بۇگىن قالا اكىمى مۇرات ايتەنوۆكە 9 ايدىڭ قورىتىندىسى بويىنشا اباي اۋدانىنىڭ اكىمى بۇحارباي پارمانوۆ ەسەپ بەردى.
ەسەپتى كەزدەسۋگە قالا اكىمىنىڭ ورىنباسارلارى، باسقارما باسشىلارى مەن اۋداندىق پوليتسيا بولىمدەرىنىڭ باسشىلارى قاتىستى. اۋدان اكىمى ءوز بايانداماسىندا 9 ايداعى اتقارىلعان جۇمىستارىن، جەتكەن جەتىستىكتەرىن ايتتى.
اۋداننىڭ بارلىق مۇمكىندىكتەرىن باعامداعان مۇرات ايتەنوۆ كەيبىر سالالار بويىنشا ءبىرماشا ەسكەرتۋلەر جاساپ، ناقتى تاپسىرمالار جۇكتەدى.
ماسەلەن، شالعاي ەلدى مەكەندەرى بار اباي اۋدانى اۋىل شارۋشىلىعىن دامىتۋعا قولايلى ولكە. جالپى مۇندا اۋىل شارۋاشىلىعىنا ارنالعان جەر كولەمى 26 مىڭ گەكتاردان اسادى. ءتورت تۇلىك سانى بىلتىرعى جىلعا قاراعاندا 44 پايىزعا وسكەن. شارۋاشىلىقتى دامىتۋعا 197 ملن تەڭگە كولەمىندە سۋبسيديا بولىنگەن. وسىنى تىلگە تيەك ەتكەن قالا اكىمى ەت جانە ءسۇت ءونىمىن ءوندىرۋ ازايعانىن ايتتى. اۋىل شارۋاشىلىعى ونىمدەرى قالانى ءالى كۇنگە دەيىن تولىق قامتاماسىز ەتە الماي وتىرعانىن سىنادى.
- ءاربىر تۇرعىن الاپتار مەن شاعىن اۋداننىڭ جەكە پوتەنتسيالىن زەردەلەي وتىرا، بارلىق ەلدى مەكەندى جۇمىلدىرىپ اۋىل شارۋاشىلىعىن دامىتۋدىڭ ناقتى جۇيەسى جاسالۋ كەرەك. سونىمەن قاتار، مال بورداقىلاۋ ورىندارىنا اسا ءمان بەرىلسىن. سانيتارلىق نورمالاردىڭ قاتاڭ ساقتالۋى باقىلاۋعا الىنسىن، - دەدى مۇرات ايتەنوۆ.
ودان وزگە، اۋداندا تۇرعىن ءۇي سالۋ قۇرىلىسىنىڭ باسەڭدەگەنىن جەتكىزدى. وسى بويىنشا اۋدانعا ينۆەستورلار تارتىپ، ولارعا قولايلى جاعداي جاساۋ جونىندە اۋدان اكىمدىگى مەن تۇرعىن ءۇي باسقارماسىنىڭ باسشىسىنا تاپسىرما بەردى. اپاتتى جاعدايداعى ۇيلەرگە ءمان بەرىپ، كوپ قاباتتى ۇيلەردىڭ قاسبەتتەرىن رەتكە كەلتىرۋ كەرەكتىگىن ايتتى.
شاھار باسشىسى دەبيتورلىق قارىزدار جونىندە دە ەسكەرتۋ جاسادى. «قارىزدار جىلۋ ماۋسىمى باستالماي تۇرىپ ءوندىرىلۋى كەرەك. بۇل ماسەلەنى شەشۋ ءۇشىن جاقىن ارادا ۇسىنىس دايىنداڭىزدار» - دەدى.
قورىتىندىلاي كەلە، پرەزيدەنت تاپسىرماسىنا سايكەس حالىقپەن كەرى بايلانىستى كۇشەيتۋدى تاپسىردى. iKomek ارقىلى ماسەلەگە جەدەل دەن قويىلىپ، قالا تۇرعىندارى اتقارىلعان جۇمىستى كورە الۋى ماڭىزدى ەكەنىن ايتتى. سونداي-اق، رەتسىز ساۋدا ورىندارى، جابىق بازار مەن ونداعى جانۋارلار ساۋداسىن تەز ارادا رەتكە كەلتىرۋدى تاپسىردى. مۇرات دۇيسەنبەكۇلى - اكىمدىكتەر زاڭسىزدىققا قارسى ارەكەتسىز قالماۋى كەرەك دەپ ءسوزىن تۇيىندەدى.
شىمكەنت قالاسى اكىمىنىڭ ءباسپاسوز قىزمەتى
