شىمكەنت قالاسىندا وتەمىس ەلدىمەكەنىندە ورنالاسقان «وتەمىس» كانالىنىنىڭ سۋ وتكىزۋ قابىلەتتىلىگىن، سىيىمدىلىعىن ارتتىرۋ ءۇشىن 10 شاقىرىمعا بەتوندالعان كۇردەلى جوندەۋ جۇمىستارى جۇرگىزىلۋدە. جوندەۋ جۇمىستارى جوسپارعا سايكەس جىل سوڭىنا دەيىن اياقتالادى.
كانالداعى اتقارىلىپ جاتقان قۇرىلىس جۇمىستارىنىڭ بارىسىمەن تانىسۋ ءۇشىن شىمكەنت قالاسىنىڭ اۋىلشارۋاشىلىق جانە ۆەتەريناريا باسقارماسىنىڭ باسشىسى اسقار قانىبەكوۆ پەن قاراتاۋ اۋدانىنىڭ اكىمى ابزال الىقۇلوۆ شاپىراشتى جانە وتەمىس ەلدىمەكەنىنە بارىپ، ونداعى تۇرعىندارمەن كەزدەستى.
كەزدەسۋ بارىسىندا «وتەمىس» كانالىندا ءجۇرىپ جاتقان قۇرىلىس جۇمىستارى تۋرالى ەلدىمەكەن تۇرعىندارى تاراپىنان كوتەرىلگەن ماسەلەلەر، ءوتىنىش-تىلەكتەرى تىڭدالدى.
كانالدىڭ جالپى ۇزىندىعى 10 شاقىرىم، ال ىرگەلەس جاتقان جەر كولەمى 369 گا. قازىرىگى تاڭداعى سۋ وتكىزۋ قابىلەتتىلىگى 1 تەكشە مەتردى قۇرايدى. كانالدان وتەمىس ەلدىمەكەنى تۇرعىندارىنىڭ 312 ءۇي ىرگەلىك جانە 15,6 گا جەرلەرىنە اعىن سۋ جەتكىزىلەدى. كانالدىڭ سۋ وتكىزۋ قابىلەتتىلىگى تومەن بولعاندىقتان، قازىر تەك 90 گەكتار جەر عانا پايدالانىلىپ جاتىر.
قالالىق اۋىلشارۋاشىلىق جانە ۆەتەريناريا باسقارماسىنىڭ باسشىسى اسقار قانىبەكوۆتىڭ ايتۋىنشا، جوندەۋ جۇمىستارى تولىق اياقتالار بولسا، مۇندا 369 گa ەگىس القابى تولىعىمەن يگەرىلىپ، سۋ وتكىزۋ قابىلەتتىلىگى 1,5 تەكشە مەترگە دەيىن ۇلعايادى دەيدى. سونداي-اق، جىلىنا 250 توننا كوكونىس داقىلدارى، 100 توننا ءداندى-داقىلدار جانە 350 توننا مال ازىعىن دايىنداۋعا مۇمكىنشىلىك بولادى.
شىمكەنت قالاسى اكىمىنىڭ ءباسپاسوز قىزمەتى
