شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان «HR-Process» ءبىلىم سالاسىنىڭ كادرلارىن ىرىكتەۋدىڭ اۆتوماتتاندىرىلعان اقپاراتتىق-تالداۋ جۇيەسى ارقىلى جۇمىسقا ورنالاسقان پەداگوگتارمەن كەزدەستى. كەزدەسۋگە قالالىق ءبىلىم باسقارماسى باسشىسى جانات تاجيەۆا، ءبىلىم بەرۋ ۇيىمدارى باسشىلارىن تاعايىنداۋ ساتىسىندا باسشىلىق ەتەتىن كوميسسيا قۇرامى، بىرقاتار مەكتەپ ديرەكتورلارى مەن اتالعان جۇيە ارقىلى جۇمىسقا ورنالاسقان ۇستازدار قاتىستى.
وندا قالا اكىمىنىڭ ءبىرىنشى ورىنباسارى ءبىلىم بەرۋ ۇيىمدارىنىڭ ءبىرىنشى باسشىلارىن تاعايىنداۋدا دا مەيلىنشە اشىقتىقتى قامتاماسىز ەتىپ، قوعام الدىندا بۇل پروتسەسس ۇلكەن سەنىمگە يە بولۋى قاجەتتىگىن ايتتى. سونداي-اق، اۆتوماتتاندىرىلعان اقپاراتتىق-تالداۋ جۇيەسىن ودان ءارى دامىتۋ مەن ورىن العان كەمشىلىكتەر جونىندە ءسوز قوزعادى.
«كادرلاردى ىرىكتەۋدىڭ اشىق جانە وبەكتيۆتى جۇيەسى – ءبىلىم سالاسىنا ۇزدىك مامانداردى تارتۋدىڭ كەپىلى بولادى. مىنە، 2 ايعا جۋىق ۋاقىتتاعى قالىپتاسقان وڭ پىكىر وسى جۇمىسىمىزدىڭ جەمىستى بولعانىن كورسەتىپ وتىر. قالا اكىمىنىڭ تاپسىرماسىنا وراي ەندىگى كەزەكتە كوللەدجدەر مەن مەكتەپكە دەيىنگى ءبىلىم بەرۋ مەكەمەلەرىن جۇيەگە قوسۋ جانە كەلەر جىلدان باستاپ پەداگوگتاردى اتتەستاتتاۋ جۇيەسىن اۆتوماتتاندىرۋ قاجەت» - دەدى شىڭعىس مۇقان.
باعدارلاما ارقىلى جۇمىسقا ورنالاسقانداردىڭ ءبىرى – گۇلنۇر سۇلەيمەن. ول قازاق مەملەكەتتىك قىزدار ۋنيۆەرسيتەتىنىڭ قىزىل ديپلوم يەگەرى. قىتايدىڭ شانحاي قالاسىنداعى IS-China ۋنيۆەرسيتەتىنىڭ تۇلەگى. ماگيستراتۋرانى ۇزدىك ديپلوممەن بىتىرگەن. گۇلنۇر مىرزابايقىزى «HR-Process» جۇيەسى ارقىلى بوس ورىندارعا ءوتىنىم بەرىپ، كونكۋرس ناتيجەسىندە №132 جالپى ورتا مەكتەبىنىڭ اعىلشىن ءپانى مۇعالىمى بولىپ جۇمىسقا ورنالاسقان.
ايتا كەتەيىك، تامىزدان باستاپ ىسكە قوسىلعان جۇيەدە جاريالانعان بوس جۇمىس ورىندارعا ۇمىتكەرلەر تاراپىنان 2470 ءوتىنىم كەلىپ تۇسكەن. بۇگىنگى كۇنى 460 بوس جۇمىس ورنىنىڭ بارلىعىنا كوميسسيانىڭ وتىرىسى وتكىزىلدى. كوميسسيا وتىرىسىندا 665 ۇمىتكەردىڭ 2328 ءوتىنىشى قارالدى ء(بىر ۇمىتكەر ءارتۇرلى مەكتەپتەرگە بىرنەشە ءوتىنىم بەرە الادى). 665 ۇمىتكەردىڭ ىشىنەن 313 ۇمىتكەر كونكۋرس ناتيجەلەرى بويىنشا جەڭىمپاز بولىپ تابىلدى جانە تيىسىنشە مەكتەپ ديرەكتورلارىنا بوس ورىنعا ۇسىنىلدى. جەڭىمپازداردىڭ جاس ەرەكشەلىكتەرىنە توقتالار بولساق، 25 جاسقا دەيىنگى – 145, 25-45 جاس ارالىعى - 137, 45 جاستان جوعارى - 31 ۇمىتكەر بولعان.
شىمكەنت قالاسى اكىمىنىڭ ءباسپاسوز قىزمەتى
