي، مۇنداي جاعداي بىزدە كوپ كەزدەسەدى.
جۇزەگە اسقان جوبالاردىڭ الەۋمەتتىك-ەكونوميكالىق تيىمدىلىگىنە تالداۋ جاسالادى.
ازاماتتاردى قولداۋ مەن بيزنەستى دامىتۋعا ارنالعان وسى جانە باسقا دا شارالاردى جۇزەگە اسىرۋ ءۇشىن ەكونوميكالىق ءوسىمدى قايتا قالپىنا كەلتىرۋ جونىندەگى كەشەندى جوسپار ازىرلەنىپ جاتىر.
بۇل جوسپار جۋىق ارادا بەكىتىلەدى.
مەملەكەتتىك ورگاندار ونى جۇزەگە اسىرۋدىڭ بارلىق جولدارىن مۇقيات پىسىقتاۋى قاجەت.
سونداي-اق، ولار وزدەرىنىڭ ورىنسىز ارەكەتتەرى ارقىلى بۇل شارالاردىڭ ماڭىزدىلىعىن جوققا شىعارۋعا جول بەرمەۋى كەرەك.
داعدارىستىڭ كۇردەلى كەزەڭىن قالاي ەڭسەرەتىنىمىز، ەلىمىزدى جانە ەكونوميكانى ودان ءارى دامۋعا قالاي بەيىمدەيتىنىمىز وسىعان بايلانىستى.
ءبىز داعدارىس سالدارىنان الەمدەگى احۋالدىڭ جانە ۇلتتىق ەكونوميكانىڭ تۇبەگەيلى وزگەرگەنىن انىق كورىپ وتىرمىز.
قازىرگى احۋال مەن فاكتورلار، الداعى وزگەرىستەر 2025 جىلعا دەيىنگى ستراتەگيالىق دامۋ جوسپارىنىڭ جاڭا نۇسقاسىندا ەسكەرىلۋگە ءتيىس.
جوسپاردا ەكونوميكانى جانە مەملەكەتتى باسقارۋ ءىسىن بارىنشا جانداندىراتىن ينستيتۋتسيونالدىق جانە قۇرىلىمدىق رەفورمالار قامتىلۋى قاجەت.
قۇرمەتتى ارىپتەستەر!
1 مامىر كۇنى وزبەكستان رەسپۋبليكاسىنداعى ساردوبا سۋ قويماسى بوگەتىنىڭ بۇزىلۋى سالدارىنان تۇركىستان وبلىسىندا سۋ تاسقىنى بولدى.
بۇل – تەحنوگەندى سيپاتتاعى توتەنشە جاعداي.
ماقتاارال اۋدانىنا قاراستى 5 اۋىلدىڭ 1 مىڭنان استام تۇرعىن ءۇيىن سۋ باسىپ قالدى.
سونداي-اق 9 ەلدى مەكەندى سۋ باسۋ قاۋپى تۋىندادى.
شۇعىل قابىلدانعان شارالاردىڭ ارقاسىندا سۋ تاسقىنىنىڭ ءارى قاراي تارالۋىنا جول بەرمەدىك.
قازىر سۋ تاسقىنىنىڭ زارداپتارىن جويۋ، تازالاۋ جۇمىستارى جۇرگىزىلۋدە.
قوعامدىق ءتارتىپ پەن تۇرعىنداردىڭ دۇنيە-مۇلكىنىڭ ساقتالۋىن قامتاماسىز ەتۋ باستى نازاردا.
ءبىز اۋداننىڭ كۇندەلىكتى تىرشىلىگىن قايتا قالپىنا كەلتىرۋ ءۇشىن قاجەتتى شارالار قابىلدايمىز.
جالپى كۇزگە دەيىن قيراعان ۇيلەردىڭ ورنىنا جاڭا تۇرعىن ۇيلەر سالىنادى.
زارداپ شەككەن ءاربىر ادامعا 100 مىڭ تەڭگە كولەمىندە وتەماقى تولەنەدى.
مال شىعىنى، تاسقىننىڭ اۋىل شارۋاشىلىعى القاپتارىنا تيگىزگەن زيانى وتەلەدى.
جالپى، زارداپ شەككەن اۋىلداردىڭ ءاربىر ازاماتى قامقورلىقسىز قالمايدى. ولارعا جاردەم بەرەمىز.
زارداپ شەككەن اۋدانعا كومەكتەسىپ جاتقان ازاماتتاردىڭ بارىنە ريزاشىلىعىمدى بىلدىرەمىن.
تاسقىن بولعان جەردە اكىمدىك، سونداي-اق، قورعانىس مينيسترلىگى، ۇلتتىق ۇلان مەن توتەنشە جاعداي جونىندەگى كوميتەت بولىمشەلەرى جانە پوليتسيا قىزمەتكەرلەرى جۇمىس ىستەۋدە.
وتاندىق جانە شەتەلدىك ءىرى بيزنەس وكىلدەرى دە زارداپ شەككەن تۇرعىندارعا ايتارلىقتاي كومەك بەرگەنىن ەرەكشە اتاپ وتكەن ءجون.
مۇنداي ازاماتتاردى حالقىمىزدىڭ شىنايى پاتريوتتارى، تىلەۋلەستەرى دەۋگە بولادى.
بارشاڭىزعا العىس ايتامىن!
قازاقستاندىقتار بۇل جولى دا ءبىر جەڭنەن قول، ءبىر جاعادان باس شىعارا ءبىلدى.
ءبىز بىرگە بولساق، بارلىق قيىندىققا توزەمىز.
كەز كەلگەن مىندەتتى ورىنداۋعا مۇمكىندىگىمىز جەتەدى.
* * *
ءبىز كۇردەلى كەزەڭدى باستان وتكەرۋدەمىز.
حالقىمىزدىڭ بەكەم بىرلىگى بارىمىزگە كۇش-قۋات بەرەدى.
جۇمىلا كوتەرگەن جۇك جەڭىل.
ءبىز بۇعان دەيىن تالاي سىناقتان سۇرىنبەي وتتىك. بۇل قيىندىقتى دا ەڭسەرەمىز دەپ سەنەمىن.
