شىمكەنتتە «تاۋەلسىز مەملەكەتتەر دوستاستىعىنىڭ مادەني استاناسى» جىلى اياسىندا «شىمكەنت – قايىرىمدى قالا» بالالار شىعارماشىلىعىنا ارنالعان ونلاين-فەستيۆال ءوز مارەسىنە جەتتى. دوستاستىق ەلدەرى اراسىندا وتكەن شاراعا 6 جاستان 15 جاسقا دەيىنگى جالپى سانى 500-گە جۋىق بالا قاتىستى. ونىڭ ىشىندە تمد ەلدەرىنەن 20 بالا، قازاقستان رەسپۋبليكاسىنان – 479 قاتىسۋشى ءۇش نوميناتسيا بويىنشا ءوز شىعارمالارىن جولدادى. فەستيۆالدىڭ باعدارلاماسى «ۆوكالدىق شىعارماشىلىق»، «اسپاپتا ورىنداۋ»، «بەينەلەۋ ونەرى» نوميناتسيالارى بويىنشا جۇرگىزىلدى.
بالالار شىعارماشىلىعىنا ارنالعان ونلاين-فەستيۆالدىڭ بارلىق قاتىسۋشىلارىنا قالا اكىمىنىڭ اتىنان ارنايى ديپلومدار تابىستالدى.
فەستيۆال اياسىندا رەسەي، وزبەكستان، قىرعىزستان ەلدەرىنىڭ ونەرلى بالالارى ەرەكشە بەلسەندىلىك تانىتتى. سولاردىڭ قاتارىندا، ۆوكال بويىنشا سوچي قالاسىنان قاتىسقان «Voc time» كۆارتەتى جانە ناسيبۋللينا داميرا، قىرعىزستاننان جانيبەكوۆا ساۋلە ءوز ۇلتىنىڭ حالىق اندەرىن جوعارى دارەجەدە ورىندادى. وزبەكستاندىق - سۋلتانوۆا شاحزودا، ابدۋراحمانوۆا ديورا، ميرپۋلاتوۆ ميرزا-شۋحرات، ميرجاليلوۆا مادينا ەسىمدى سۋرەتشى جاستار «بەينەلەۋ ونەرى» نوميناتسياسى بويىنشا دوستاستىق ەلدەرى تاقىرىبىندا جاڭا تۋىندىلارىمەن فەستيۆالدىڭ جاندانۋىنا اتسالىستى.
قازاقستاندىق قاتىسۋشى جاس ونەرپازدار دا ءۇش نوميناتسيا بويىنشا تاقىرىپتى كەڭىنەن اشا ءبىلدى. اتاپ ايتقاندا: «بەينەلەۋ ونەرى» نوميناتسياسىندا قىزىلوردا وبلىسىنان زۇلقارناي نۇراي، قوستاناي وبلىسىنان بەيسەمباەۆا ريزا، كوۆالەۆا يرينا، ترەفيلوۆا ماريا دوستاستىق ەلدەرى تاقىرىبى مەن شىمكەنت قالاسىنىڭ كورىكتى جەرلەرىن قىلقالاممەن اسەم تۇردە بەينەلەگەن. جاس ونەر يەلەرىنىڭ ىشىندە ەرەكشە كوزگە تۇسكەن يسابەكوۆا گۋلناز دوستاستىق تاقىرىبىن قابىرعاعا سالعان ارنايى گراففيتي ونەرىمەن ءتانتى ەتتى.
«ۆوكالدىق شىعارماشىلىق» نوميناتسياسىندا قوستاناي وبلىسىنان پەرەۆوزكينا داريا «قازاعىمسىڭ» ءانىن جاندى داۋىستا جوعارى دارەجەدە شىرقاسا، پاۆلودار وبلىسى اقسۋ قالاسىنىڭ جاس ءانشىسى ارىنوۆا داريا، ساپارگاليەۆا ازاليا جانە شىمكەنت قالاسىنان ابۋتاليپ اليجان شەتەلدىك كلاسسيكالىق شىعارمانى كاسىبي دەڭگەيدە ورىندادى.
«اسپاپتىق ورىنداۋ» نوميناتسياسى بويىنشا شىعىس قازاقستان وبلىسى، سەمەي قالاسىنان «دومبىرا دۋمان»، «قىزدار اي» انسامبلدەرى قازاقشا كۇي ونەرىنەن ەرەكشە سىر شەرتتى. ماڭعىستاۋ وبلىسى ماڭعىستاۋ اۋدانىنان قاتىسۋشىلار الىباەۆا اقتورعىن مەن نۇرتىلەك جاينار دا ورىنداۋ شەبەرلىكتەرى جوعارى ەكەنىن كورسەتە ءبىلدى. دارىندى جاستار قازاقتىڭ كونە شىعارمالىرىن دومبىرا، بايان، قوبىز، سكريپكا، پيانينو، ساكسافون جانە گيتارا اسپاپتارىندا ەركىن ويناي الاتىندىقتارىن كورسەتە ءبىلدى.
ونلاين وقۋعا قاتىسۋشى ونەرلى بالالاردىڭ ساپالى بەينەجازبالارى الەۋمەتتىك جەلىدە ارنايى حەشتەگتەر ارقىلى جاريالانىپ كورەرمەننىڭ ىستىق ىقىلاسى مەن لەبىزىنە بولەندى.
شىمكەنت قالاسى اكىمىنىڭ ءباسپاسوز قىزمەتى
