مۇنداي تاپسىرمانى قالا اكىمى مۇرات ايتەنوۆ ازاماتتاردى جەكە ماسەلەلەرىمەن قاشىقتىقتان قابىلداۋ بارىسىندا ەنەرگەتيكا جانە كوممۋنالدىق شارۋاشىلىق باسقارماسىنىڭ باسشىسىنا بەردى.
ونلاين قابىلداۋ بارىسىندا قاراتاۋ اۋدانىنىڭ تۇرعىنى ا.ايداروۆ 189 ورامداعى گاز ماسەلەسىن كوتەرىپ، جارىق پەن اۋىز سۋدىڭ ءجيى وشەتىنى تۋرالى شاعىمىن جەتكىزدى.
وسى رەتتە، قالا باسشىسى تۇرعىندار قىزمەتتەرگە ۇزدىكسىز اقى تولەيتىنىن ايتىپ، سالالىق جەتەكشىلەرگە ەلەكتر جارىعى مەن اۋىز سۋدا تۇراقتى بەرىلۋى ءتيىس ەكەنىن جەتكىزدى. سونىمەن قاتار، تابيعي گازدىڭ اعىمداعى جىلدىڭ 1 جەلتوقسانىنا دەيىن بەرىلۋىن قاتاڭ باقىلاۋعا الۋدى تاپسىردى.
انىقتاما:
شىمكەنت قالاسىنىڭ تابيعي گاز كوزدەرىنىڭ قۋاتتىلىعى اگرس-1, اگرس-4 «شىمكەنت» 180 000 م3/ساع قۇرايدى. ال بۇگىنگى تاڭداعى قالانىڭ قاجەتتىلىگى - 250 000 م3/ساع قۇراپ وتىر. جىلىتۋ ماۋسىمى باستالعان كەزدە قولدانىستاعى اۆتوماتتاندىرىلعان گاز تاراتۋشى ستانسالارى 100% جۇمىس اتقارۋدا.
اتالعان ماسەلەنى شەشۋ ماقساتىندا، 250 000 م3/ساع قۇرايتىن اۆتوماتتاندىرىلعان گاز تاراتۋ ستانساسىنىڭ ء(ارى قاراي-اگرس-3) قۇرىلىس جۇمىستارى «StroyGazCompany» جشس تاراپىنان جۇرگىزىلۋدە.
اگرس-3 نىسانىنىڭ قۇرىلىس جۇمىستارى اعىمداعى جىلدىڭ قاراشا ايىندا اياقتالسا، شىمكەنت قالاسىندا تۇتىنۋشىلاردى ساپالى جانە ۇزدىكسىز تابيعي گازبەن قامتاماسىز ەتۋگە بولادى.
بۇدان بولەك، قابىلداۋدا تۇرعىندار جەر، جول، قوعامدىق كولىك پەن جۇمىسپەن قامتۋ تۋرالى ساۋالدارىن جولدادى. بارلىق ساۋالداردى مۇقيات تىڭداعان اكىم كوتەرىلگەن ءاربىر ماسەلە بويىنشا قالادا ءتيىستى جۇمىستار اتقارىلىپ جاتقانىن ايتىپ، رەت-رەتىمەن شەشىلەتىنىن جەتكىزدى.
شىمكەنت قالاسى اكىمىنىڭ ءباسپاسوز قىزمەتى
