شىمكەنت قالاسىنىڭ اكىمى مۇرات ايتەنوۆ ءال-فارابي اۋدانىن ارالاپ، ونداعى قوردالانعان ماسەلەلەرمەن تانىستى.
اتاپ ايتقاندا، دەندروساياباق اۋماعىنداعى قاراۋسىز قالعان بالالار تەمىر جول ستانتسياسىنا باردى. ونداعى جاعدايمەن تانىسقان شاھار باسشىسى نىساندى حالىق يگىلىگىنە بەرۋدىڭ جولدارىن قاراستىرۋدى تاپسىردى.
مۇنان كەيىن اۋدان اۋماعىنداعى كانالداردى ارالاپ كوردى. اقباستاۋ كانالى ارناسىنىڭ 535 مەتر اۋماعىن بەتونداسا، سول ماڭايدا تۇراتىن تۇرعىندار ەگىنشىلىكتى قولعا الاتىندارىن ايتۋدا. مۇرات ايتەنوۆ اتالعان جۇمىستارعا بيۋدجەتتەن قارجى ءبولۋدى قاراستىرۋ قاجەتتىگىن ايتتى.
ودان وزگە، تەكەسۋ تۇرعىن الابىنداعى ماسەلەلەرمەن تانىستى. تۇرعىن الاپ تۇرعىندارى بيىل ساپالى اۋىزسۋمەن قامتاماسىز ەتىلەتىن بولدى. قالا اكىمىمەن جولىققان تۇرعىندار مەكتەپ سالىپ بەرۋ جونىندەگى ءوز وتىنىشتەرىن دە جەتكىزدى. ءوتىنىش نەگىزىندە قالا باسشىسى جاۋاپتى باسقارما باسشىلارىنا بالاباقشا مەن مەكتەپ جوباسىن دايىنداۋدى جۇكتەدى.
ال، ساۋلە شاعىن اۋدانىنداعى 276 ورامدى ينجەنەرلىك-ينفراقۇرىلىممەن قامتاماسىز ەتۋ كەزەڭ-كەزەڭىمەن جۇرگىزۋلە. ورامدى ەلەكتر جۇيەسىمەن قامتاماسىز ەتۋ ماقساتىندا، دەمەۋشىلەر تاراپىنان 25 باعانا، 2 شاقىرىم سىمدار جانە قۇاتتىلىعى 160 كۆت كوتەرەتىن ترانسفورماتور ورناتىلعان. بۇگىنگى كۇنگە 150-گە جۋىق جەكە تۇرعىن ءۇي ەلەكتر قۋاتىمەن قامتاماسىز ەتىلۋدە. ودان بولەك، جوعارىدا اتالعان اۋماقتى ساپالى اۋىز سۋمەن قامتاماسىز ەتۋ ءۇشىن، دەمەۋشىلەر تاراپىنان 350 مەترگە جۋىق سۋ قۇبىرىنىڭ قازبا جۇمىستارى جۇرگىزىلىپ، اۋىز سۋ جۇيەسى تۇرعىنداردىڭ يگىلىگىنە پايدالانۋعا بەرىلگەن.
قالا باسشىسى ءوزىنىڭ ءجىتى باقىلاۋىنا العان شالعايدا ونالاسقان 195 ورامعا دا باردى. مۇندا «ومەگا ستروي» جشس تاراپىنان 10/0,4 كۆ ەلەكتر جەلىلەرىنىڭ قۇرىلىس-مونتاج جۇمىستارى تولىعىمەن اياقتالىپ، تۇرعىنداردىڭ يگىلىگىنە بەرىلدى. اۋىز سۋ جانە تابيعي گازبەن قامتۋ ماسەلەسى جىل سوڭىنا دەيىن شەشىمىن تاباتىن بولدى.
شىمكەنت قالاسى اكىمىنىڭ ءباسپاسوز قىزمەتى
