Shymkent qalasy ákiminiń birinshi orynbasary Shyńǵys Muqan «HR-Process» bilim salasynyń kadrlaryn irikteýdiń avtomattandyrylǵan aqparattyq-taldaý júıesi arqyly jumysqa ornalasqan pedagogtarmen kezdesti. Kezdesýge qalalyq bilim basqarmasy basshysy Janat Tájıeva, bilim berý uıymdary basshylaryn taǵaıyndaý satysynda basshylyq etetin komıssııa quramy, birqatar mektep dırektorlary men atalǵan júıe arqyly jumysqa ornalasqan ustazdar qatysty.
Onda qala ákiminiń birinshi orynbasary bilim berý uıymdarynyń birinshi basshylaryn taǵaıyndaýda da meılinshe ashyqtyqty qamtamasyz etip, qoǵam aldynda bul proess úlken senimge ıe bolýy qajettigin aıtty. Sondaı-aq, avtomattandyrylǵan aqparattyq-taldaý júıesin odan ári damytý men oryn alǵan kemshilikter jóninde sóz qozǵady.
«Kadrlardy irikteýdiń ashyq jáne obektıvti júıesi – bilim salasyna úzdik mamandardy tartýdyń kepili bolady. Mine, 2 aıǵa jýyq ýaqyttaǵy qalyptasqan oń pikir osy jumysymyzdyń jemisti bolǵanyn kórsetip otyr. Qala ákiminiń tapsyrmasyna oraı endigi kezekte kolledjder men mektepke deıingi bilim berý mekemelerin júıege qosý jáne keler jyldan bastap pedagogtardy attestattaý júıesin avtomattandyrý qajet» - dedi Shyńǵys Muqan.
Baǵdarlama arqyly jumysqa ornalasqandardyń biri – Gúlnur Súleımen. Ol Qazaq memlekettik qyzdar ýnıversıtetiniń qyzyl dıplom ıegeri. Qytaıdyń Shanhaı qalasyndaǵy IS-China ýnıversıtetiniń túlegi. Magıstratýrany úzdik dıplommen bitirgen. Gúlnur Myrzabaıqyzy «HR-Process» júıesi arqyly bos oryndarǵa ótinim berip, konkýrs nátıjesinde №132 jalpy orta mektebiniń aǵylshyn páni muǵalimi bolyp jumysqa ornalasqan.
Aıta keteıik, tamyzdan bastap iske qosylǵan júıede jarııalanǵan bos jumys oryndarǵa úmitkerler tarapynan 2470 ótinim kelip túsken. Búgingi kúni 460 bos jumys ornynyń barlyǵyna komıssııanyń otyrysy ótkizildi. Komıssııa otyrysynda 665 úmitkerdiń 2328 ótinishi qaraldy (bir úmitker ártúrli mektepterge birneshe ótinim bere alady). 665 úmitkerdiń ishinen 313 úmitker konkýrs nátıjeleri boıynsha jeńimpaz bolyp tabyldy jáne tıisinshe mektep dırektorlaryna bos orynǵa usynyldy. Jeńimpazdardyń jas erekshelikterine toqtalar bolsaq, 25 jasqa deıingi – 145, 25-45 jas aralyǵy - 137, 45 jastan joǵary - 31 úmitker bolǵan.
Shymkent qalasy ákiminiń baspasóz qyzmeti
