COVID-19 كوروناۆيرۋستىق ينفەكتسياسىنىڭ ىقتيمال ەكىنشى تولقىنىنا دايىندىق بويىنشا جەدەل مەديتسينالىق كومەك كورسەتۋ ستانتسياسىنىڭ قىزمەتكەرلەرى اۋقىمدى اتتەستاتسيادان وتۋدە.
قالالىق دەنساۋلىق ساقتاۋ باسقارماسىنىڭ مالىمەتىنشە، اتتەستاتسيادان بارلىعى 900 مەديتسينا مامانىن وتكىزۋدى جوسپارلاپ وتىر ەكەن.
«بۇگىننەن باستاپ مەديتسينا قىزمەتكەرلەرىنىڭ بىلىكتىلىگىن ارتتىرۋ ماقساتىندا جەدەل جاردەم ستانتسيا قىزمەتكەرلەرىن جاپپاي اتتەستاتسيادان وتكىزۋدەمىز. ياعني، العاشقى كومەك كورسەتۋ جانە ناۋقاستاردىڭ ءتورت دارەجەسىن (جەڭىل، قوسىمشا اۋرۋى جوق ورتا، قوسىمشا اۋرۋى بار ورتا جانە اۋىر) انىقتاۋ بويىنشا وقىتىلادى. بۇل اتتەستاتسيانىڭ ماڭىزى زور. سەبەبى وسى ارقىلى مامانداردىڭ بىلىكتىلىگىن انىقتاپ، ودان ءارى دامىتۋ بارىسىن باعامداي الامىز»، – دەيدى شىمكەنت قالاسىنىڭ دەنساۋلىق ساقتاۋ باسقارماسى باسشىسىنىڭ مىندەتى اتقارۋشىسى باقىتجان پوزيلوۆ.
سونداي-اق، بۇل شارالار ەپيدەميامەن كۇرەسۋ كەزىندە العى شەپتە قىزمەت ەتەتىن جەدەل جاردەم قىزمەتكەرلەرىنىڭ ماماندارى ءۇشىن اسا قاجەت ەكەنىن جەتكىزدى.
ايتا كەتەيىك، بىلىكتىلىكتى ارتتىرۋ اتتەستاتسياسى ءبىر ۋاقىتتا توعىز جەدەل جاردەم بەكەتىندە ءوتىپ جاتىر.
شىمكەنت قالاسى اكىمىنىڭ ءباسپاسوز قىزمەتى
