Shymkent qalasynyń ákimi Murat Áıtenov Ál-Farabı aýdanyn aralap, ondaǵy qordalanǵan máselelermen tanysty.
Atap aıtqanda, dendrosaıabaq aýmaǵyndaǵy qaraýsyz qalǵan balalar temir jol stanııasyna bardy. Ondaǵy jaǵdaımen tanysqan shahar basshysy nysandy halyq ıgiligine berýdiń joldaryn qarastyrýdy tapsyrdy.
Munan keıin aýdan aýmaǵyndaǵy kanaldardy aralap kórdi. Aqbastaý kanaly arnasynyń 535 metr aýmaǵyn betondasa, sol mańaıda turatyn turǵyndar eginshilikti qolǵa alatyndaryn aıtýda. Murat Áıtenov atalǵan jumystarǵa bıýdjetten qarjy bólýdi qarastyrý qajettigin aıtty.
Odan ózge, Tekesý turǵyn alabyndaǵy máselelermen tanysty. Turǵyn alap turǵyndary bıyl sapaly aýyzsýmen qamtamasyz etiletin boldy. Qala ákimimen jolyqqan turǵyndar mektep salyp berý jónindegi óz ótinishterin de jetkizdi. Ótinish negizinde qala basshysy jaýapty basqarma basshylaryna balabaqsha men mektep jobasyn daıyndaýdy júktedi.
Al, Sáýle shaǵyn aýdanyndaǵy 276 oramdy ınjenerlik-ınfraqurylymmen qamtamasyz etý kezeń-kezeńimen júrgizýle. Oramdy elektr júıesimen qamtamasyz etý maqsatynda, demeýshiler tarapynan 25 baǵana, 2 shaqyrym symdar jáne quattylyǵy 160 kVt kóteretin transformator ornatylǵan. Búgingi kúnge 150-ge jýyq jeke turǵyn úı elektr qýatymen qamtamasyz etilýde. Odan bólek, joǵaryda atalǵan aýmaqty sapaly aýyz sýmen qamtamasyz etý úshin, demeýshiler tarapynan 350 metrge jýyq sý qubyrynyń qazba jumystary júrgizilip, aýyz sý júıesi turǵyndardyń ıgiligine paıdalanýǵa berilgen.
Qala basshysy óziniń jiti baqylaýyna alǵan shalǵaıda onalasqan 195 oramǵa da bardy. Munda «Omega Stroı» JShS tarapynan 10/0,4 kV elektr jelileriniń qurylys-montaj jumystary tolyǵymen aıaqtalyp, turǵyndardyń ıgiligine berildi. Aýyz sý jáne tabıǵı gazben qamtý máselesi jyl sońyna deıin sheshimin tabatyn boldy.
Shymkent qalasy ákiminiń baspasóz qyzmeti
