بيىل شىمكەنت قالاسى ءال-فارابي اۋدانىنا قاراستى «بادام» شاعىن اۋدانىن (195 ورام) ساپالى ەلەكتر جارىعىمەن قامتاماسىز ەتۋگە بيۋدجەتتەن 253 ملن. تەڭگە قارالدى. بۇل قارجىعا «ومەگا ستروي» جشس-ءى تاراپىنان 10/0,4 كۆ ەلەكتر جەلىلەرىنىڭ قۇرىلىس-مونتاج جۇمىستارى اتقارىلدى. بۇگىندە نىسان قۇرىلىسى تولىعىمەن اياقتالىپ، تۇرعىنداردىڭ يگىلىگىنە بەرىلدى.
بۇل تۋرالى شىمكەنت قالاسىنىڭ اكىمى مۇرات ايتەنوۆكە 9 ايدا اتقارىلعان جۇمىستار تۋرالى ەسەپ بەرگەن ءال-فارابي اۋدانىنىڭ اكىمى عابيت ماۋلەنقۇلوۆ مالىمدەدى.
اۋدان اكىمىنىڭ ايتۋىنشا، «بادام» شاعىن اۋدانىن اۋىز سۋمەن قامتاماسىز ەتۋدى مەردىگەر مەكەمە «سارىاعاش امان» جشس-ءى مامىر ايىندا باستادى. نىسان قۇرىلىسىن جىل سوڭىنا دەيىن اياقتاۋ جوسپارلانۋدا.
سونداي-اق، 195 ورامدى تابيعي گازبەن قامتۋ جۇمىستارىن مەردىگەر مەكەمە «كومبي ستروي 1» جشس-ءى اتقارۋدا.
سونداي-اق، «ساۋلە» شاعىن اۋدانىن ينجەنەرلىك-ينفراقۇرىلىممەن قامتاماسىز ەتۋ ءۇشىن جوبالىق-سمەتالىق قۇجاتتاما ازىرلەنۋدە. وسى ماقساتتا «مپك-پروەكت» جشس-ىمەن كەلىسىم-شارت تۇزىلگەن.
ايتا كەتەيىك، ءال-فارابي قالانىڭ ورتالىق اۋدانى بولعاندىقتان اۋىز سۋ، تابيعي گاز جانە ەلەكتر قۋاتىمەن قامتۋ كورسەتكىشى 99,7 پروتسەنتتى قۇراپ وتىر.
شىمكەنت قالاسى اكىمدىگىنىڭ ءباسپاسوز قىزمەتى
