ەۋروپادا جوعارى ءبىلىم قازاقستاننان ارزان. بۇل جايلى KAZGUU ۋنيۆەرسيتەتىنىڭ باسقارما توراعاسى تالعات نارىكباەۆ قازاقستان ستۋدەنتتەرى اليانسى مۇشەلەرى جانە 100-دەن استام جوعارى وقۋ ورىندارىنىڭ بەلسەندى جاستارىمەن بولعان ونلاين كەزدەسۋىندە مالىمدەدى، دەپ حابارلايدى «ادىرنا» ۇلتتىق پورتالى.
«مەنىڭشە، ستۋدەنت جوعارى ءبىلىم ءۇشىن اقشا تولەمەۋى ءتيىس. وسى ۋاقىتقا دەيىن ەۋروپادا جوعارى ءبىلىم اقىسى ارزان بولعانىنا تاڭعالاتىن ەدىك. مىسالى يسپانيالىق ستۋدەنتتەر جىلىنا ءبىر مىڭ ەۆرو تولەيدى. قازاقستاندىق كەيبىر جوو-لاردا وقۋ اقىسى ودان الدەقايدا قىمبات. يسپانيالىق رەكتوردان وقىتۋشىلارىنىڭ جالاقىسىن سۇراعانىمدا، ايىنا 4-5 مىڭ ەۆرو ايلىق الاتىنىن ايتتى. ويتكەنى مەملەكەت وقۋ ورىندارىن تىكەلەي قارجىلاندىرىپ، ايلىقتى دا ءوزى تولەيدى. سوندىقتان ولار قوسىمشا شىعىندارىن وتەۋ ءۇشىن عانا ستۋدەنتتەن جىلىنا 1 مىڭ ەۆرو الادى»، - دەپ ءتۇسىندىردى ول.
توراعانىڭ ايتۋىنشا، قازاقستاندىق جوعارى وقۋ ورىندارى ستۋدەنتكە كليەنت رەتىندە قارايدى. شىن مانىسىندە، ۋنيۆەرسيتەتتىڭ كليەنتى ستۋدەنت ەمەس – جۇمىس بەرۋشى. ويتكەنى نارىقتا جۇمىس بەرۋشىگە ساپالى ءبىلىم الىپ شىققان، باسەكەگە قابىلەتتى ماماندار قاجەت.
«جوعارى ءبىلىم بيزنەسكە اينالماۋى كەرەك. ستۋدەنت جوعارى ءبىلىم ءۇشىن اقشا تولەمەۋى ءتيىس. ۋنيۆەرسيتەت نەگىزىنەن حالقىنا، ەلىنە قىزمەت ەتۋى شارت. ۋنيۆەرسيتەت - كوممەرتسيالىق ەمەس، الەۋمەت الدىنداعى جاۋاپكەرشىلىگى بار ۇيىم. ستۋدەنتتەردىڭ ءبىلىمى مەن تاجىريبەسىن ولاردىڭ اقشالارى ەسەبىنەن دامىتۋ مۇمكىن ەمەس. سەبەبى ساپالى ءبىلىم بەرۋدى ۇيىمداستىرۋدا از قاراجات جۇمسالمايدى. سوندىقتان ءبىلىم ساپاسىن ارتتىرعىمىز كەلسە، وقىتۋشىلاردىڭ جالاقىسىن مەملەكەت تىكەلەي قارجىلاندىرۋى كەرەك (يسپانيا، گەرمانيا نەمەسە نيدەرلاندىداعىداي), ال ۋنيۆەرسيتەت قارجىلاندىرۋدىڭ باسقا كوزدەرىن قاراستىرۋى قاجەت. مىسالى، كازگيۋ جەكە اقىلى كۋرستاردى، بىلىكتىلىكتى ارتتىرۋ باعدارلامالارىن ۇسىنادى، عىلىمي زەرتتەۋ جۇمىستارىن جۇرگىزەدى. سونداي-اق ەنداۋمەنت قورى بار. وندا ءبىزدىڭ تۇلەكتەرىمىز، مەتسەناتتار ستۋدەنتتەردى وقىتۋعا جانە ۋنيۆەرسيتەتتىڭ ماتەريالدىق-تەحنيكالىق بازاسىن جاقسارتۋعا كومەكتەسەدى»،-دەپ ءسوزىن قورىتىندىلادى نارىكباەۆ.
«ادىرنا» ۇلتتىق پورتالى
